Than Thawin Nungant Jesus.antan Work Pi'anak Meenathow Thanta
161Anpalaniya, puungk wiya Pharisees anangan-a, puth-a, Sadducees anangan wampin nungant Jesus.antan. A' thanan thawin nungant work pi'an yumpow mee' thanttangana nil yipam meenathow thantana nil God.angan ma'-kunch yump nunang. Thanan yaan thawin Jesus.antan wik yimanangana, thanan thathayn nil nath work pi'anan nath yumpowa, nath ya'a, ke' yumpiy. 2Puth nil Jesus.an thaw thant, “Kinch kanan uk-ukan-a, niiyaniy thawaniya, ‘In epa yuw mina ngotan ya'a, ngak ke' wampiya, puth yuwan wewm wunana.’ 3A' ngaa'-ngaa'thiyangamana, niiyan thawaniya, ‘In aak ngak ukowa an puth yuwana wiy-wiyam ngul ench, ngotan encha, wu'-wu'iy thampa.’ Niiy yuw anman thathaniy thonakama, nath ngak wampowa, nath ya'a, puth niiyaniya ke' thiichinweya nil piip God.angana yip-yipaman want-wanttakan nil ngulan yumpow, niiyan ke' mee'miya, ya'a! 4Niiy pam wanch man-yethaman wun-wunaniy puy-puyamana, niiy min ya' paththama, niiy pam wanch way-wayam paththam iiy-iiyaniy, niiy piip God.ana too wantan nunang ey! Niiy ngul ngeenak thaachaniy ngayang ngay work pi'an yumpāng mee' niiyantamangana? An ya'a! Ngay work pi'an ke' yumpāng niiyant, ya'a. Niiy inan ep-paththam thathān, ngay ke' pam anan Jonaha.”
Wik kanan thaw-a, nil Jesus.ana kan-ngul iiy, pam anangana want ngul thanang.
Nil Jesus.angan Thaa'-Aath-Aath Thanang May Yeast Anpalan
5Than wo'uwaynakan wampin-a, than ngurp Jesus.antam al-alangan ngaantam-ngeeyin ngula may breadan kan kon-ngath thanang, ke'aman kalin. 6Nil puth Jesus.an wik thayan thaw thant, “Niiy mee' yanth-yanth iiyān thanttam pam Pharisees al-alantamana a' putha Saducees al-alantamana. Niiy wik way thanttamana ke' ngeeyāna, puth wik thanttam ananganiya ke' may yeast anangana may breadan ulpathan.” 7Than ngurp nungantam anangan kan-ngul wik thaw-thawin thanttakaman anpalan nil Jesus.an wik thawa, a' thanan thawin, “Ngamp may bread ke'ananga, ke'-paal nil wik anangan thawa.”
8Nil Jesus.angan kanam thiich thanang wik thanan thaw-thawin, a' nil thaw thant ngul, “Niiy ngeenak thaw-thawaniy niiyantakamana ngamp may bread ke'anangan iiyampa? Niiy ngul wanttak ngayangan ngangkangan minam ke' pi'-pi'aniy e? 9Niiy ngul ke' mee'miy yippak ey? Ya' ey? ke' yippak ngaantam-ngeeyaniy ey? Niiy ke' konangam pi'-pi'aniy ey? ngay ka'athamana may bread five.an many-manyan pip-pipangana a' pam wanch yot five thousand anangan aath-aathang thanang may five manyiy al-alantamana. Niiy yuk baskets ngeen-ngeenang may nhanth ananganiy yal-yalmathana? 10Ngul amanamana, ngayan may seven pip-pipangan, a' pam wanch yot four thousand anangan aath-aathang thanang may seven manyiy al-alantamana. Niiy yuk baskets ngeen-ngeenang yal-yalmathan may nhanth ananganiy e? 11Niiy want-wanttak ke'am ngaantam-ngeeyaniy ngay may bread paththaman ke'am waa'-waa'ang niiyanta! Ngay inan ep waa'-waa'ang niiyant: niiy mee' yanth-yanth iiyān thanttam pam Pharisees al-alantamana a' putha Saducees al-alantamana. Niiy wik way thanttamana ke' ngeeyāna, puth wik thanttam ananganiya ke' may yeast anangana may breadan ulpathana.”
