Nyubala hebin en nyubala graun
211Brom deya langa main drim aibin luk nyubala hebin en nyubala graun. Det feswan hebin en det feswan graun bin binij na, en det solwoda bin binij du.aAisaiya 65:17, 66:22; Sekan Pida 3:13 2En aibin luk det nyubala kemp gulum Holi Taun. Tharran na det nyubala Jerusalem, en imbin kamdan brom God deya langa top. Imbin jis laiga yanggel wen im redi blanga midim im pramis.bAisaiya 52:1, 61:10; Rebaleishan 3:12
3Brom deya aibin lisin sambodi bin jingat adbala brom det speshalwan tjeya, “God garra jidanbat rait langa midul langa ola pipul na. Im garra jidan garram olabat, dumaji im bos blanga olabat, en olabat blanga im. God imselp garra jidan garram olabat,cLabidakas 26:11,12; Isikiyel 37:27 4en im garra meigim olabat gudbinji. Dei kaan kraikrai na. Nobodi kaan dai. Nomo enijing kaan ardimbat enibodi. Ol detkain ting binij na. Det olbalawei im binij.”dAisaiya 25:8, 35:10, 65:19
5Brom deya God bin tok na brom det speshalwan tjeya, “Mi na bin meigimbat ebrijing nyubala.” God bin kipgon tok langa mi, “Yu raidimdan dijan wed weya aibin tok, dumaji im brabli trubala. Im nomo laiyawan.”
6God bin kipgon tok, “Aibin binijim na. Wal dei gulum mi Olagijawan, dumaji mi det basdamwan en det binijimapwan du. If enibodi thestibala, wal ai garra gibit im friwan woda brom det spring weya meigim yu laibliwan.eAisaiya 55:1 7Detlot pipul hu nomo gobek, detlot pipul hu win, wal mi na God blanga olabat, en ai gulum olabat main pipul.fSekan Semyul 7:14; Ola Saam 89:26,27 8Ola najalot pipul garra jidan langa det bigbala faiya. Ol detlot pipul hu jidan bradinbala en ol detlot pipul hu nomo bilib langa mi en ol detlot pipul hu jidan nogudbala en ol detlot medra en ol detlot pipul hu oldei silipsilip garram enibodi en ol detlot laiyinbala en ol detlot pipul hu oldei dumbat olkain klebabala ting en ol detlot pipul hu oldei weshipbat enikain sheip, wal ol detlot pipul na garra jidan langa det bigbala faiya. Deya na dei garra dai sekantaim.” Lagijat God bin tok.
Nyubala Jerusalem
9Brom deya wan einjul bin kaman langa mi. Imbin brom detlot 7 einjul hubin abum detlot 7 dish garram detlot 7 laswan trabul. Imbin kaman langa mi, en imbin tok, “Yu kaman langa mi. Ai garra shoum yu det pramis blanga Jisas Krais, det nyubala Holi Taun Jerusalem.”
10Brom deya det Spirit blanga God bin teikoba langa mi, en det einjul bin deigim mi ontop langa brabli haibala hil, en deya na imbin shoum mi det Holi Taun Jerusalem. Aibin luk det taun bin kamdan brom top brom God.gIsikiyel 40:2 11Det taun bin brabli shainiwan garram lait brom God. Imbin shain jis laiga brabli klinwan glas en jis laiga purdiwan ston. 12Imbin abum bigwan haibala wol raidaran langa im garram 12 geit, en deibin abum 12 einjul maindimbat detlot geit. Langa ebri geit deibin abum neim blanga detlot 12 klen blanga Isreil. 13Detlot 3 geit bin jandap sanraisaid, 3 geit bin jandap sangodansaid, 3 geit bin jandap nowathsaid, en 3 geit bin jandap sauthsaid.h,13Isikiyel 48:30-35 14Det wol blanga det taun bin abum 12 strongbala ston langa graunwei, en detlot ston bin abum neim blanga detlot 12 speshalwan mishanri blanga Jisas.
15-16Wal det einjul hubin tok langa mi bin abum goldinwan rula blanga meshurum det taun en det wol en detlot geit. Det taun bin brabli bigwan garram 4 kona. Det einjul bin meshurum im na, en imbin faindim det taun bin lebul langa ebri said. Imbin 2,400 kilomita saidwei, 2,400 kilomita longwei, en 2,400 kilomita langa topwei du.i,16Isikiyel 40:3 17Det einjul bin meshurum det wol na, en imbin brabli haibala, 60 mita. Det einjul bin meshurum garram seimkain rula weya yunmi yusum.
18Wal deibin meigim det taun garram brabli klinbala gol jis laik glas. En deibin meigim det wol garram purdiwan grinwan ston. 19Deibin bildim det wol ontop langa 12 bigbala purdiwan ston. Det feswan ston bin grinwan, en det sekanwan ston bin bluwan, en det namba 3 ston bin bluwan garram olkainaba straipiwan kala, en det namba 4 ston bin brabli grinwan, 20en det namba 5 ston bin straipi yelawan, en det namba 6 ston bin brabli redwan, en det namba 7 ston bin goldin yelawan, en det namba 8 ston bin straipi grinwan, en det namba 9 ston bin brabli yelawan, en det namba 10 ston bin grinwan, en det namba 11 ston bin lilbit pepulwan, en det laswan ston bin brabli pepulwan. 21En deibin meigim det 12 geit garram 12 purdiwan pelbid. Ebri geit deibin meigim garram 1 bigiswan pelbid. En det roud langa det taun deibin meigim garram brabliwan gol. Det gol bin jis laik klinwan glas.jAisaiya 54:11,12
22Wal ai nomo bin luk eni serramoni pleis langa det taun, dumaji Jisas Krais en det strongbala haibala God, dubala na det serramoni pleis. 23En det san en mun dubala kaan gibit lait langa det taun, dumaji God imselp det lait blanga det taun. En Jisas Krais im lait blanga det taun du.kAisaiya 60:19,20 24En ola pipul langa dijan kantri garra wok langa det lait na, en ola boswan langa dijan kantri garra bringimap ola gudbala ting blanga olabat langa det taun.lAisaiya 60:3 25Dei kaan jadimap detlot geit blanga det taun deitaim. Detlot geit garra opin ol dei. En deya langa det taun dei kaan neba abum naitaim. 26Ola pipul ebriweya garra bringimap olabat gudbala ting deya langa det taun.m,26Aisaiya 60:11 27Nobodi kaan bringimap enijing nogudwan insaid langa det taun, en enibodi hu oldei dumbat nogudbala ting en oldei dalimbat laiya kaan gowin langa det taun. Oni detlot pipul hu garram olabat neim deya langa det buk blanga Jisas, langa det Buk Blanga Laif, oni olabat na garra gowin insaid langa det taun.nAisaiya 52:1; Isikiyel 44:9

a21:1: Aisaiya 65:17, 66:22; Sekan Pida 3:13

b21:2: Aisaiya 52:1, 61:10; Rebaleishan 3:12

c21:3: Labidakas 26:11,12; Isikiyel 37:27

d21:4: Aisaiya 25:8, 35:10, 65:19

e21:6: Aisaiya 55:1

f21:7: Sekan Semyul 7:14; Ola Saam 89:26,27

g21:10: Isikiyel 40:2

h21:12: ,13Isikiyel 48:30-35

i21:15: ,16Isikiyel 40:3

j21:18-21: Aisaiya 54:11,12

k21:23: Aisaiya 60:19,20

l21:24: Aisaiya 60:3

m21:25: ,26Aisaiya 60:11

n21:27: Aisaiya 52:1; Isikiyel 44:9