Than Jesus.ana Kalin Nunang Pilate Alantana
271Anpalan-a, ngaa' thonan wamp-a, than pam pi'an anangan ngaa'-ngaa'thiyangam yalmathwin, than pam pi'an priests anangana, a' puth-a, than pam wuut manth-thayan anangana, than wik yumpin thanttakaman Jesus.an mulathayn nunanga. 2A' than Jesus.an chol many kung-makanang kathin nunang, a' nath puyamam kalin nunang, a' ma'am thee'in nunang pam moom pi'an alantan Romans al-alantamana, namp nungantiya Pilate.
Nil Pam Judas.ana Utham Ngul
3Anpalan-a, nil Judas.ana pam nilaman theetath nunang Jesus.ana, nilana wik ngul ngeey thanang than kanan kalin nunang Jesus.an yipam mulathayn nunanga. A' nilaniya ngul-nyaa' ngul wun a' putha ngangk way thamp wunant, puth nil ngaantam-ngeeya nil way iiy Jesus.antana. Nilana wukal yot koyam kal thant pam pi'an priests al-alantana a' putha pam wuut manth-thayan al-alantana, 4a' nil thaw thant, “Ngayana way-wayam paththam yumpanga. Ngayan ma'am thee'ang Jesus.an pam way al-alantan mulathayn nunangana, nilana pam min-minam paththama, pam way ya'a, way ke' yumpanama, ya' anman.” Thanan thawin nunganta, “An kaniy e! An ngul ngant ey! An nungk-nungka!”
5Judas.angana wukal yot anangan aakang thee' aawuch ngench thayanang angmana a' kan-ngul iiy; nil koyam iiy-a, a' man kath nungantakaman kuuyangana a' yukang angman waanch nungantakam a' mul ngul wun.
6Than pam pi'an priests al-alangana wukalan maayin ngul a' thawin ngul, “Wukal inan Judas.antan thee'ina, nil yipam pam Jesus.an mul wunow. An puth min ngampara ya'a, wukal ingan ke' wuniya aawuch ngench thayan God.antamangana, wik thayan ngamparamana yimanangan ke'am waa'ana, ya'a.” 7Thanana wik karpam ngul thaw-thawina a' wik inan yumpin ngul than aak piiyayn pam thonam alantaman nga'alangkan yump-yumpan, aak ananiy-a, nungantamweya, thanan namp inan waa'in nunanga “potter”. Puth thanan ngaantam-ngeeyin ngula than yipam pam wanch thaa'nganth thon anangan mulan wun-wunayn-a, aak angan kaamp-kaampayn thananga. 8Puth anpalana, thanan aak anan waa'-waa'antana “aak chaapara”, in-inman waa'-waa'antan aak ananiya.
9An puth aak keenkanam anpalan meenath ngampara wik pam thonam anan thaw Jeremiah.ana, nil Jesus.an waa'ana, an puth kan-kanam ngul wamp. Nil aak keenkanaman umpa lat ngench thayanangana wika inangan umpa, “Than pam wanch yotaman aak Israel.amana thawin thananiya wukal thirty ngul thee'ayn pam thonaman yipam mul wunow. 10A' than wiyanganiya wukal thirty.ana palam piiyin thanang a' aak piiyin thanttakamana, aak pam thonam alantamana nil nga'alangkan yump-yumpana, pam potterana. Nil God.ana wik yimanangan thaw ngathar.” Nil Jeremiah.an wik yimanangan keenkanaman thaw.
Nil Pilate.ang Mep-Mep Nunang Jesus.an
11Anpalana, than Jesus.an thanathin nunang um pam pi'antang, nil pam anan Rome punchana, a' nil pam pi'an alangana mep-mep nunang, “Nint ina moom king Jews al-alantaman ey?” Nil Jesus.an thawant, “Nint wik nanan kan thawan-a, an kan-kanama.” 12A' than pam pi'an priests al-alangan a' puth-a, than wuut manth-thayan al-alangan waa'-waa'in nunang Jesus.an nil way yot yump-yumpa, puth nil popam anman than-than, ke'am wik thaw, ya'a. 13A' nil Pilate.an thawant ngul, “Nint ke'am ngeeyan thanang ey? waa'-waa'antan nintangan ey?” 14Nil puth Jesus.ana wik koyaman ke'am thawa, ya'a, thaa' popam anman pi'-pi', nil pam pi'anan-a, mee'am paththam ik.
