Woning blanga ritj pipul
51Wal ol yumob ritj pipul, yumob lisin langa mi na. Yumob garra kraikrai, dumaji bigwan trabul garra kaman langa yumob, 2en ola gudwan enijing blanga yumob garra binijap. Ol detlot insek garra dagat ola gudwan klos blanga yumob, 3en ola gol en silba blanga yumob garra go rastiwan. En wen God garra jadjim yumob, ol detlot rastiwan gol en silba garra jidan pruf blanga yumob weya yumob bin bulurrum det nogudbalawei en bin oldei jidan gridiwan. Det gol en silba garra binij wen dei go rastiwan, en yumob garra binij du jis laik faiya garra barnimap yumob.aMethyu 6:19
Wal yumob brabli granggibala. Yumob kipgon hipimapbat detlot ritjwan enijing blanga yumob raidap det taim wen God garra kaman en jadjim yumob, 4en im garra nogud blanga yumob, dumaji yumob nomo peiyimbat detlot wekinmen blanga yumob. Nomeda dei kipgon jinginat langa yumob blanga peiyim olabat, bat stil yumob nomo oldei lisin langa olabat. Bat God det boswan blanga ebrijing lisinbat langa olabat weya dei jinginatbat.bDyudaranami 24:14,15
5Wal yumob bin meigim loda mani blanga abum gudtaim iya langa dijan kantri. En tharran na meigim yumob jis laiga buligi weya dei oldei fetinimap im raidap det rait taim garra kaman blanga kilim im. 6En im nogud weya yumob oldei deigim gudbala pipul langa kot, en afta yumob medrim olabat. Yumob oldei medrim detkain pipul weya oldei trai en stapam yumob.
Weidabat en prei
7Wal main braja en sista olabat, yumob nomo wandim slekbek. Yumob garra weit en jandap strongbala raidap Jisas Krais det bos blanga wi garra kambek.
Wal yumob jinggabat det fama. Wen im plentim ola sid langa graun, im kaan meigim det daga kamat streidawei. Im garra weit raidap det rein buldan blanga meigim det daga kamat. 8En lagijat na yumob garra weit en jandap strongbala, dumaji im gulijap taim blanga Jisas Krais det bos blanga wi garra kambek.
9Wal main braja en sista olabat, yumob nomo wandi pudum bleim langa yumob braja o sista blanga ola trabul weya yumob oldei abum. If yumob pudum bleim langa yumob braja o sista, wal God garra jadjim yumob en faindim yumob gilti. En aibin gibit yumob woning, dumaji God im redi blanga kambek en deigim wi langa kot.
10Wal main braja en sista olabat, yumob jinggabat detlot speshalwan mesinja hubin oldei tok blanga Jisas Krais det boswan. Nomeda deibin abum loda trabul, bat stil deibin weidabat en nomo slekbek, 11en deibin gudbinji brabliwei, dumaji dei nomo bin tenbek. Wi sabi tharran, en wi garra jidan lagijat du.cJob 1:21,22, 2:10; Ola Saam 103:8
Wal yumob jinggabat det stori blanga det olmen neim Job. Imbin kipgon weidabat en nomo gibap, en God bin oldei lukaftumbat im. En God garra oldei lukaftumbat wi lagijat du, dumaji im brabli soribala en kainbala.
12Wal main braja en sista olabat, yumob lisin langa mi na. Wen yumob tok enijing o meigim pramis, yumob nomo wandi yusum God neim eniwei blanga meigim det wed blanga yumob strongbala. Yumob nomo wandi yusum im neim o det neim blanga eni kantri o enijing blanga meigim det wed blanga yumob strongbala. Yumob garra jis tok streidat. Wen yumob wandi tok yuwai, wal yumob garra jis tok yuwai. En wen yumob wandi tok nomo, wal yumob garra jis tok nomo. If yumob yusumbat detlot najalot wed blanga bekimap det wed blanga yumob, wal God garra jadjim yumob blanga tharran, dumaji im nogud.dMethyu 5:34-37
13Wal if enibodi abumbat trabul, im garra prei langa God. En if enibodi gudbinji, wal im garra sing blanga gibit theingks langa God. 14En if enibodi sik, wal im garra askim ola tjetj lida blanga kaman langa im, en dei garra go langa im, en dei garra prei blanga im, en dei garra rabum im garram det oliboil, en dei garra yusum det neim blanga Jisas Krais det bos blanga wi blanga album det sikwan.eMak 6:13
15En wen dei prei lagijat en dei bilib brabliwei, wal Jisas Krais det bos blanga wi garra meigim det sikwan gudbala. En if det sikwan bin dumbat eni nogudbala ting, wal Jisas Krais det bos blanga wi garra meigim im fri brom ol detlot nogudbala ting.
16Wal yumob garra dalim miselp blanga eni nogudbala ting weya yumob bin dumbat, en yumob garra prei blanga yumob selp, en afta God garra meigim yumob gudbala, dumaji det preya blanga gudbala pipul im brabli strongbala.
17Wal yumob jinggabat det speshalwan mesinja neim Ilaija. Imbin seim laik wi, en wen imbin prei brabli strongbalawei blanga stapam det rein, fo thri en haf yiya nomo eni rein bin buldan langa det kantri.fFes Kings 17:1; 18:1 18En afta na imbin prei igin, en det rein bin buldan na, en ola daga langa det kantri bin gro igin.gFes Kings 18:42-45
19-20Wal main braja en sista olabat, yumob jinggabat na. Maitbi wanbala deya langa yumob bin gowei brom det trubalawei. En if enibodi bringimbek im brom im nogudbalawei, wal im seibum im brom det helfaiya, en God garra larramgo im fri brom ol detlot nogudbala ting weya imbin dumbat.hPrabebs 10:12; Fes Pida 4:8
Binij na.

a5:2-3: Methyu 6:19

b5:4: Dyudaranami 24:14,15

c5:11: Job 1:21,22, 2:10; Ola Saam 103:8

d5:12: Methyu 5:34-37

e5:14: Mak 6:13

f5:17: Fes Kings 17:1; 18:1

g5:18: Fes Kings 18:42-45

h5:20: Prabebs 10:12; Fes Pida 4:8