Bebalon bin binij
181Brom deya langa main drim aibin luk najawan einjul bin kamdan brom hebin. Imbin brabli haibala einjul, en wen imbin kamdan, imbin shain ebriweya langa dijan kantri jis laik deilait.
2Wal det einjul bin jingat adbala, “Binij na! Bebalon im binij na! Olkainaba dibuldibul jidanbat deya langa det pleis na. Olkainaba nogudwan spirit blandim olabat selp deya langa det pleis. Olkainaba nogudbala bard jidanbat deya langa det pleis du.aAisaiya 13:21, 21:9; Jeramaiya 50:39; 51:8; Rebaleishan 14:8 3Det taun im binij, dumaji ola pipul bin bulurrum det nogudbalawei. Im jis laik det taun bin gibit nogudbala wain langa ola pipul, en deibin dringgim det strongbala wain, binij. Deibin dumbat ola nogudbala ting na, dumaji det taun im jis laiga yanggel hubin trikimbat ola haibala bos en meigim olabat go rongwei. Ola shop menija brom ebri kantri bin meigim olabat selp brabli ritjwan langa det taun, dumaji ola pipul langa det pleis bin gridi blanga ebrijing.” Lagijat na det einjul bin tok.bAisaiya 23:17; Jeramaiya 51:7
4Brom deya aibin lisin sambodi bin jingat brom hebin, “Main pipul olabat! Yumob gidawei brom Bebalon! Yumob nomo joinin blanga dumbat detlot nogudbala ting. Yumob nomo stap deya langa im, dumaji detlot trabul garra kaman langa yumob du.cAisaiya 48:20; Jeramaiya 50:8, 51:6,45 5Deibin dumbat nogudbala ting langa det pleis detmatj. Im jis laik detlot nogudbala ting hipap brabli haibala raidap langa hebin, en God bin jinggabat detlot nogudbala ting na.dJenasis 18:20,21; Jeramaiya 51:9
6“Wal dei garra peiyimbek Bebalon blanga ol detlot nogudbala ting. Dei garra peiyimbek det taun garram detmatj trabul. Dei garra panishim det pleis tutaim.eOla Saam 137:8; Jeramaiya 50:29 7Dei garra gibit Bebalon loda trabul, en ola pipul blanga det pleis garra jidan brabli nogudbinji, dumaji deibin meigim olabat selp brabli haibala, en deibin gridi blanga olkain ting, en deibin kipgon tok, ‘Bebalon im boswan. Dijan pleis im nomo seim laiga widogel. Dijan taun kaan neba jidan nogudbinji.’ 8Wal blanga tharran na bigis trabul garra kaman langa det pleis. Det seim dei siknis garra kaman langa Bebalon, en bednyus garra kamat langa det taun, en ola daga garra ranat du. Afta na dei garra barnimap det pleis garram faiya. Lagijat na im garra hepin langa Bebalon, dumaji God im panishimbat det pleis na. Oni God na im boswan, en im brabli strongwan du.” Lagijat na det sambodi bin tok.f,8Aisaiya 47:7-9
9Wal detlot bos brom ola kantri hubin joinin langa ola nogudbala ting langa Bebalon, wen dei garra luk det smok kamat brom det taun weya im barnbarn, dei garra kraikrai blanga det pleis. 10Dei garra jandap longwei, dumaji dei garra bradin blanga go deya gulijap, en dei garra jingat na, “Luk! Bobala Bebalon! Det bigbala taun im binij na! Oni wanbala awa en deibin binijimap det pleis!”g,10Isikiyel 26:16,17
11Detlot shop menija brom ola kantri garra kraikrai en sori blanga Bebalon du, dumaji nobodi garra jidan deya na en baiyim enijing brom olabat.hIsikiyel 27:31,36 12Nobodi garra jidan deya en baiyim ola gol en silba en purdiwan ston en pelbid nekleis. Nobodi kaan baiyim ola pepulwan en redwan en waitwan en silkwan matiriyal blanga werrimon na. Nobodi deya na blanga baiyim ola enijing weya deibin meigim garram det speshal gudsmelwan wud en det purdiwan wud en detlot shainiwan boun blanga elafen en det aiyan en det strongwan aiyan en det mabul ston. 13Nobodi kaan baiyim ol detlot enijing weya deibin abum na, najing. Bigmob ting deibin abum. Olkainaba gudsmelwan stik blanga barnimbat, en gudsmelwan ointmen blanga rabum langa bodi, en olkainaba gud teist daga. Deibin abum gudwan daga, brabliwan wain en oliboil en flauwa. Bat nobodi kaan jidan deya na blanga baiyim enijing. Nobodi kaan baiyim ola buligi en nenigout en hosis en bagi en wekinmen en wekingel. Najing na, binij.i,13Isikiyel 27:12,13,22