12A' than ngurp nungantam al-alangan kan-ngul ngaantam-ngeeyin nil wik thayan ke'am thaw thantana may yeast anpalana, ya'a, puth wik wayanang al-alantaman than Pharisees al-alangana a' puth-a, Saducees al-alangan ngul thaa'-aath-aathin thanang wik way-wayana.
Nil Peter.angan Minam Ngaantam-Ngeey Nunang Jesus.an
13Anpalan-a, Jesus-a, putha ngurp nungantam anangan kan-ngul aak thonak iiyin, aak town thinth, town alantaniy nampa, Caesarea Philippi. A' nil Jesus.ana kan-ngul thaw thant ngurp nungantam al-alantan, “Ngay pam inmana nil God.angan kuchanya. Than ngul pam wanchangan ke' wee' yimanangan ngaantam-ngeeyantan ngayanganiy e?” 14Than ngurp nungantam anangan thawin nunganta, “Than pam wanch puungk wiyangan waa'antan nintang ke' John pam anana ngakangan kootra kuungk-kuungkan thanang pam wanchana, puth puungk wiyangiya waa'antan nintang nint pam Elijaha, a' wiyangiya ke' pam anan Jeremiah waa'antan nintang puth wiyiy thawantana nint ke' prophet wiy anangana.”
15A' nil Jesus.ana thant ngul thaw ngurp nungantam al-alantan, “Puth niiyana wanttak ngaantam-ngeeyaniy ngayanganiye? Ngay pam wee' iniye?” 16A' nil Simon Peter paththam thaw Jesus.antana, “Ayyang, nint in ngeey a! Nintiya Christa, pam ananiya nil God.angan kaa'ngaka ngulan kuchow ngantana. Nint pam nhengk God.antama, man-yethaman wun-wunan alantamana.” 17A' nil puth Jesus.an thaw nungant Peter alantan, “Ayyang, Simon-ang! puk nhengk John.antam-ang! nan wik kan-kanam thawan nintaniy ngathara -- wik nungkaramana ke' kunttow thayan yimanangana. Nil piip God.an ngangk min wunowa. Piip ngatharam ilang kenyana wik anangan kuchekang wunp nungkarang, pam wiyangan ke' waa'in nungkar ya'a. 18Ayyang, Peter, kan in ngeeya, ngay kan in waa'āng nungkar. Namp nungkaram Peter nanana an ke' kunttow thayan paththam anangan yimanangan -- wik anangan nintan nyiingkan thawana an ke' kunttow thayana. Niiy wee'-wee'anangweya ngayangan ngaantam-ngeeyaniy ngay puk nhengk God.antaman-a, an ke' niiy kunttow thayanang angan than-thananiya. Niiyana karpam ngul iiy-iiyān pam wanch ngatharamaniya. Pam wanch wayanang al-alangana puth oony way al-alangan ke' wayathiythan niiyanga ya'a. Nungkway niiy uthamānwey-a, niiyaniya aak angman ngatharang ngul wun-wunān aak umpuyama. 19Nintiya Peter-a, pam wanch ngatharam anangan minam pi'-pi'ān thananga. An ke' ngaya yuk key thee'āng nungkar inana aawuch ngatharamakan, nint yipam pi'-pi'ān thanang. Nint wik ngeen nathan thawin thant-a, yaa, an min mee' God.antangana. Nint nathweya thawin thant woyan way ke'an wakayn-a, yaa, nil God.an wik anman thawow. Nint nathwey thawin thant woyan minan wakayn-a, yaa nil God.an wik anman thawow.”
20A' nil Jesus.an thaw ngurp nungantam al-alantan ngula, “Niiy pam wanch wiyantana wik inaniy ke' waa'āna, wik thoo' ke' we'arathān ngay pam inmana Messiah.ana, pam anman nil God.angan keenkanamana kaa'ngak kuchow ngayangan niiyantanweya.”
