Nil Jesus Mulam Kanaman Eka
281Aak Saturday.an kanan minch-a, aak Sunday.akan kan-ngul man than-than aakan paanthowa, pul wanch kuchama Mary Magdalene-a, a' putha wanch thon anana Mary-a, pul iiypul aak awarakan thathowpul. 2Yaam ke'anamana, aakan ya' wunyatha, a' nil ngaantiyongk God.antam inpal keny uk, a' kunttow pi'an anan thechath thaa'amana, a' kunttow angman nyiin-nyiin ngul. 3Nil ngaantiyongkana ke' ngaay yimanangan nyiin-nyiin, ngook nungantaman thampa pach-pachama. 4Puth than pam soldiers anangana ngangk akangam than-thanin a' ngangk winynyang paththam mo'in, aakangam angman keekin, popam anman wun-wunin ke' pam mula.
5Nil ngaantiyongkan thaw wanch kucham al-alantan, “Nip ke' winynyang mo'owa! Ngay kan mee'miy nipanga nip Jesus.anta wenkanipa, pam anman yuk wuuyanangan waanchin nunanga a' mulathin nunangana. 6Nil in ya'a; nil kanam mulaman eka ke' wik anman nilaman thaw. Nip pal iiyowa aak awar in pekan thathow nilan wun-wuna. 7Yaa, nip erkam koyaman iiyowa a' ngurp nungantam al-alantan waa'ow thantana, ‘Nil mulaman koyam kanam eka, a' nil inman aak Galilee.akana umputh iiyowa a' niiyana aak angan thathān nunangana. Wik ngayan waa'ang niiyantan-a, niiyana konangam pi'-pi'āna.’ ”
8A' pulana koyam erkam iiypul, winy-winynyang ngeet-ngeetpul aak awar amanamana, a' ngangk minangam kamp mo'-mo'pul pulan yipam wik waa'owpul ngurp Jesus.antam al-alantana, nil kanaman ek mulamana. 9A' yaam ke'anamana nilam paththam Jesus.ana wamp pulant, a' thaw pulant, “Nip in ey?” Pulana wamppul nungant, a' tha'ana ma'ang mampul nunang, a' thaa'-kuump-kuumppul nunang. 10A' nil Jesus.an thaw pulant, “Nip ke' winynyang mo'owa, nip iiyow a' waa'ow thant kuunch ngatharam al-alantan, aak Galilee.ak iiyayn a' aak angan kaa'walan thathayn ngayanga.”
Than Pam Soldiers Al-Alangan Wikana Waa'in Ngul Aak Awarana Ya'-Ya'am Ngulana
11Pul wanch anangana kanan iiy-iiypul woyan wakanangan-a, than pam soldiers puungk wiyangana aak awaran pi'-pi'inan-a, koyam ngul iiyin aak townakan, a' wikan waa'in thant pam pi'an priests al-alantan wik ma'mangkamana than mee' thanaman thath-thathinana. 12Yaa, than pam pi'an priests anangana a' wuut manth-thayan anangana than yalmathwin a' wik yumpin ngul a' thananiya wukal pi'an ngul thee'in thant pam soldiers al-alantana, 13a' thawin ngul thanta, “Niiy pam wanchantan waa'āna than ngurp nungantam anangan aak awarakan iiyin aak ngutangana, a' pam mul anana ma'-kuchathin nunang niiy weep thayanan wun-wunana. 14Nilwey moom pi'an paththam alangana pam Governor alangana wik imanaman nath ngeeyowan-a, ngan ngul thawān nunganta niiy way ke'am yumpanweya. Yaa, niiyaniya ke'a ngangk wayan wunow niiyanta nil wanttakan thawow niiyant pam pi'an Governor.ana.”
15Yaa, than pam soldiers al-alangan wukalana ma'ang mamin, a' kan-ngul wikan waa'-waa'in pam wanch thon-thonantan. A' aak in-inman Jews wiy al-alangan wik kath inan waa'-waa'antan than ngurp nungantam al-alangan pam mul Jesus.ana ma'-kuchathin nunanga.
Nil Jesus.ana Wamp Ngul Thant Ngurp Nungantam Al-Alantana
16A' ngurp Jesus.antam pam eleven anangana aak achantangak iiyin aak Galilee.ang angman, nil Jesus.an ka'athaman thaw thant aak-aakanakan iiyayna. 17A' nilaniya aak angman wamp thantana. Than thathin nunangan-a, thananiy-a, ke'am min-minan ngaantam-ngeeyin nunangana, ya'a, nil ke' pam thona aak anganiy than-thana, puth ya'a, nilam Jesus a! 18A' nil Jesus.ana thintham ngul wamp thant a' thaw thant, “Piip ngatharaman thaw ngathara ngay pam moom wuut pi'an iiyānga pam wanch ma'mangkamantana a' putha way min ma'mangkamantana ngay moom thampa, aak inan earthangana wuntana puth aak in kenyan wuntana. 19Ngay ke'-paal inan thawang niiyanta: niiya aak nath-nathan iiy-iiyān pam wanchantana a' waa'-waa'ān ngayang thanta, a' thawān thant than ngayang thampan monkan-wak-wakayna. Than kanan ngangk thee'-thee'ayn ngatharan-a, niiy kootra ngakangan kuungk-kuungkān thanang, puth than pam wanch anangana ma' piip God.antang ngul wun-wunayn puth-a, ma' ngatharang nhengk-kunchantanga, a' puth-a, ma' Ngeen-Wiy Min alantangan ngula. 20Thaa'-aath-aathān thanang wik min anangan ngeey-ngeeyayna a' ngangkangam pi'-pi'ayn ngul wik anangan ngayan waa'-waa'ang niiyantana. A' ngay niiyantang angman ngul iiy-iiyānga, aak imanaman ngula, a' aak-aakanakaman aak inan minchowana.”