Nil Jesus.angan Wuut Manth-Thayan Anangan A' Pharisees Anangan Waa' Thanang Than Min Ya'a
231A' nil Jesus.an thaw pam wanchantan putha ngurp nungantam al-alantan, 2“Than pam Pharisees anangana putha pam teachers wik thayan anangan thaa'-aath-aathantanan-a, -- work thantaniy-a, wik engkanangan waa'-waa'ayn, wik thayan Moses.antam anangana. 3Wik ngeen nathanwey thawayn niiyantan-a, niiyaniya ngeeyān thanang puth niiyaniya ke' yumpān ke' thanan woyan wayan wak-wakantan, way thakan yump-yumpantan, puth thananiya ke'am wik thayan thanttamaniya ngeey-ngeeyantan, ya'a, an than wik thayanan pip-pipantan. 4An ke' than yuk anhan kath-kathantana pam wanch wiyantangan, pikpungkangan wunp-wunpantan thanta, thananiy puth pur'-pur' iiy-iiyantan ngula, a' than pam Pharisees wee'anangana kaangk ke' ma'-aathayn thananganweya, thanan kaangk ke' way min wiy anangan maayayn thanttaman. 5Puth thananiya kaangk pam wanch wiyangana thanang anman thath-thathayna, a' ngaantam-ngeeyayn thanang than ke' pam min yimanangana, puth ya'a, than min ya'a. Thananiya wik God.antaman lat pi'anang umpantan a' yuk box manyang thenchantan ngul, a' kuuyang kathantan, box manyana, a' ngul-ngangkang thanttamangan kathantan ngul, puth ma' punthang thakan, than yipam pam wanch wiyangan thath-thathayn thananga. A' putha ngook min ongk thamp ngoonchantan, fringe thampweya, yipam pam wanch yotangana thathayn thanang.
6“Than may pi'anakan iiyayn-a, thanan kaangk aak min-minangam nyiinayna. A' putha, than churchakan iiyayn-a, thanan kaangk umputh anman nyiin-nyiinayna, than yipam pam wanchangan thathayn thananga. 7Putha thanan kaangka pam wanch anangan umang iiyayn thant aak town wakanana, ke' pam wuut pi'-pi'anam yimanangan umang iiyayn thant, a' putha thana kaangka pam wanchangan teacher waa'ayn thananga. 8Puth niiya wiyantan ke' thawān thant teacheran waa'ayn niiyanga, niiy puth ma'mangkamana karpama iiy-iiyaniy pich-pichama ke' niiy kuunch yimanangana; niiyaniya teacher thonam anman niiyant. 9Puth niiyiya pam wiy anangana piip ke' waa'ān thananga, niiyantaniya piip thonam anman, in kenyan wun-wunana. 10A' putha pam wanch wiyangana ke' waa'ayn niiyang moomana, puth niiyantaniya moom thonam anman thonakama, ngay Christa. 11Nil wee'-nathweya kaangk ke' pam pi'an yimanangan iiyow-a, yaa, nilaniy putha pam wanch wiy anangan ma'-aath-aathow thanangwey, minam pi'-pi'ow thananganiya. 12Nil wee'angweya pam pi'an yumpiy nungamangan-a, ngul-ngulaniya nil pam many ngul weenowa. Nil wee'-nathweya ulp-ulpanangan ke'aman iiy-iiyan-a, pam nil mochanana, ngul-ngulaniya nil pam pi'an paththam ngul iiy-iiyowa.”
13Anpalana, nil Jesus.an thaw thant ngul pam Pharisees al-alantana, puth-a, pam teachers al-alantan thanan wik thayanan thaa'-aath-aathinana, “Niiy kan in ngeeyān a! way ngulan wampow niiyant a! Puth niiya muukamathaniy thanang pam wanch anangan a! A' niiya pam wanch anangana way-wayathaniy thanang than anangana kaangk ma' God.antangan iiyayna, puth niiy wik piip God.antamana way-way thaa'-aath-aathaniy thananga. A' putha niiy thampaniya woyan min God.antaman ke'am mi'ana, ya'a -- an ke' niiya thaa' door aawuchan ngathana, than yipam pam wanch wiy anangana ke' ngoonchayn aawuchangan, putha niiy thampaniya yoon angman than-thananiy a!