Than Kuchin Nunang Jesus.an Mulan Wunowa
15Kaap thon-thonangan-a, may pi'anan yumpantan Passover.an-a, nil pam pi'an Pilate.angan pam thon-thonam kuch-kuchan thant Jews al-alantan aak jailam anpalan -- than wee'antan kaangk-a, nil anan kuchow thantana. 16Aak an-aniyangan-a, pam namp Jesus Barabbas aak jailang wun, pam inana, than yotangan mee'miy nunang. 17A' than pam wanch Jews thaa'-wantanaman yalmathwin aak Pilate.antamakan-a, nilan-a, thaw thant, “Niiy pam want-wanttinan mi'āna, ngay yipam kuchāng nunang niiyantana? Ngay pam inana Jesus Barabbas kuchāng ey? Nath ya'a, ngay pam thon inana Jesus kuchāng niiyantan ey? pam inana than wiyangan waa'antan nunang God.angan keenkanaman kaa'ngak kuchowan nunanga!” 18Nil Pilate.angan mee'miy thanang paththam pam pi'an Jews al-alantaman puth than mee'-wunin nungantam Jesus.antam thanan ke'-paal ma'am thee'in nunang.
19Nil Pilate.angan yippak aak courtakan angman nyiin-nyiina, puth nil wanch thum nungantamangan wik kuch nungant, wik inangan thawa, “Ayyang, nint pam min nanana ke' kuchin nunang mulathanakana, ya'a, nil pam min paththama, way ke' yumpanama! Ngay ngutangan pith-pithangan nunangana, a' ngangk way paththam wunar nungantam anpalana.”
20Puth than pam pi'an priests al-alangana a' puth-a, wuut manth-thayan al-alangana thaachin thanang pam wanch yot anangan than yipam thawayn nungant Pilate alantana Barabbas.an kuchow thantana, a' Jesus.aniy-a, kuchow nunang mulathanaka. 21Nil Pilate.an putham ngul thaw thant pam wanchantana, “Ngay pam wee' kuchāng niiyanta?” Thanan thawin nungant, “Barabbasa!” 22Nil Pilate.an thaw thant, “Ngul pam inan niiy wiyangan Christ.an waa'aniy nunanga, ngay wanttak yumpāng nungantana?” Thanana pech-pechin nungant, “Yuk wuuyanang waanchān nunanga a' mulathān nunanga!” 23Nil puth Pilate.an thaw thant, “Nil way ngeen yump e?” Puth thanan othamayan pech-pechin nungant, “Yuk wuuyanang waanchān nunanga a' mulathān nunanga!”
24Nil Pilate.ang kan-ngul ngaantam-ngeey nil puth yaaman ke' thawiy thant pam wanchantana, than ngula kul pi'an yumpiythana. Yaa, nilana ngak uw, a' ma' nungantaman pung ngula mee' yotantangan, a' thaw thant, “Ngay ma' punganga, anan meenathāng niiyant ngayana ke'am kuchang nunang mulathanakana, niiyam ep kuchan nunanga!” 25Than pam wanch thaa'-wantanam anangan thawin nungant, “An kana! Man kul nath wampow nungant God.antan-a, nil mak wayathow nganang a' puk manyiy nganttam inangan thampa, a' kampan nganttam anangan ngulan aak ngeey-ngeey-ngeeyayna.” 26A' anpalana, nil Pilate.angan Barabbas.an kuch thant aak jailam anpalan. A' nilan thaw thant soldiers al-alantan puy ngul kalayn nunang Jesus.ana, a' piik-piikayn nunang kuuy alangan, a' nil thaw thant ngul, “Yaa, niiy kalān nunang yuk wuuyanakana, nailang mak pungān nunangweya.”
Than Soldiers Al-Alangan Thaa'-Thengkathin Nunang Jesus.an
27Anpalan-a, than soldiers Pilate.antam al-alangana Jesus.an matathin nunang ngul aak aawuch pam pi'an alantamakana a' pek ngoonchathin nunang, a' than soldiers yotaman angman yalmathwin Jesus.antanga. 28Thanan ngook nungantaman ya' thapathin a' ngook wewm ngoonchathin nunang. 29Anpalana, than yuk olk yumpin yuk waakamama ke' crown yimanangan, a' kuchekang ngul wunpin nungantanga, a' than yuk ma' malang wunpin nungantang ma'angan pi'ow, anpalana, thanan pungkang ngul thuchin um nungantang a' thaa'-thengk-thengkathin nunang, thaw-thawin nungant, “Ayyang, nint inan moom pi'an ey? Jews al-alantaman ey? Nint yaam man-yetham anman wun-wunān ey?” 30A' thanana thaa' theekang makin nunang, a' yukan-a, ma'am piiyin nunang a' yuk alangaman kuchek piikin nunang. 31Than kanan thaa'-thengk-thengkathin nunanganwey-a, than ngook ke' chaapar yimanangan kemp nungantam anpalan thapathin ngul a' ngook nungantam anman koyam ngoonchathin nunang. A' anpalana, than yoon kan-ngul kalin nunang, yuk wuuyanangan waanchayn nunang a' mulathayn nunang.
