Niiy Min Ke' Yumpān Mee' Yotantangan Than Yipam Thaa'-Kuumpayn Niiyang
61“In ngeeyāna: niiy minan yumpān-a, niiyana mee' yotantangan ke' yumpān minana yipam pam wanchangan thathayn niiyanga, a' thaa'-kuumpayn niiyang, an yimanangan ya'a. Niiy nath yaan muuk-muukamaniywey-a, an nil piip niiyantaman in kenyan wunan-a, ngangk min ke' wuniy niiyantamana ya'a, a' min ke' iiyiy niiyant, ya'a.
2“Pam wanch wiyanganiya wukal thee'antan thant pam wanch al-alantan than meechana, wukal ke'anangan wun-wuntanweya, than yipam pam wanch wiyangan thathayn thanang, a' thaa'-kuumpayn thanang. An puth min yimanangan ya'a, than yaan thee'antan, yipam pam wanchangan ulpathayn thanang. Yaa, pam wanchangan ngul thaa'-kuumpayn thanang, puth thanam thonakama, nil puth piip God.angan ya'a, ke' thaa'-kuumpiy thanang, ya'a. 3Puth niiyiya, niiy wukalan thee'ān thant pam wanch al-alantan wukal ke'anangan wuntanwey-a, niiy ulp-ulpanangan ke' thee'ān yipam kampan niiyantamang thathayn a' thaa'-kuumpayn niiyang. 4Nungkway pam wanchangan ke' thathiythan niiyang-a, nil piip God.angan ep thathan niiyang, a' nilan thawan nil anana min-minam paththama, a' ngangk min thamp wunan nunganta.
Nil Jesus.angana Thaa'-Aath Thanang Wanttakan Mee'-Wuthanamayn God.antan
5“Pam wanch wiyiy kaangk aak churchangan thanayn mee' yotantang, wiyiya aak yoon engkanang thanayn, a' mee'-wuthanamayn God.antan yipam pam wanch yotangan thathayn thanang. In ngeeyiya: pam wanchangan ngul thaa'-kuumpayn thanang, puth thanam thonakama, nil puth piip God.angan ke' thaa'-kuumpiy thanang, ya'a pam yim-yimananganiya. 6Puth niiyiya, niiy piip God.antan thawān-a, niiy puy iiyān pokkapang aak enyanang thawān nungant. Niiy puth ke' thathin nunang God.an ya'a, niiy mee'-wuthanamān nungantana, an epa. Nil piip God.angan ngul thathow niiyang aak angana, a' nil putha thaa'-kuumpow niiyang a' ngangk min wunow nungant niiyantamana.
7-8“Pam wanch wiyangan ke'am thiichantan nunang God.an. Than kaangk yaam thaw-thawayn oony pi'an thanttam al-alantan, a' than kaangk wik wolmp anman pi'-pi'ayn yipam oony pi'an thanttam al-alangana wik ngeeyayn thananga. Puth niiyiya, niiy piip God.antan wik thawān-a, niiy yimanangan ke' iiyān ya'a. Piip niiyantam God.ana, nil kana mee'miy niiyang. Niiy ke'aman yippak thawaniy nungantan-a, nil kanam thiich niiyang niiy ngeen nathan ngaantam-ngeeyaniy putha niiy ngeenakan thamp kaangk thawān nungantan.
9“Niiy kaangkwey thawān God.antan-a, niiyiy wik yimanangan thawān nungant:
‘Piip nganttam in kenyana, ngan kaangk pam wanch ma'mangkaman thawayn nungk nint wuut pi'an, minam paththam a!
10Ngan kaangk nint moom wuut pi'an iiyān ngant pam wanch yotamantana,
ngan yipam ma' nungkarang wunāna, ma' wiyantang ya'a.
Ngan kaangk pam wanch ma'mangkamangan wik nungkaraman ngeeyayn,
a' woyan min koochanam nungkaram anman wak-wakayn, ke' than ngaantiyongk al-alangan wik nungkaraman ngeeyantan aak in kenyan.
11Piip-ang, kinch inana nganangan ma'angam pi'ān ngan yipam may minh thakan uwāna.
12Nint nganang ngangk mamān a' putha kon-ngathow nintang way yot anangan nganan yump-yumpan,
puth ngan ngangk maman thanang, kan kon-ngathan nganang way thanan yumpin ngant.