15“An kan-kanam paththam way ngul wampow niiyanta! Niiy puth pam wanch anangan muukamathaniy thananga. A' putha niiy aak palam-puyam iiy-iiyaniya, wiyiya tha'anga, putha wiyiya ngak wakana, niiy yipama wik min God.antaman waa'-waa'ān wiyantana, puth niiyiya way-way thaa'-aath-aathaniy thanang niiy yipama woyan way aakanakana mee'-wichān thanang ke' niiy anman wak-wakaniya. Nil pamang nathweya monkan-wakiy niiyang-a, yaa, an niiy way paththam yump-yumpaniy nunanga, ke' niiy yimanangan ya'a, niiyiya way chil-chil yump-yumpaniya, puth nil-niiyantan-a, an ep-paththama way-wayam paththam weenow ngula. Aak ngul-ngulan-a, niiy ma'mangkam ngulan-a, aak way aakanakan iiy-iiyāna.
16-17“Ee'a, an kan-kanam paththam way ngul wampow niiyanta! Niiyaniya way-way thaa'-aath-aathaniy pam wanch anangan, niiy ke' pam ko'anch yimanangana mee'-wich-wichaniy thananga. Pam wanch wiy anangan wik thayanam thawantan, ‘Ngay kan-kanam thawāng nungka, piip in kenya, ngay ngul yumpānga, ngay ke' wik uuyaminga, ya'a.’ Wiyanganiya ‘piip in keny’ wichantan; wiyanganiya aawuch ngench thayan anan wichantan; puth wiyangan-a, yuk gold anangan wichantan aawuch ngench thayanangan wun-wuntana. Puth wiyanganiy-a, yuk altar anan wichantan aawuch ngench thayanangan than-thanan ana; puth wiyanganiya yuk way min aak yuk altarangan wun-wuntan-a, anangan wichantan. Yaa, niiyaniy thaw-thawaniy thanta, ‘Niiy nath namp aawuch ngenchan wichaniy-a, an kana, niiy mak wikan pipāna. Puth niiy namp yuk gold anangan wichaniy-a, niiy ke'a wik niiyantaman pipāna, ya'a.’ Niiy kuchek waap wayanang iiy-iiyaniya! An ke' niiy pam mee' ko'anch yimanangan iiy-iiyaniya! Yuk gold anangan min paththam mee' niiyantangan ey? ngul aawuch ngench thayana an wanttaka? Min ya' ey? mee' niiyantangan ey? Niiy in ngeeyāna: yuk gold anangan anman wun-wuntan aawuch ngench thayanangana nanpalan yuk gold ananganiy-a, an ngench ngula.
18“A' niiy wik inangan thamp thawaniy, ‘Namp yuk altaran wichaniy-a, an kana, niiy mak wikan pipāna. Puth niiya namp yuk way min anangan wich-wichaniy yuk altarangan wun-wuntan-a, niiyana wik niiyantaman ke' pipān, ya'a.’ 19Niiy kuchek waap wayanang iiy-iiyaniya! An ke' niiy pam mee' ko'anch yimanangan iiy-iiyaniya! Yuk way min anangan aak altarangan wun-wuntan-a, an min paththam mee' niiyantangan ey? yuk altaran ngul wanttaka? Min ya' ey? mee' niiyantangan ey? Niiy in ngeeyāna: yuk way min anman wun-wuntan, yuk altarang angmana nanpalan yuk way min ananganiy-a, an ngench ngula. 20Nil pamangweya namp yuk altaran wichiyan-a, a' putha wik thayanan yumpiy-a, pam thonamantanwey-a, an ke' nil way min anangan namp wich-wichan thanang thampa, an puth aak angman wun-wuntan, yuk altarangan. 21A' puth-a, thon in thampa, nil pamangweya namp aawuch ngench thayanan wichiywey-a, aawuch piip God.antaman-a, an ke' nila namp piip God.antaman wichan thampa, nil puth piip God.ana aawuch angman wun-wunan. 22A' putha nil pamang nathweya namp aak in kenyan wichiywey-a, an ke' nil aak God.antaman wich-wichan thamp, a' putha ke' nil namp God.antaman wich-wichan thamp, nil puth piip God.ana aak in kenyan wun-wunan.