Than Jesus.an Waanchin Nunang Yuk Wuuyanangan
32Than kanan iiy-iiyinan-a, than pam aak Cyrene punchan anana umang uwin nunang, namp nungantiya Simona, a' than thaachin nunang yuk wuuyan Jesus.antaman kalow. 33A' aak namp Golgotha.ang wampina, wik ngamparamangan waa'anampa, “Aak Kuchek Kaancha.” 34Aak ang-ngulaniya, thanan wine opar karangk thamp nenchanathin a' thee'in nungant Jesus alantana. Nilan yaan manyam paatha, a' want, ke'am ngul mungka.
35Anpalan-a, than nailang pung-pungin nunang yuk wuuyanangan, a' waanchin nunang ngul, mul yipam wunow. A' than pam soldiers al-alangan ngook nungantaman thakan thon-thonam aath-aathwin thanttakamana, than puth yuk dice.ang kee'-kee'athin nil yipam wee'angan nath uwowana. 36Amanaman-a, thanana angman nyiinin ngul a' thath-thathin nunang. 37Yuk wuuyanang Jesus.antang kenyangkana than wik inangan umpin, waa'-waa'in nunang, “Nil pam Jesus inana moom pi'an king Jews al-alantamana.” 38Than pam soldiers al-alangana pam kucham thamp waanchin pulang Jesus.antang karpam angmana, pulana pam ma'-kuchan iiy-iiypul. Nil Jesus.aniy-a, menhang pulantang waanchin nunang, nil pam thonamaniya ma' malanga a' nil pam thonaniya ma' thakanga.
39Pam wanch wiy anangan woyan wakanan iiy-iiyin-a, kuchek wuny-wunyathin nungant Jesus.antan, a' wik wayanang thak thaw-thawin nungant, 40“Ayyang, nint ke' aawuch ngench thayan God.antaman wayathin ey? A' kinch ma'-ko'alamang kanan wantowan-a, ke' nint koyam ngul kaachin ey? An ya'a! Nint nath kan-kanamweya nhengk God.antaman-a, nint kan nungkarakam kaa'-piichanathāna a' yuk wuuyan nanpalan ukāna!”
41Than pam pi'an priests al-alangana a' puth than pam pi'an anangan wik thayanan thaa'an-aath-aathina a' puth than wuut manth-thayan anangana, than thampang thaa'-thengkathin nunang Jesus.ana. 42Than thawin thanttakaman, “Nil thanang wiy anangan ep kaa'-piichanathan ey? Nil puth nungamang thamp kaa'-piichanathow ee! Nil kan-kanam moom pi'an king ey? aak Israel aakanakan ey? Nil nath yuk wuuyanam anpalan ukowa, ngampaniya ngul ngaantam-ngeeyāmp nunangana nil kan-kanam God.angan kuchana. 43Nil God.an ngangkang pi'-pi'an nunang, a' waa'an nungamang ke' nil nhengk nungantama. Yaa, kan thathāmpa, nil God.angan nath kaa'-piichanathow nunanga, nath ya'a.” 44A' pam kucham anangan-a, yuk wuuyanang angan waanchin pulangan-a, pul thamp thaa'-thengk-thengkathpul nunang Jesus.ana.
Nil Jesus.an Utham Ngul, Ya'-Ngul
45Anpalana kinch keny ngulana, aak pal-puyan ngaa' nyim paththam anman wun-wun three o'clockakam. 46Three o'clockan wamp-a, nil Jesus.an wik othamayan ngul pecha, wik thaa'nganth nungantamang thaw, “Eloi, Eloi, lema sabachthani?” Wik ngamparamang yimanangan thawanamp, “God ngatharam-ang! God ngatharam-ang! Nint ngeenak too wantangan ngayanga?”
47Pam wanch wiy anangan angman than-thaninan-a, ngeeyin nunang, a' thawin thanttakamana, “Ayyang, nilan Elijah alantan pech-pechana!” 48Nil pam thonaman mo' a' nil ngook manyana uw, a' may wine pochang angan punchath a' ngook manyan-a, yuk ongkang kath, a' yukana keny ngul maay nunganta, a' thaw nungant Jesus.antan mungkowa. 49Puth than pam wanch wiy anangan thawina, “Ngamp kan kuupāmpa! Nil Elijah.an ngul nath wampowa nil yipam yuk wuuyanam anpalana ukathow nunanga. Ngamp ngul nath thathāmpa!” 50Anpalan-a, nil Jesus.ana wik othamayan pech, a' nil utham ngul, ya'-ngul.
