Namba bren blanga God
71Brom deya langa main drim aibin luk fobala einjul bin jandap langa detlot fobala kona blanga dijan kantri. Detlot fobala einjul bin holdimbek detlot win brom dijan kantri. Dei nomo bin larram eni win go thru langa dijan kantri en langa solwoda en langa eni tri, dumaji God bin gibit olabat pawa blanga ardim ola kantri en solwoda.aJeramaiya 49:36; Denyul 7:2; Sekaraiya 6:5
2Brom deya aibin luk najawan einjul bin kaminap brom sanraiswei, en imbin abum namba bren blanga ola pipul blanga det laibalawan God. Det einjul bin jingat brabli adbala langa detlot fobala einjul. 3“Yumob nomo ardim det kantri en solwoda en tri olabat. Wi garra pudum mak langa ola wekinmen blanga God basdam. Wi garra brendimbat olabat langa olabat forid, dumaji olabat blanga det God blanga wi.”bIsikiyel 9:4,6
4Brom deya deibin dalim mi det namba blanga detlot pipul weya deibin pudum det namba bren blanga God langa olabat forid. Bigmob 144,000 pipul brom ola klen langa Isreil. 5Deibin brendimbat ol dislot na. 12,000 brom det Juda klen, 12,000 brom det Rubin klen, 12,000 brom det Ged klen, 612-000brom det Esha klen, 12,000 brom det Neftali klen, 12,000 brom det Manesa klen, 712-000brom det Simiyan klen, 12,000 brom det Libai klen, 12,000 brom det Isaka klen, 812-000brom det Sebyulan klen, 12,000 brom det Josef klen, en 12,000 brom det Benjamin klen.
Bigmob pipul garram waitwan klos
9Brom deya aibin luk bigismob pipul. Deibin hipap detmatj nobodi nomo bin kaundimap olabat. Deibin ol difrin pipul brom ebri traib en ebri kantri en ebri langgus, en deibin ol jandap lida langa det speshal boswan tjeya, en deibin ol jandap lida langa det yangwan ship. Deibin ol werrimon longwan waitwan kout, en deibin ol holdimbat bushis brom pamtri langa olabat bingga, 10en deibin ol jingat adbala na, “Det sambodi weya im jidan langa det speshalwan tjeya, im na det God blanga wi. En det yangwan ship, wal dubala na bin seibum wi.”
11Wal detlot einjul bin ol jandap raidaran langa det speshalwan tjeya en raidaran langa detlot olmen en raidaran langa detlot 4 najakain enimul. En detlot einjul bin ol nildan garram olabat hed langa graun lida langa det speshalwan tjeya, en deibin weship God na. Deibin jingat gudwei langa im, 12“Yuwai! God im brabli haibala, en im gudbala, en im brabli sabibala, en im strongbala, en im garram pawa. Nobodi kaan bidim im. Nobodi kaan go oba langa im. Lagijat na olataim im jidan, olagijawan olagija. Yuwai! En melabat lafta gudbinji langa im en gibit theingks langa im en oldei lukbek langa im.” Lagijat na detlot einjul bin tok.
13Brom deya wan olmen brom detlot olmen bin askim mi, “Yu sabi dislot pipul iya weya dei werrimbat longwan waitwan klos? Yu sabi brom weya olabat bin kaman?”
14Wal aibin tok, “Najing. Mi nomo sabi. Maitbi yu sabi?”
Wal det olmen bin dalim mi, “Dislot pipul iya bin deya langa det bigwan trabul. En deibin go thru langa det trabul, dumaji deibin washim olabat klos. Deibin meigim olabat klos brabli waitwan garram det blad blanga det yangwan ship.cDenyul 12:1; Methyu 24:21; Mak 13:19 15En blanga tharran na olabat jandap deya lida langa det speshalwan tjeya blanga God, en dei oldei wek blanga God langa im serramoni pleis. Deitaim en naitaim dei oldei wek blanga im. En det sambodi weya im jidan langa det speshalwan tjeya garra maindimbat olabat brabliwei, dumaji olabat jidan langa im haus na. 16Olabat kaan hanggri blanga daga. En olabat kaan perrish blanga woda du. En wen olabat wek, det san kaan barnimbat olabat, dumaji det yangwan ship deya langa det speshalwan tjeya, im na garra maindimbat olabat imselp.dAisaiya 49:10 17Im garra deigim olabat langa gudbala kantri weya blendibala springwoda oldei jidan. En God kaan larram eni trabul meigim olabat kraikrai. Olabat garra jidan gudbinjiwei olagija na.” Lagijat na det olmen bin tok.eOla Saam 23:1,2; Aisaiya 25:8, 49:10; Isikiyel 34:23

a7:1: Jeramaiya 49:36; Denyul 7:2; Sekaraiya 6:5

b7:3: Isikiyel 9:4,6

c7:14: Denyul 12:1; Methyu 24:21; Mak 13:19

d7:16: Aisaiya 49:10

e7:17: Ola Saam 23:1,2; Aisaiya 25:8, 49:10; Isikiyel 34:23