23“An kan-kanam paththam way wampow niiyanta! Niiy puth pam wanch anangan muukamathaniy thananga. Niiy ke'-ngoongkam iiy-iiyaniy wik thayan God.antamakaniya wik min nungantam aakanakan, niiy puth minam ke' iiy-iiyaniy pam wanchantan, a' puth niiy ke'am ngangk mam-mamaniy thanangweya, a' wiyiya niiy wukal thakan ma'-kuchathaniy thanttam. Niiy ep yuk way min thee'-thee'aniy nungant piip God.antana, wukal wiy niiyantaman churchak kal-kalaniy a' yuk awal min thakan thee'-thee'aniy nungant. Niiy kanaka wukal thakan kal-kalaniy churchakana, puth niiyangana ke' kon-ngathow ngangk minangam iiy-iiyān pam wanchantaniya a' piip God.ant thampa. 24Niiy ke' pam wanch mee' ko'anch yimanangan iiy-iiyaniya, pam wanch wiy anangan mee'-wich-wichaniy thanang woyan wayakan. An ke' aak yimanangana: nil nyeeny nath may ngakangan keekiywey cup niiyantangan-a, an niiy nyeenyan maayaniy, niiy puth kaangk ke' may ngak nyeeny thampan mungkāna; puth niiyaniya camelana ep lokang thu'in ey?
25“An kan-kanam way paththam wampow niiyanta! Aak niiyant yimanangan wunana: niiyaniya yuk cups-a, plates anangan ma'-yotam pung-punganiy ey? a' pach-pachathaniy ey? puth niiy ngangk niiyantaman pach ke'am pi'-pi'aniy ya'a, niiy puth pam yangk mo'-mo'aniy, a' pam wanch wiy anangana way-wayathaniy thanang, piik-piikaniy thanang thaka. 26In ngeeyiya, an niiy yotamana an ke' niiy mee' ko'anch yimanangan iiy-iiyaniya. Niiy ka'athamana ngangk niiyantakaman pach-pachathāna puth anpalana niiyaniya minam ngul iiy-iiyāna.
27“An kan-kanam way paththam wampow niiyanta! Niiy puth pam wanch anangan muukamathaniy thananga! Niiyan ke' kunttow gravestone yimanangan iiy-iiyaniya, puth kunttowana ach-umpanang wunan grave kenyangkana, yipam yotangan thathayna, puth pek-pekamana pam mulantaman kaanch wun-wunana, puth kempana way ngul kanan kathama. 28Than wiyangan nath ngaantam-ngeeyantana niiy ke' pam wanch min iiy-iiyaniya, puth ya'a, ngangk niiyantamana way anman pi'-pi'aniy, puth-a, wik uuy-uuyamaniy thampa.”