51Aak an-aniyangan-a, ngook kee'an kaachin aawuch ngench thayanangan uk-uk-a, ananiya keny anpalana pekakam um-menhang ya' ika. Aakana ya' wunyath, a' kunttow pi'an anangana ikin thampa. 52A' awar pam mulantam anangan-a, an thampana ya' ikina, a' pam wanch yot God.antamana ka'athaman uthaminan-a, nil ekath thanang, man-yetham koyam ngul weenina. 53Than pam wanch il-ilangan-a, graves thanttaman wantin, a' anpalana nil Jesus.an mulaman kanan ek-a, than pek ngoonchin aak pi'an ngench thayan Jerusalem.anga. Pam wanch yotangan thathin thanang.
54Pam moom soldiers al-alantamana a' puth-a, soldiers nungantam anangana angman than-thanina, min-min thath-thathin nunang Jesus.ana a' than thathina want-wanttakan wampa nungantaniya, than thathina aakan wunyath earthquake.angana a' thananiy-a, winynyang paththam mo'ina, a' thanan thawin thanttakaman, “Nil pam inana kan-kanam paththam nhengk God.antama!”
55Wanch wiy anangan angman than-thanin, than kecham thath-thathin. Thanan monkan-wak-wakin nunang Jesus.ana aak Galilee anpalan-a, aak Jerusalem aakanakaman a' ma'-aath-aathin nunang. 56Wanch than inanganiya; Mary Magdalene, a' puth Mary thonana nila kaath pulantamweya James-a, puth-a, Joseph pulantama, a' puth wanch thona wanch nungantam Zebedee alantamana, a' putha wanch wiy anangan thampa.
Than Pam Mul Jesus.an Kaampin Nunang
57Aak ngutang ngulan-a, nil pam namp Joseph.an wamp, nil pam inana, pam ma'mangkiy aak Arimathea anpalana. Nil thampana monkan-wak-wak nunang Jesus.ana. 58Nil puth Joseph.ana Pilate alantan wamp, a' thawant, “Ngay pam mulan ke' kaling ey?” A' nil Pilate.an thaw thant pam al-alantan workan iiy-iiyin nungantana pam mulan thee'ayn nungant Joseph alantana. 59Yaa, nil Joseph.angan maay nunang, a' kath nunang ngook ongk nyiingkanamang alangana, 60a' nil aak awarangan pek ngoonchath nunang -- aak awar inaniya ke' nungantakama, Joseph alantana, puth niliya pam mul inana Jesus.an thenchana. Than nyiingkwey we'-we'in kunttow thayanama. A' nil kunttow wuut pi'anana poo tha' thaa'ang angman yipam wunow. 61A' Mary Magdalene-a, a' Mary thon anana nyiin-nyiinpul, um grave.akana.
Than Pam Wunpina Aak Awaran Yipam Thath-Thathayna
62Ngaa' thonang ngulana, aak Saturday.an-a, than pam pi'-pi'anam priests anangana a' putha pam Pharisees anangana Pilate.antang wik thaw-thawin. 63A' than thawin nungant, “Moom-ang, ngan kan ngaantam-ngeeyanana nil pam anan man-yethaman yippak iiy-iiy-a, nilaniy thawa, ‘Ngay aak awarangan ma'-ko'alam thonakam wunānga, a' anpalana ngayana koyam ngul mulaman ekāng.’ Nil puth Jesus.an yaan wik uuyama. 64Yaa, nintan puth pam soldiers nungkaram al-alantan thawān thanta aak grave.an min-min thath-thathayna aak ma'-ko'alamakana -- than ngurp nungantam al-alangan ke' yipam pam mulan maayayn nunang, a' waa'iythan ngul pam wanch wiyantan, nil mulaman kanam eka. Than wik yimanangan thaw-thawiythanan-a, thananiya puy-puyam wik uuy-uuyamiythana.” 65Nil puth Pilate.an thaw thant, “Niiy soldiers puungk wiy kalān thanang, a' thaa' grave.angana min-min thayanathāna, a' aak grave.an min-minam ngul pi'āna.”
66A' than Pilate.ana wantin nunang ngul, a' kan-ngul grave.akan iiyin. Thanan grave thaa'an kuuyang kathin a' kuuy anangana nguchamanang mak-makin yipam wiy al-alangan thaa'an ke' thapathayna -- a' thanana soldiers wiy anangan wunpin thanang yipmam grave anan minam pi'-pi'ayna.