14Wal detlot ritjwan shop menija garra tok, “Ol detlot gudbala ting weya deibin wandim langa det taun, olabat binij na. Ola mani blanga det pleis en ola gudbala enijing weya deibin hipap, olabat binij na. Dei kaan neba faindim detlot ting igin.” 15Detlot shop menija hubin meigim olabat selp ritjwan brom det taun garra jandap longwei, dumaji dei garra bradin blanga go deya gulijap, en dei garra kraikrai blanga det pleis,jIsikiyel 27:31,36 16en dei garra jingat na, “Luk! Bobala Bebalon! Det bigbala taun im binij na! Det taun bin werrimon gudwan klos, ola pepulwan en redwan klos. Det pleis bin werrimon ola shainiwan nekleis garram gol en purdiwan ston en pelbid. Bat najing na, binij! 17Oni wanbala awa en deibin binijimap ebrijing blanga det pleis!”
Langa solwodasaid ola boutmen en ola draiba blanga detlot bout en ola bos blanga detlot bout en ola fishamen en ola trebalamob, ol detlot na garra jandap longwei du.kAisaiya 23:14; Isikiyel 27:26-30 18Wen dei garra luk det smok kamat brom det bigbala taun weya im barnbarn, dei garra tok, “Nomo eni taun bin brabli bigwan seim laik det taun, bobala!”lIsikiyel 27:32 19En dei garra tjakambat graun langa olabat hed, en dei garra kraikrai nomo lilbit blanga det taun, en dei garra jingat, “Luk! Bobala det taun! Langa det bigbala taun na ola bigwan solwoda bout bin kaman. Deibin garrimap detmatj enijing blanga ola pipul langa det pleis, en ola boutmen olabat bin meigim miselp ritjwan. Bat oni wanbala awa en deibin binijimap det taun na, binij!”mIsikiyel 27:30-34
20Wal ol detlot pipul langa hebin garra jingat brabli gudbinjiwei na. Ola Kristjan pipul, ola speshalwan mishanri en ola speshalwan mesinja blanga God, ol detlot na garra brabli gudbinji, dumaji God bin panishim det nogudbala taun Bebalon na. Imbin panishim det Bebalon hubin oldei ardimbat olabat.nDyudaranami 32:43; Jeramaiya 51:48
21Brom deya wan strongwan einjul bin gajim det bigwan granding ston, en imbin tjakamdan det ston adbala rait langa midul langa solwoda, en wen imbin tjakamdan det ston lagijat, imbin tok, “Lagijat na dei garra tjakamdan dijan iya taun gulum Bebalon, en nobodi kaan luk langa det taun enimo na.oJeramaiya 51:63,64; Isikiyel 26:21 22Nobodi kaan lisin langa det gita en longwan wisul en bambu en olkain myusik langa det pleis enimo na. Nobodi kaan wek langa det pleis du na. Nobodi kaan meigimbat damba langa det taun enimo.pAisaiya 24:8; Isikiyel 26:13 23Nomo eni lait garra shain langa det taun igin. Nobodi garra merrit langa det pleis en abum padi langa det pleis igin. Detlot ritjwan shop menija blanga det taun bin brabli haibala langa ebri kantri. Bat najing na. Bebalon bin trikimbat ola najalot pipul en meigimbat olabat go rongwei. Bat najing na.” Lagijat na det einjul bin tok.q,23Jeramaiya 7:34, 25:10
24Wal God bin panishim Bebalon, dumaji imbin faindim det blad blanga ola Kristjan pipul en blanga ola speshalwan mesinja blanga im deya na. Bebalon na bin weistimbat olabat blad, nomeda langa wujan kantri deibin dai.rJeramaiya 51:49

a18:2: Aisaiya 13:21, 21:9; Jeramaiya 50:39; 51:8; Rebaleishan 14:8

b18:3: Aisaiya 23:17; Jeramaiya 51:7

c18:4: Aisaiya 48:20; Jeramaiya 50:8, 51:6,45

d18:5: Jenasis 18:20,21; Jeramaiya 51:9

e18:6: Ola Saam 137:8; Jeramaiya 50:29

f18:7: ,8Aisaiya 47:7-9

g18:9: ,10Isikiyel 26:16,17

h18:11: Isikiyel 27:31,36

i18:12: ,13Isikiyel 27:12,13,22

j18:15: Isikiyel 27:31,36

k18:17: Aisaiya 23:14; Isikiyel 27:26-30

l18:18: Isikiyel 27:32

m18:19: Isikiyel 27:30-34

n18:20: Dyudaranami 32:43; Jeramaiya 51:48

o18:21: Jeramaiya 51:63,64; Isikiyel 26:21

p18:22: Aisaiya 24:8; Isikiyel 26:13

q18:22: ,23Jeramaiya 7:34, 25:10

r18:24: Jeramaiya 51:49