Nil Jesus.an Wik Yimanangan Thaw, “Nil Piip God.angan Ngul Kuchow Niiyang Aak Way Aakanakana”
29A' nilana putham ngul thaw thant, “An kan-kanam way paththam wampow niiyanta! Aak keenkanama, wuut mangk niiyantam al-alangan kaangk ke' thanang pam prophets anangan, than mulathin thanang. Niiyaniya headstones yumpaniy thant pam prophets al-alantan, pam min al-alantan, a' headstonesana ach-umpanak yumpaniy thant -- an niiy yaan yumpaniy thant, yaan muukamaniy ke' niiy ngaantam-ngeeyaniy thanangweya, puth ya'a. 30Niiyaniy wik yimanangan thawaniya, ‘Ngamp nathwey wuut mangkantang keenkaman an-aniyangan wun-wunimpan thanttangan-a, ngampaniya pam prophets anangana ke' mulathimp thanangweya ke' thanan mulathin thanangweya.’ 31Yaa, niiyan puth wuut mangk anpalan wampana, pam al-alangana pam prophets anangan mulathin thanang, niiy kampan waa'aniy thanang! 32Yaa, niiy way anman yump-yumpaniy ke' wuut mangka kampan niiyantam al-alangan ey? Niiy ngulana work thanttaman minch-minchathān ngul ey? 33Niiy pam inanganiy yota, way-wayam paththam iiy-iiyaniy, ke' thuuk yimanangana thipangan thuuch-thuuchaniya. Ngul niiy ngaantam-ngeeyaniy ey? ke' nil piip God.angan ke' kuchiy niiyang ey? aak way aakanakan ey? Puth an ya'a! nil kuchow niiyang aak way aakanakan a! 34Puth ngay anpalan niiyant inan waa'ānga; ngayiya pam prophets anangan ngul kuchāng niiyanta, a' putha pam anangana kuchek waap min anangan iiy-iiyantana; putha pam teachers anangan wik min ngatharaman thaa'-aath-aathayn niiyanga. Puungk wiyaniya, niiy ngul mulathān thanang; a' puungk wiy anangan-a, yuk wuuyanangan waanchān thanangweya mul wunaynweya, a' putha pam puungk wiy anangan-a, niiy piik-piikān thanang aak church niiyantamangana, a' kenth-kenthān thanang ngula aak town amanamana aak thonak ngul iiyayn, nil yimanamanweya kenth-kenthān thanang, palam-puyam iiy-iiyayn aak thon-thonakana.
35“Aak keenkanamana, wuut mangk niiyantamang pam min anangan mulathin thanang. Ka'athamana than pam min Abel anan mulathin nunang. Anpalana than pam God.antam yot anangan mul-mulathin thanang aak-aakanakaman nil Zechariah.an ngul wuna, pam inman nhengk Berechiah.antam. A' than nunang thamp mulathin, aawuch ngench thayanang angman mulathin nunang, yuk altar thinth minhan kiingk-kiingkin, piip God.antana. 36Puth nil God.anganiya ngul wayathow niiyang pam wanch niiy inangan man-yethaman iiy-iiyaniya, puth wuut mangk niiyantamanga pam God.antam anangan mul-mulathin thanangweya.”
Nil Jesus.angan Kaangk Paththam Wun-Wun Thant Pam Wanch Aak Jerusalem.ang Wun-Wuntana
37Amanamana, nil Jesus.angan ngaantam-ngeey thanang pam wanch yot anangan aak Jerusalem.angan wun-wunina, a' nil ngangk way-wayam paththam wun thanttamana a' thaw ngul, “Niiy pam yotam anangan kanam mul-mulathan thanang nil God.angan kuch-kuch niiyanta. Niiyiya kunttowang thak piik-piikan thanang mulakama. Ngay ma'-yotam ke' ma'-yalmathing niiyang ngatharakama, ke' minh chookie kaath-kunch alangan ma'-yalmathan puk manyiy nungantam anangan a' pek-pekam punth-paamang ngul kang-kangan thanang ngula. Puth niiyiya kaangk ke' ngatharama. 38Niiy in ngeeyiya, nil God.angan aak ngench thayan niiyantaman ke'-ngul minam pi'-pi'ow, an too wantow ngul, ke' aak mook yimanangan wunow pam wanch ke'-ngul ngoonch-ngoonchayna. 39Puth ngay thampaniya wantāng niiyang ngula, niiy ke'-ngul thathān ngayang aak ingana ya'a. Ngul-ngulana an ep niiy thathān ngayangweya, amanamana niiy mee'miy ngul weenān pam ngay inmana nil God.angan kuchanya, an puth niiyan thawān ngul, ‘Yaa, ngamp thaa'-kuumpāmp nunang pam inana nil God.angan kuch nunanga.’ ”