Hau wi garra jidan
131Wal ol yumob Kristjan pipul garra kipgon laigimbat miselp, 2en yumob garra oldei jingat langa streinja pipul en larram olabat jidan garram yumob. Wen sambala pipul bin dum lagijat, samtaim dei nomo bin oldei sabi deibin jingat langa einjul blanga stap langa olabat kemp.aJenasis 18:1-8, 19:1-3
3En yumob garra oldei jinggabat yumob Kristjan braja hu jidan langa jeilhaus jis laik yumob jidan deya du garram olabat, en yumob garra oldei jinggabat yumob Kristjan braja hu abumbat trabul jis laik yumob garram det trabul du.
4En yumob garra tridim det lowa blanga merrit raitwei, en ebri hasbin en waif garra jidan trubala langa dubala selp, dumaji God garra panishim det hasbin hu silip garram naja men waif en det waif hu silip garram naja gel hasbin, en im garra panishim detlot singulwan pipul hu silipsilipbat garram enibodi du.
5En yumob garra sedisfaid garram detlot ting weya yumob garram en nomo laigim mani detmatj, dumaji God bin tok, “Ai kaan libum yumob. Ai kaan gowei brom yumob.”bDyudaranami 31:6,8; Joshuwa 1:5 6Lagijat na God bin tok en blanga tharran na, wi garra meigim miselp strongbala blanga tok, “Det bos na oldei albumbat mi. Ai kaan bradin blanga enibodi, dumaji nobodi kaan dum enijing langa mi.” Lagijat na wi garra tok.cOla Saam 118:6
7En yumob garra oldei jinggabat ol detlot lida blanga yumob hubin oldei dalimbat yumob det wed blanga God. Yumob garra jinggabat hau deibin bilib en hau deibin jidan raidap deibin dai, 8en yumob garra bulurrum olabat, dumaji wi sabi Jisas Krais nomo tjeinjbat. Tudei im seim laik imbin jidan yestadei, en im garra jidan lagijat olagijawan.
9En yumob kaan larram olkain difrinwan wed deigidawei yumob brom det brabli trubalawei, en wi garra larram God meigim wi jidan strongbala insaid, dumaji im oldei albumbat wi. Wi kaan bulurrum olkain lowa blanga daga blanga meigim miselp jidan strongbala, dumaji det daga kaan album enibodi hu oldei dagadagat det daga.
10Wal wi nomo abum detkain lowa blanga daga, dumaji det kros na im det teibul blanga ofring weya det serramonimen blanga wi bin gibit det ofring, en ol detlot serramonimen hu oldei wek langa det olbalawan Serramoni Pleis kaan dagat det ofring blanga wi.
11Yumob sabi? Det boswan haibala serramonimen bin oldei deigim enimul blad jis insaid langa det Brabli Seikridwan Rum, en imbin oldei gibit det blad laiga ofring blanga larramgo enibodi fri brom ola nogudbala ting weya deibin oldei dumbat. Bat deibin oldei deigim det bodi blanga det enimul atsaid brom olabat kemp en barnimap deya.dLabidakas 16:27 12Yu si? Lagijat gin Jisas bin dai atsaid brom det taun blanga meigim ebribodi fri brom olabat nogudbalawei garram im ron blad.
13Wal wi garra go langa Jisas deya atsaid brom det kemp. Wi garra libum det olbalawei, en wi garra joinin garram det trabul weya Jisas bin abum. 14Yu si? Wi nomo garram pleis iya weya wi garra jidan olagijawan, dumaji wi lukabat det brabliwan pleis weya garra kaman bambai.
15
Wal wi garra oldei gibit theingks langa God, en det theingks im jis laiga ofring weya wi gibit langa im thru Jisas, en garram wi maus wi gibit det ofring en gulum im bos.
16En yumob garra oldei dumbat gudbala ting en album yumob Kristjan braja olabat, dumaji wen yumob dum lagijat, tharran na najawan ofring weya meigim God gudbinji.
17Wal yumob garra oldei lisin langa yumob tjetj lida en duwit langa olabat, dumaji dei oldei lukaftumbat yumob, en wandei God garra tjekap langa olabat. Wal if yumob lisin langa olabat, yumob garra meigim olabat gudbinji weya dei dumbat det wek. Bat if yumob nomo lisin langa olabat, yumob garra meigim olabat nogudbinji, en dei kaan album yumob.
18En yumob garra kipgon prei blanga melabat. Melabat sabi melabat garram gudwan filing nomo garram enijing rong, en melabat wandi dumbat ebrijing raitwei olataim.
19Wal mi askimbat yumob blanga prei brabliwei en askim God blanga jandimbek mi langa yumob.
20-21Wal wi sabi God bin meigim Jisas det bos blanga wi gidap laibala brom dedbala, dumaji Jisas bin weistim im blad blanga opinimap det nyubala wei blanga det olagijawan pramis, en im oldei lukaftumbat wi brabliwei jis laik det stakmen oldei lukaftumbat ola ship brabliwei, en wi sabi oni God gin meigim wi jidan gudbalawei.
Wal mi askim God blanga gibit yumob ebrijing yumob wandim, blanga dum wanim im wandim yumob blanga dum, en mi askim im blanga wek langa wi laif thru Jisas Krais en dum wanim meigim im gudbinji.
Wal Jisas Krais im na det haibalawan, en wi garra preisim im olagijawan. Yuwai. Lagijat na.
Im tok gudbai na
22Wal main braja olabat, mi askimbat yumob blanga lisin brabliwei langa dijan wed weya aibin raidimdan blanga meigim yumob jidan strongbala, dumaji dijan leda im nomo longwan.
23Wal deibin larramgo wi braja Timathi fri brom det jeilhaus, en if im kaman langa mi dregli, wal minbala garra kaman en luk yumob.
24Wal yumob garra dalim yumob tjetj lidamob melabat tok gudei langa olabat, en yumob garra dalim ola bilibamob lagijat du, en ola Kristjan braja blanga wi brom det kantri gulum Itali tok gudei langa yumob du.
25Wal mi askim God blanga jidan brabli kainbala langa yumob.
Binij na.

a13:2: Jenasis 18:1-8, 19:1-3

b13:5: Dyudaranami 31:6,8; Joshuwa 1:5

c13:6: Ola Saam 118:6

d13:11: Labidakas 16:27