Det brabli wikitwan men
21Wal main braja olabat, wen Jisas Krais det bos blanga wi garra kambek, im garra majurrumap wi langa im.
Wal yumob irrim mi na.aFes Thesaloniyans 4:15-17 2If enibodi dalim yumob, Jisas Krais bin kambek olredi, yumob kaan bilib det wed. Yumob kaan nogudbinji streidawei. Maitbi dei reken det Holi Spirit bin gibit melabat det wed, o maitbi dei reken melabat bin toktok det wed, o maitbi dei reken melabat bin raidimdan det wed langa leda. 3Najing. Dei dalimbat laiya, en yumob kaan bilib det wed. Yumob kaan larram enibodi trikim yumob, dumaji im nomo taim blanga Jisas Krais garra kambek yet. Det rait taim garra kaman afta wen loda pipul garra tenawei brom God, en det rait taim garra kaman afta det brabli wikitwan men garra kamat. Jisas Krais garra binijimap det men. 4Bat det men garra meigim miselp bos langa ebrijing basdam. Im garra meigim miselp bos langa ola drimin en langa enikain ting weya pipul oldei bulurrumbat, en im garra go en jidan langa det Serramoni Pleis blanga God deya langa Jerusalem, en im garra gulum miselp God.bDenyul 11:36; Isikiyel 28:2
5Wal wotfo yumob nomo jinggabat ol detlot ting weya aibin dalimbat yumob wen aibin deya langa yumob? 6-7Yumob sabi wanim garra hepin, en yumob sabi samting deya im nomo oldei larram detlot ting hepin yet. Bat Seitin im olredi deya, en im meigimbat ola pipul nomo wandim teiknodis langa det lowa blanga God. Det brabli wikitwan men garra kamat wen im det rait taim. Bat detlot ting kaan hepin raidap God garra deigidawei det samting hubin holdimbek detlot ting. 8-10Bambai wen God garra deigidawei det samting, det taim na det brabli wikitwan men garra kamat, en im garra kaman garram pawa brom Seitin, en im garra dumbat olkain klebabala ting, en im garra yusumbat olkain laiyawan stori en ekshan blanga meigim ola pipul bulurrum im.
Bat wen Jisas Krais det boswan garra kaman, im garra jis tok garram im maus, en im garra kilim det brabli wikitwan men ded, en det brabli shainiwan lait blanga Jisas Krais garra binijimap det wikitwan men brabliwei. En ol detlot pipul hubin bulurrumbat det wikitwan men garra dai du, dumaji dei nomo bin bulurrum det trubala wed.cAisaiya 11:4; Methyu 24:24 11God bin yusum im ron pawa blanga meigim olabat jinggabat eniwei, en afta deibin bulurrum det brabli wikitwan men. 12Ol detlot pipul hu nomo bin bulurrum det trubala wed bin laigim dumbat ola nogudbala ting. En God garra panishim ol detlot pipul. Im kaan seibum olabat.
God bin pikimat yu
13
Wal main braja olabat, det bos blanga wi laigim yumob, en melabat garra oldei gibit theingks langa God blanga yumob, dumaji God bin pikimat yumob en ola najalot Kristjan pipul basdam wen imbin meigim ebrijing, en imbin seibum yumob. Det Holi Spirit blanga God bin kadimat yumob blanga im, en seimtaim yumob bin bilib det trubala wed blanga im. 14God bin jingat langa yumob garram det gudnyus weya melabat bin dalimbat yumob, en imbin jingat langa yumob, dumaji im wandi preisim yumob jis laik wi preisimbat Jisas Krais det bos blanga wi.
15Wal main braja olabat, yumob garra jandap strongbala. Yumob garra kipgon bulurrumbat det trubala wed weya melabat bin lenimbat yumob. Melabat bin lenimbat yumob det trubala wed wen melabat bin tok langa yumob en wen melabat bin raidimdan leda langa yumob.
16Wal Jisas Krais det bos blanga wi bin laigim wi, en imbin brabli kainbala langa wi, en imbin oldei album wi en meigim wi trastim God brabliwei. Wal melabat askim im en God det dedi blanga wi blanga album yumob. 17Melabat askim dubala blanga meigim yumob strongbala blanga kipgon dumbat ola gudbala ting en blanga kipgon toktok ola gudbala wed.

a2:1: Fes Thesaloniyans 4:15-17

b2:4: Denyul 11:36; Isikiyel 28:2

c2:8-10: Aisaiya 11:4; Methyu 24:24