Thed Jon
Det Leda Blanga Album Kristjan Pipul Jidan Trubalawei
1. Jon bin tok gudei (1:1 - 1:4)
2. Jon bin tok gudbalawei blanga Gaiyas (1:5 - 1:8)
3. Det nogudbalawei blanga Diyatrafis (1:9 - 1:10)
4. Yu garra bulurrum det gudbalawei (1:11 - 1:12)
5. Jon im tok gudbai na (1:13 - 1:15)



Thed Jon
Det Leda Blanga Album Kristjan Pipul Jidan Trubalawei
Jon bin tok gudei
1-2
Orait, mi na det olmen Jon, en mi raidimbat dijan leda langa main gudfren neim Gaiyas.
Wal main gudfren, mi laigim yu brabliwei, en ai sabi det filing insaid langa yu laif im jidan strongbala, en mi oldei askim God blanga meigim yu jidan strongbala langa yu bodi du, en mi oldei askim im blanga meigim ebrijing jidan gudwei blanga yu.a,2Eks 19:29; Romans 16:23; Fes Karinthiyans 1:14
3-4Wal ai sabi yu oldei bulurrumbat det trubalawan wed, en wen sambala Kristjan braja en sista blanga yunmi bin kaman iya, deibin dalim mi yu stil kipgon bulurrumbat det trubalawan wed brabliwei, en det nyus bin meigim mi brabli gudbinji. En im oldei meigim mi brabli gudbinji wen mi irrim detkain nyus blanga ol detlot Kristjan pipul hu jidan jis laik main ronwan biginini olabat.
Jon bin tok gudbalawei blanga Gaiyas
5Wal main gudfren, ai sabi wen ola Kristjan braja en sista blanga yunmi oldei go deya langa det pleis weya yu jidan, yu oldei meiksho yu oldei lukaftumbat olabat gudwei. Nomeda yu nomo sabi olabat, bat stil yu oldei lukaftumbat olabat.
6Wal wen detlot braja blanga yunmi bin kaman iya, deibin dalimbat ola Kristjan pipul iya langa dijan tjetj yubin laigim olabat detmatj.
7Wal ai dalim yu. Yu garra kipgon albumbat detlot braja blanga yunmi, en wen olabat redi blanga gowei langa najawan pleis blanga spredimat det gudnyus blanga Jisas Krais, yu garra jandimwei olabat gudbalawei wulijim yu garra meigim God gudbinji, dumaji dei dumbat det wek blanga Jisas Krais, en dei nomo askimbat detlot pipul hu nomo bilib langa im blanga albumbat olabat.
8Yu si? Ol wi Kristjan pipul garra album detlot braja blanga wi hu dumbat det wek en spredimatbat det gudnyus, dumaji wen wi album olabat lagijat, im jis laik wi joinin langa olabat en album olabat spredimatbat det trubalawan wed.
Det nogudbalawei blanga Diyatrafis
9Wal aibin jandim lilwan leda langa det tjetj deya weya yu jidan. Bat det men neim Diyatrafis oldei wandi meigim miselp bos langa det tjetj, en im nomo bin teiknodis langa det wed weya aibin tok langa det leda.
10Wal bambai wen ai kaman deya, ai garra dalim yu en ol detlot Kristjan pipul deya blanga ol detlot nogudbala ting weya im oldei dumbat. Im oldei dalimbat laiyawan stori blanga mi en blanga ol detlot Kristjan braja blanga wi hu oldei go en spredimatbat det gudnyus. Bat nomo oni tharran. Im nomo oldei jingat gudbinjiwei en welkam detlot Kristjan braja blanga wi wen dei oldei go deya, en im nomo larram detlot Kristjan pipul deya langa det tjetj welkam olabat du, en im oldei andimwei enibodi brom det tjetj if dei album olabat.
Yu garra bulurrum det gudbalawei
11Wal main gudfren, yu kaan bulurrum det nogudbalawei. Yu garra oldei bulurrum det gudbalawei, dumaji wen enibodi oldei dumbat gudbala ting, im jidan blanga God. Bat if im oldei dumbat nogudbala ting, wal im nomo sabi God.
12Wal ebribodi oldei tok gudbalawei blanga det najawan men deya neim Damitriyas, en det trubalawan wed blanga God shoum wi trubala det men jidan gudbalawei, en melabat tok gudbalawei blanga im du, en yu sabi melabat tok trubalawei blanga im.
Jon im tok gudbai na
13-14Wal ai garram bigmob wed blanga dalim yu. Bat ai kaan raidimdan langa peipa, dumaji ai wandi kaman dregli en dalim yu miselp.
15Wal mi askim God blanga meigim yu jidan gudbalawei.
Wal ola fren blanga yu hu jidan iya tok gudei langa yu, en yu garra tok gudei langa ola fren blanga melabat hu jidan deya du.
Binij na.

a1:1: ,2Eks 19:29; Romans 16:23; Fes Karinthiyans 1:14