13Nint weekān nganang oony way alantaman,
a' kalān nganang woyan way anpalan ngan yipam way ke' yumpān.
Yey, piipa, anman kan.’ ”
14A' nil Jesus.an thaw thant ngul, “Niiyang way anangan kon-ngathow niiyang than wiyangan yump-yumpin niiyant-a, yaa, nil puth piip ngamparam God.angan-a, ke'-ngul ngaantam-ngeeyow way niiyan yump-yumpana. 15Niiyang ke'wey kon-ngathow than niiyantan way yump-yumpin-a, yaa, piip ngatharam ilang kenyana ke' kon-ngathow nunang way niiyan yump-yumpan ya'a.
Nil Jesus.angan Thaa'-Aath Thanang Than May Ke'aman Mungkantan
16“Kan in ngeeyiya: wiyiya may wantaniy, ke' mungkaniy ya'a, putha ke'am ngaantam-ngeeyaniy may mungkanakan niiy yipam piip God anman ngaantam-ngeeyān nunanga. Pam wanch wiyangan may ke' mungkantanan-a, ngangk way iiy-iiyantan, kaa'waliya wiy-wiyam iiy-iiyantan. Than kaangk yimanaman iiy-iiyayn than pam wanch wiyangan yipam thathayn thanang than mayan ke'am ngaantam-ngeeyantan, ke'am mungkantan. Than pam wanchangan nath thaa'-kuumpiythan thanang, nil puth God.angan ya'a ke' thaa'-kuumpiy thananga. 17Puth niiy mayan wantaniy-a, niiy muunchāna, kaa'wal pungwuna, a' putha yangan umpwun combang, 18than wiyangan ke' yipam mee'miy wunayn niiy mayan want-wantaniya. Niiy puth ke' thathin nunang piip God.an ya'a, puth nil God.angan ep thathan niiyang, a' putha nilan thaa'-kuumpow niiyang a' thawow niiyant nan mina.
Niiy Way Min Yot-Yotam Ke' Pi'ān Aak Inganiya
19“Niiy wukal-weenth ke' iiyāna, way min min-miniy al-alangan ke' ngangk mungkow niiyang, niiy way min yot ke' yalmathān aak imanaman. Way min nanangan yaam ke' wunayn ya'a; an wayamayn ngul. Wiyiya yuk way cockroaches al-alangan mungkantan, ngo'arang thak wayathan yuk way min anangan. Wiyiya, pam ma'-kuchanang maayantan niiyantam. 20-21Niiy nath kaangkwey wukala putha way min yotan yalmathān niiyantakaman aak inganiy-a, an puth niiy yuk way min anman ngaantam-ngeeyaniy thonakama. Puth inan waya paththama! Niiy nath kaangk God.an-a, an niiy ngaantam-ngeeyaniy nunang, ngangkang pi'-pi'aniy nunang. Anpalaniy-a, nil ngul kalow niiyang aak min nungantamakan. Aak in kenyan nungantamana an ep ke' wayamiy ya'a, an min-minam anman wun-wunow aak umpuyam. Pamangan ke' maayiythan way min aak God.antam anpalan, an ya', puth yuk cockroachesang thakan ke' wayathiythana ya'a, minam anman wun-wunayn ngulakama.
Nil Piip God.ana Ke' Nganth Yimanangan Wampan Niiyant
22-23“Mee' niiyantam anangan-a, ke' nganth yimanangan kemp niiyantamakan. Niiywey mee' minangaman iiy-iiyinwey-a, an ke' niiy nganth pi'anang yimanangan iiy-iiyaniy. Niiy nath mee' way thampangan-a, an ke' niiy aak ngaa'ang yimanangan iiy-iiyaniy. Nil piip God.ana ke' nganthan yimanangan wampan niiyant, niiy yipam woyan nungantam thiichān. Yaa, niiy kan-kanam woyan min paththam wak-wakāna, niiy ke' yipam ke' aak ngaa'angan iiy-iiyāna.”
