Failiman
Leda Blanga Det Men Hubin Ranawei
1. Pol bin raidimdan leda langa Failiman (1:1 - 1:3)
2. Failiman laigim ola pipul brabliwei (1:4 - 1:7)
3. Pol askim blanga Onesamas (1:8 - 1:21)
4. Pol tok gudbai na (1:22 - 1:25)



Failiman
Leda Blanga Det Men Hubin Ranawei
Pol bin raidimdan leda langa Failiman
1
Orait, mi na Pol, en mi raidimbat leda langa main meit Failiman. Yunmi garram wanbala bos, en im neim Jisas Krais, en yunmi wekinmen blanga im.
Wal mi jidan iya langa jeilhaus, dumaji aibin dalimbat det gudnyus blanga Jisas Krais langa ola pipul. En yunmi braja Timathi, im iya garram mi weya mi raidimbat dijan leda langa yu, en im tok gudei langa yu.
2Wal ai nomo jandim dijan leda oni langa yu. Ai jandim dijan leda langa yu en langa det sista blanga yunmi du neim Afaiya, en ai jandim dijan leda langa ol detlot Kristjan pipul weya oldei abumbat miting deya langa det haus blanga yu, en ai jandim dijan leda langa det men neim Akapas du, dumaji im wekinmen blanga Jisas Krais jis laik yunmi.aKaloshans 4:17
3Wal God det dedi blanga wi en Jisas Krais det bos blanga wi garra brabli kainbala langa yumob, en dubala garra meigim yumob jidan brabli gudwei.
Failiman laigim ola pipul brabliwei
4-5Wal aibin gedim gudnyus blanga yu, Failiman. Deibin dalim mi yu laigim ola pipul blanga God brabliwei, en deibin dalim mi yu bilib brabliwei langa Jisas Krais det bos blanga wi.
Wal blanga tharran na mi oldei jinggabat yu ebritaim wen mi tok langa God, en mi oldei sei theingkyu langa God blanga yu. 6
Lagijat na mi oldei prei blanga yumob, “Dedi God, yu meigim ol detlot pipul toktok olataim blanga Jisas Krais, en yu growimap olabat en meigim olabat sabi brabliwei ola gudbala ting weya yu oldei gibit olabat.” Lagijat na mi oldei prei blanga yumob.
7Wal main braja Failiman, ai sabi yu laigim ola pipul blanga God brabliwei, en tharran na meigim mi brabli gudbinji, en im meigim mi strongbala blanga kipgon wek blanga God. Nomo oni mi, bat ol detlot najalot pipul du hu bilib langa Jisas. Yubin meigim melabat holot brabli gudbinji blanga God.
Pol askim blanga Onesamas
8Wal Failiman, nomeda Jisas Krais bin meigim yunmi braja gija, bat stil mi jidan bos blanga yu, en ai gin dalim yu streidat blanga dum enijing, en yu garra dum. 9Bat ai nomo wandim fosim yu blanga dum enijing. Ai garra jis askim yu, dumaji mi laigim yu. En ai garra askim yu, dumaji mi olmen, en mi jidan iya langa dijan jeilhaus, dumaji mi wekinmen blanga Jisas Krais.
10Wal ai garra askim yu blanga yu wekinmen neim Onesamas, dumaji yubin baiyim im garram mani basdam. Bat im jis laik main ronwan san, dumaji nomeda mi jidan iya langa dijan jeilhaus, bat stil aibin album im, en imbin bilib langa Jisas Krais. En blanga tharran na mi jis laiga dedi blanga im.bKaloshans 4:9
11Wal bifo wen imbin jidan wekinmen blanga yu, im nomo bin wek gudbalawei blanga yu. Bat tudei im brabli gudwan wekinmen blanga yunmi.
12Wal nomeda minbala Onesamas jidan jis laiga wan femili iya langa dijan jeilhaus, bat stil ai garra jandimbek im langa yu. 13Ai laigim im detmatj, en aibin wandi kipum im iya langa dijan jeilhaus garram mi. Mi jidan iya, dumaji aibin dalimbat det gudnyus blanga Jisas Krais langa ola pipul, en aibin wandim Onesamas blanga deigim pleis blanga yu en albumbat mi iya langa dijan jeilhaus, bat ai lafta jandimbek im langa yu na.
14Wal yu gin album mi if yu wandim, Failiman. Bat ai nomo fosim yu. Aibin wandi kipum Onesamas iya garram mi. Bat yu na bos blanga im, en yu nomo bin dalim mi blanga kipum im. 15Bifo imbin ranawei brom yu lilwail, bat tudei na yu garra abumbek im olagija. 16Ai laigim im nomo lilbit. Bat yu garra laigim im mowa igin, dumaji im nomo oni wekinmen blanga yu. Im Kristjan braja blanga yu na.
17Failiman, yunmi gud fren. Wal yu deigimbek Onesamas, en yu tridim im gudwei jis laik yubin tridim mi.
18Nomeda imbin dum nogudbala ting langa yu en im owim yu mani, wal yu pudumdan langa main neim, 19en ai garra peiyimbek yu ebrijing weya im owim yu. Yu luk main neim iya langa dijan peipa? Wal mi na, Pol, mi raidimdan main neim iya langa dijan leda garram main ron bingga.
Failiman, yu bilib langa Jisas Krais. Wal hubin dalimbat yu det gudnyus blanga im? Mi na, indit? 20Wal main braja, wotabat yu duwit langa mi weya aibin askim yu blanga deigimbek yu wekinmen. If yu deigimbek im gudwei, wal yu garra meigim mi brabli gudbinji blanga Jisas Krais. 21En ai sabi yu garra duwit langa mi wen mi jandim dijan leda langa yu. Ai sabi yu garra lukaftumbat det wekinmen gudwei.
Pol tok gudbai na
22Wal wanmo ting. Yu garra meigim wanbala rum redi blanga mi, dumaji God garra lisin langa yumob wen yumob tok langa im blanga mi, en im garra album mi blanga kamat brom dijan jeilhaus, en afta ai garra kaman deya langa yumob.
23Wal det men neim Apefras im jidan iya langa dijan jeilhaus garram mi, dumaji imbin dalimbat det gudnyus blanga Jisas Krais du. En im sei gudei langa yumob.cKaloshans 1:7; 4:12 24En detlot najalot wekinmen blanga mi neim Mak, Aristakas, Dimas en Luk, olabat sei gudei langa yumob du.dEks 12:12,25; 13:13; 15:37-39; 19:29; 27:2 Kaloshans 4:10,14; Sekan Timathi 4:10,11
25Wal Jisas Krais det bos blanga wi garra kain langa yumob.
Binij na.

a1:2: Kaloshans 4:17

b1:10: Kaloshans 4:9

c1:23: Kaloshans 1:7; 4:12

d1:24: Eks 12:12,25; 13:13; 15:37-39; 19:29; 27:2 Kaloshans 4:10,14; Sekan Timathi 4:10,11