MATTHEW
Lat Inan Matthew.angan Ump
Namp Inangan Wuut Mangk Nungantam Jesus Christ.antamana
11Namp inangan wuut mangk nungantam Jesus Christ.antamana. Nil Jesus.ana wuut mangk David alantaman wampa. Nil David.ana wuut mangk Abraham alantaman wampa. 2Nil Abraham.an piip nungantam Isaac.antama; nil Isaac.an piip nungantam Jacob.antama; nil Jacob.an piip nungantam Judah alantaman a' putha kuunch nungantam yot al-alantamana, piip niliya. 3Nil Judah.an piip pulantam Perez a' Zerah. Kaath pulantaman Tamar. Nil Perez.ana piip nungantam Hezron.antam; nil Hezron.ana piip nungantam Ram alantama; 4nil Ram.ana piip nungantam Amminadab alantamana; nil Amminadab.ana piip nungantam Nahshon alantaman; nil Nahshon.ana piip nungantam Salmon alantaman; 5nil Salmon.ana piip nungantam Boaz alantamana, kaath nungantamana nampa, Rahab. Nil Boaz.ana piip nungantam Obed alantaman; a' puth kaath nungantamana Ruth. Nil Obed.ana piip nungantam Jesse.antama; 6nil Jesse.ana piip nungantam King David.antama.
Nil David.ana piip nungantam Solomon.antama; kaath nungantamana, Bathsheba, nil ka'athaman wanch thum nungantam Uriah alantamana. 7Nil Solomon.ana piip nungantam Rehoboam alantamana; nil Rehoboam.ana piip nungantam Abijah alantamana; nil Abihaj.ana piip nungantam Asa alantaman. 8Nil Asa.aniya piip nungantam Jehoshaphat alantamana; nil Jehoshaphat.ana piip nungantam Jehoram alantamana; nil Jehoram.ana piip nungantam Uzziah alantamana; 9nil Uzziah.ana piip nungantam Jotham alantamana; nil Jotham.ana piip nungantam Ahaz.antam; nil Ahaz.ana piip Hezekiah.antam; 10nil Hezekiah.ana piip nungantam Manasseh.antama; nil Manasseh.ana piip nungantam Amon alantamana; nil Amon.ana piip nungantam Josiah alantamana; 11nil Josiah.ana piip nungantam Jehoiachin alantamana a' puth kuunch nungantam al-alantaman. Aak an-aniyangan than pam wayanang soldiers al-alangan Israelites anangan kenthin thanang aak thanttam anpalana, a' aak Babylon aakanakan kalin thanang ngula.
12Than kanan kalin thanang aak Babylon.akan-a, nil Jehoiachin.ana piip nungantam anan wun Shealtiel alantaman; nil Shealtiel.ana piip nungantama Zerubbabel alantaman. 13Nil Zerubbabel.ana piip nungantam Abiud.antama, nil Abiud.ana piip nungantam Eliakim alantam; nil Eliakim.ana piip nungantam, Azor.antama; 14nil Azor.ana piip nungantam Zadok alantamana; nil Zadok.ana piip nungantam Achim alantamana; nil Achim.ana piip nungantam Eliud.antam; 15nil Eliud.ana piip nungantam Eleazar.antam; nil Eleazar.ana piip nungantam Matthan alantaman; 16nil Matthan.ana piip nungantam Jacob.antama; nil Jacob.ana piip nungantam Joseph.antama; nil Joseph.ana, pam anan Mary.an ngentan, kaath Jesus.antaman -- nil Jesus inana Messiah.an waa'-waa'in nunang, puth nil God.angan kaa'ngak ngampangan kuchow nunangan aak iikanakan.
17Namp inanganiy wuut mangk Jesus.antamana. Aak anpalmana nil Abraham.an wun-a, aak-aakanakaman nil David ngulan wuna, wuut mangk fourteen anangaman iiyin. A' aak anpalmana nil David ngulan wuna, aak-aakanakaman than pam wanch Israelites.an kalin thanang aak Babylon.akana, aniy-a, wuut mangk fourteen puungk wiy ngul wun-wunin nungantamana a' aak an-aniyangan-a, aak-aakanakaman nil Jesus Christ.an aak-ngeey ngula, wuut mangk fourteen puungk wiy anangan ngul wunin nungantamana. A' niliya thaa'-koyyuw ngul wamp-wamp wuut mangk yot al-alantamanweya.
Wik Kath Inan Nil Jesus.an Aak-Ngeeya
18Wik kath inan nil Jesus.an aak-ngeeya. Nil kaath nungantaman Mary.an-a, pam kaa'ngakin nunang Joseph.ana, puth pulana karpam ke'am yippak wun-wunpul ya'a. Aak an-aniyangan nil Mary.an iimpanang ngul iiy-iiy. A' nil Joseph.angan thiichan nil iimpanangan iiy-iiy, nilan ngaantam-ngeeya ke' pam thonantang wuna, puth ya'a, nil Ngeen-Wiy Min God.antamangan kuchant puk manyana -- nil nanpalan iimpanang ngul iiy-iiya. 19Puth nil Joseph.ana ke'am yippak ngaantam-ngeey nil Ngeen-Wiy Min God.antamangan kuchant. Nil pam inman Joseph.ana nil pam min-minam paththam iiy-iiy, pam way ya'a, nilan ngaantam-ngeey nungantakaman, “Ngay wiyantan kaangk ke' waa'āng, ngay ke' pench-wayathing nunang mee' yotantangan. Ngay ma'-mupam anman too wantāng nunanga,” nilan yimanang ngaantam-ngeey nungantakaman. 20Amanamaniya nil Joseph.ana weep thayan ngul wun-wun, a' pith-pith ngul. Nilana yimanang pitha nil ngaantiyongk God.antam inpal kenyan uk nungant a' thaw nungant, “Ayyang Joseph-ang, kampan David.antam-ang, nint winynyang ke' mo'ān a! Nint Mary.ana ngentān nunang a' kalān nunang aak nungkaramaka. Nil Ngeen-Wiy Min God.antaman wamp nunganta ke'-paal nil iimpanangan iiy-iiyana. Pam wiyantam ya'a, puk many Ngeen-Wiy God.antama, nil kucha. 21Yaa, nint kan in ngeey a! Nil wanch ilangaman Mary.angana puk wuut many kalow. Nintaniya namp inan thee'ān nungant Jesusa, puth nil thonamang ilangaman pam wanch nungantam anangan ngul kaa'-piichanathow thanang way thanttam amanamana.”
22-23Aak keenkanamana nil God.an thaw nungant Isaiah.antan, “Wanch koman thonam pik ke'ananga ngul iimpanang iiyow a' puk wuut many ngul kalow. Thananiya namp inan thee'ayn nungant Immanuel. Namp inaniya wik ngamparamangan thawanamp yimananga, ‘Nil God inman ngamparanga.’ Nil pam prophet Isaiah alangan keenkanaman wik inangan lat ngench thayanangan umpa, wik inanganiy-a, kan-kanam ngul wampin.”
24A' nil Joseph.ana kan-ngul ek weepamana, a' Mary.ana kal nunang aawuch nungantamakan, ke' wik anman nil ngaantiyongkan thaw nungant. 25Mary.ang pul Joseph.angana karp ke'am yippak wunpul ya'a. Puk many kanan aak-ngeey-a, pulana karp ngul wunpul. Nil Joseph.angan-a, namp inan thee' nungant puk wuut many alantana Jesusa.