Niiy Ke'a Kuchek Wayan Wunow Niiyant
24Nil Jesus.ana wik inangan thaw thant ngul, “Niiy woyan kuchaman karpam ke' wak-wakin pulang, ya'a; a' niiya moom kuchamanta ke' work iiy-iiyin ya'a, moom thonamantan ep work iiyān. Niiyan puth nath moom kuchamantan work iiy-iiyin-a, yaa, niiyan puth thonaman-a, ngangk-wayangam kalin nunang, a' way waa'in nunang, puth niiy moom thon an ep min waa'in nunang a' kaangk wunin nungant thamp. In aak yimanangan wunana: niiy nathwey kaangk wunin God.antan-a, niiy wukal-weenth ke' iiyina.
25“Ngay inan waa'āng niiyantan: niiy yaam ke' ngaantam-ngeeyān may-a, putha way min anangan thakan, a' yaam ke' ngaantam-ngeeyān niiy ngul want-wanttakan minam pi'-pi'ān niiyantakaman. Niiy ngul aak ingan wunaniy may mungkanakan thonakam ey? a' putha ngook min-miniy ngoonchanakan ey? Ya'a! 26Niiy minh panch anangan thathāna. Ngul than may kaanch anangan kaampantan thanam ey? Ya'a! A' than may kaanch anangan yal-yalmathantan a' aawuchang ngul pi'-pi'antan ey? An ya'a! Nil piip niiyantamang God.angan min-minam pi'-pi'an thanang. Nil niiyantan ep-paththam kaangk wunan, puth minh panch al-alantan ya'a, chil-chila! Nil niiyang pam-a, wanch-a, puk manyiy tham minam paththam pi'-pi'an niiyanga. 27Kuchek way nath wunowan niiyant mayam thakan-a, ngul niiy yaam man-yethamanan wun-wunān ey? Ya'a.
28“Inan thamp ngeeyāna: niiy kulich thakan yaam ke' ngaantam-ngeeyāna. Niiy thathāna, may kooth a' putha pach yot em-emantana. Ngul than pach yot al-alangana kulich thanttakam wak-wakantan ey? ya'a, than ke'am wakantan. 29Thon in ngaantam-ngeeyān pam King Solomon.ana, nilaniya ma'mangkiya ngook min-minam anangan ngoonch-ngoonch. Than pach anangan ach-umpanam min paththam aa, puth ngook King Solomon.antamana, an chil min a! 30A' putha wak thakan emantan-a, an ach-umpan thama. An yaan thonakam wunan wak erpan, kan-ngulana, kathaman ngul a' ngamp thumang ngul kiingkanamp. Nungkway wakan yaam ke'am wunan-a, nil God.angan min ach-umpanam yumpan, a' minam pi'-pi'an. Ngul nil niiyangan thamp minam ke' pi'-pi'ow niiyang ey? In ngeeyiya: nil niiyang min-minam paththam pi'-pi'ana, pach-a, puth wak anangan chil-chil pi'-pi'an thanang. Niiyiy puth min-minam ke'am ngaantam-ngeeyaniy nunang God.an nil minaman pi'-pi'an niiyang. Niiyana min-minam ngaantam-ngeeyān piip God.an nil ma'-kaa'-minangaman pi'-pi'an niiyang.
31“Kuchek way ke' wunow niiyant puth ke' ngaantam-ngeey-ngeeyān may wanttinpalan uwāna, a' putha ngak-a, way min thakan wanttinpalan uwāna. 32Puth pam wanch anangan than ke'aman thiichin nunang God.ana than ngaantam-ngeey-ngeeyantan may thakan wanttinpalan uwayna. Nil puth piip nungkaram God.angan ilang kenyan kan mee'miy niiyang may-a, putha ngakan kaangk mungkānweya, a' puth way min thakan kaangk pi'ān niiyantakamweya. 33Yaa, niiyiy putha punch-aakam thee'wun ma' God.antang, niiy min anman yump-yumpān wiyantan nil piip God.an yipam ngangk min wunowanta, a' nilaniya ma'-aath-aathow niiyang mayan uwān, ngakan putha way min kulich thakan uwāna. 34Niiy yimanangan ke' ngaantam-ngeey-ngeeyāna, ‘Ngaa'thamana, aak way nath ngul wampow ngampar.’ Kuchek way puth ke' wunow niiyant amanaman a! An ya'a. Aak way nath kinch inman nath wampiy niiyant. Niiy inan ep ngaantam-ngeeyān niiy want-wanttakan kinch inmana aak wayan thaampāna, anman thonakam, an anman kana!