Nil Jesus.angan Waa' Thant Nungamang Nil Uthamowana
21Amanaman-a, nil Jesus.angana kan-ngul wik engkanang waa'-waa' thant, ngurp nungantam al-alantan, “Ngay mak Jerusalem.akan iiyāng, a' pam wanch wiyanganiya way-wayam anangan yump-yumpayn ngathara. Than pam pi'an Jews.antam al-alangan way yumpayn ngathar, than pam manth-thayan al-alangan a' puth than moom priestsantam al-alangana, a' pam pi'-pi'anam wiy al-alangan thampa. Amanamaniy-a, than mulathayn ngayang ngula, puth kinch ko'alamang ngulan wantow-a, ngaya mulaman koyam ekāng ngula.” 22A' anpalana nil Peter.angan pokkap kal nunang a' wak-wak nunang Jesus.anweya wik al-alantaman nilan waa'-waa' thant nungamangana. Nil thawant, “An ya'a, nil God.angan mak weekow nintanga than ke' yipam nintangan mulathayna. Aak way anangan nintan waa'an nungkamangan-a, ananganiya ke' wampow nungkarana, ya'a.” 23Puth nil Jesus.ana weent ngul a' Peter.antan thaw ngul, “Nint puy iiyāna! Petera! Nint wik nanangan thaw-thawangan ke' oony way pi'an Satan anana! Nint ke' ngayangan um thaamp-thaampangan ke'an yumpānga. Nan nint-nint kuchekangan ngaantam-ngeey-ngeeyangana, puth nila piip God.angana yimanangana ke'am ngaantam-ngeey-ngeeyana, ya'a!”
24A' nil Jesus.an thaw thant ngurp nungantam al-alantan, “Nil wee'-nathweya kaangk ngatharanganiy iiyowwey-a, nilaniya ke' ngaantam-ngeeyow nungantakamana, ya'a. Pam wanch al-alangan nath mulathayn nunanga, ke' ngayangan mulathayn, yuk wuuyanangan waanchayn ngayang. Nungkway than wiyangana nath mulathayn nunang-a, nilana ngayang anman monkan-wak-wakow. 25Nil wee'angwey wantow ngayangana pam wanch wiyangan ke' yipam mulathayn nunang-a, yaa, nilaniya ke' wuniy aak ngatharangana, ya'a; puth nil wee'anganwey anman ngangk thayanangam monkan-wak-wakow ngayangan-a, nungkway pam wanch wiyangana thaa'-thengkathiythan nunang-a, nath mulathiythan nunang-a, yaa, an nil ngangk aak umpuyam wunow aak ngatharangana. 26Pam wanch wiy anangan ma'mangkiy iiy-iiyantan, way min yot-yotam pi'-pi'antan aak inganiya. Puth ngay nathwey ke' kaling thanang aak ngatharamakanwey-a, an way min yot al-alangan ngangk min yumpiy thanang ey? An ya'a! Puth pam wanchanganiya yuk way min thanttam anangan thee'iythan nungant piip God.antan ey? nil yipam puthangkan kaliy thananga aak min nungantamakan ey? an ya'a! 27Ngay pam inman nil God.angan kuchanya. Ngay palaman yaam ke'anam wampāng thanttang ngaantiyongk ngatharam al-alantangan aak iikanakana. Ngay pam pi'an paththam wampānga, ke' piip ngatharam anman Goda. Aak an-aniyangan-a, piip ngatharamana min iiy-iiyow thant than minaman iiy-iiyantan; a' way iiy-iiyow thant than wayan iiy-iiyantana. 28Ngay inan kan-kanam waa'āng niiyanta: ngaya wunya niiyantamana pam pi'an paththam wampānga, moom pi'an king yimanangan wampāng niiyantana. Puth pam wanch wiy aak inman yippak wunaniy-a, man-yethaman iiy-iiyān aak ngulan wampowa, niiy mee' niiyamana ngul thathānwey ngayanganiya.”