Sebenbala dish garram trabul
161Brom deya langa main drim aibin lisin sambodi langa det serramoni pleis blanga God. Det sambodi bin tok adbala langa detlot 7 einjul, “Yumob go garram detlot 7 dish na, en yumob spilim detlot trabul langa ola kantri, dumaji God garra panishimbat ola nogudbala pipul.”
2Brom deya det feswan einjul bin go, en imbin spilimat im dish langa graun na, en olkain boil bin kamat langa detlot nogudbala pipul hubin abum det namba bren blanga det enimul. Detlot boil bin kamat langa ol detlot pipul hubin buldan en weship langa det sheip blanga det enimul.aEksadas 9:10
3Brom deya det sekanwan einjul bin spilimat im dish langa solwoda na, en det solwoda bin go blad. En det blad langa det solwoda imbin thikwan laiga ded pipul blad, en ebrijing weya bin jidan langa solwoda bin binij.
4Brom deya det namba 3 einjul bin spilimat im dish langa ola riba en springwoda na, en ola freshwoda bin go blad.bEksadas 7:17-21; Ola Saam 78:44
5Brom deya aibin lisin det boswan einjul blanga ola woda bin tok, “God, yu na brabli gudwan. Yubin iya longtaim, en yu stil jidan. En yu oldei gibit ebribodi feyago. Wal yubin jandim ol dislot trabul langa det kantri, dumaji ola pipul nogudwan. 6Deibin wandim detkain trabul, dumaji deibin oldei spilim det blad blanga ola Kristjan pipul en blanga ola speshalwan mesinja blanga yu. Wal yubin gibit olabat blad blanga dringgimbat na, dumaji deibin oldei spilim detmatj blad blanga yu pipul olabat. Yubin gibit feyago langa olabat.” Lagijat na det boswan einjul bin tok.
7Brom deya aibin lisin sambodi langa det teibul blanga ofring bin tok, “Yuwai, God. Yu brabli bigbala bos, en yu brabli haiwan du. Enijing weya yu dumbat blanga panishim detlot nogudbala pipul, wal im rait, dumaji yubin tok basdam yu garra duwit.”
8Brom deya det namba 4 einjul bin spilimat im dish langa det san na, en det san bin lau barnimbat ola pipul garram faiya. 9Ola pipul bin barnbarn detmatj brom tharran. Bat stil deibin kipgon sweya langa God en mokimbat im neim. Deibin sabi God bin abum pawa blanga meigim trabul blanga olabat. Bat dei nomo bin tenim olabat selp brom olabat nogudbalawei. Dei nomo bin tok gudwei langa God, najing.
10Brom deya det namba 5 einjul bin spilimat im dish na. Imbin spilimat det dish langa det speshalwan tjeya blanga det nogudwan enimul, en det kantri weya det enimul bin jidan bos bin go brabli dakbala. Ola pipul bin abum pein detmatj, en deibin baidimbat olabat ron tang.cEksadas 10:21 11Deibin sweya brabliwei langa God, dumaji im na bin ardimbat olabat en jandim detlot boil langa olabat. Bat stil dei nomo bin tenim olabat selp brom olabat nogudbalawei.
12Brom deya det namba 6 einjul bin spilimat im dish na. Imbin spilimat det dish langa det bigwan riba gulum Yufreitis Riba, en det riba bin go draiwan, en imbin meigim roud blanga detlot boswan hu garra kaman brom sanraiswei.dAisaiya 11:15
13Brom deya aibin luk thribala nogudwan spirit. Deibin jis luk laiga frog, en deibin kamat brom det dregan maus en brom det enimul maus en brom wan laiyawan mesinja maus. 14Detlot thribala spirit bin brabli nogudwan. Deibin brabliwan dibuldibul, en dei garra dumbat olkain klebabala ting, en dei garra go ebriweya langa ebri kantri en majurrumap ola boswan blanga fait langa God. En wen det rait taim garra kaman, dei garra abum det laswan fait langa God.
15-16Wal detlot thribala nogudwan spirit bin majurrumap ola boswan na. Deibin majurrumap olabat langa wanbala kantri, en garram det Hibru langgus dei gulum det kantri Amagedan.eMethyu 24:43,44; Luk 12:39,40; Rebaleishan 3:3
Wal Jisas bin tok, “Yu lisin langa mi na. Ai garra kaman jis laiga stilinbala. Yu kaan sabi wotaim stilinbala garra kaman langa yu kemp. Maitbi yu deigimatbat klos blanga silip, en det stilinbala kaman en deigidawei ol detlot klos, en neksdei yu garra sheim, dumaji yu wokaran neigidbala. If yu wandi jidan gudwei, wal yu garra kipgon wotjimbat yuselp, nomo silip.” Lagijat na Jisas bin tok.fSekan Kings 23:29; Sekaraiya 12:11
17Brom deya det namba 7 einjul bin spilimat im dish langa skai na, en streidawei sambodi bin jingat adbala brom det speshalwan tjeya langa det serramoni pleis langa hebin, “Binij na!”
18Brom deya laitining bin kamat ebriweya en thanda bin rorring. Imbin meigim brabli laudwan nois, en det graun bin sheik nomo lilbit. Imbin sheik en sheik en sheik detmatj. Det graun neba bin sheik lagijat bifo, najing.gRebaleishan 8:5, 11:13,19 19En det taun gulum Bebalon bin split thribalawei, en ola najalot taun langa ebri kantri bin buldan.
God bin jinggabat det bigwan taun, en imbin meigim brabli nogudwan trabul blanga det pleis. Imbin gibit ol detlot pipul langa det taun detmatj trabul, dumaji imbin brabli wail langa olabat.hAisaiya 51:17
20Wal ola ailin en ola bigwan hil bin ol gowei na. Pipul bin lukabat olabat, najing, kaan faindim.iRebaleishan 6:14 21Bat deibin faindim bigwan heilston jis laiga brabli bigwan ston bin buldan brom top. Deibin buldan jis laik rein ontop langa ol detlot pipul. Detlot pipul bin abum bigiswan trabul, en deibin sweya langa God blanga det trabul du.jEksadas 9:23; Rebaleishan 11:19

a16:2: Eksadas 9:10

b16:4: Eksadas 7:17-21; Ola Saam 78:44

c16:10: Eksadas 10:21

d16:12: Aisaiya 11:15

e16:15: Methyu 24:43,44; Luk 12:39,40; Rebaleishan 3:3

f16:16: Sekan Kings 23:29; Sekaraiya 12:11

g16:18: Rebaleishan 8:5, 11:13,19

h16:19: Aisaiya 51:17

i16:20: Rebaleishan 6:14

j16:21: Eksadas 9:23; Rebaleishan 11:19