Hau God wandim wi blanga jidan
41Wal main braja olabat, wanmo ting ai wandi dalim yumob. Melabat bin lenim yumob hau God wandim yumob blanga jidan blanga meigim im gudbinji. En ai sabi yumob oldei jidan lagijat. Bat melabat garra kipgon dalimbat yumob blanga kipgon jidan seimwei laik God wandim yumob blanga jidan.
2Wal yumob sabi melabat nomo bin tok langa yumob brom melabat ron maus. Jisas Krais det bos blanga wi bin dalim melabat wanim blanga tok langa yumob. En lagijat na melabat bin tok. 3God im wandim yumob blanga jidan brabli gudwei en nomo silipsilipbat nogudbalawei garram enibodi, 4en ola men garra jidan brabli gudbala en trubalawei garram olabat ronwan waif, 5en dei kaan gridi blanga deigidawei enibodi. Ol detlot pipul hu nomo sabi God oldei dumbat detkain nogudbala ting. 6Bat ola Kristjan pipul kaan dum detkain nogudbala ting langa olabat braja en meigim rong langa im.
Wal melabat bin dalim yumob dijan basdam, en brabliwei melabat bin gibit yumob woning blanga diskain ting, dumaji det boswan blanga wi garra panishim detlot pipul hu dumbat detkain ting. 7God nomo bin jingat langa wi blanga meigim wi jidan nogudbalawei. Imbin jingat langa wi blanga meigim wi jidan brabli gudbalawei, 8en if enibodi kaan duwit langa dijan wed, wal im rabishim God. Im nomo rabishim men. Im rabishim God hubin gibit yumob im Holi Spirit.
9Wal ai kaan dalim yumob enijing blanga hau yumob garra laigim yumob braja olabat, dumaji God na bin lenim yumob, 10en ai sabi yumob laigim yumob braja olabat ebriweya langa det kantri gulum Mesadoniya. En nomeda yumob laigim olabat, bat stil ai garra dalimbat yumob blanga laigim olabat mowa strongbalawei.
11Wal main braja olabat, yumob garra trai en jidan gudbalawei en nomo meigim eni trabul, en yumob kaan go en pudum miselp langa enibodi bisnis.
En yumob garra wek blanga yumob ron daga en enijing, dumaji yumob nomo wandi fosim enibodi blanga lukaftumbat yumob. 12Melabat bin dalimbat yumob ol detlot wed bifo, en wen ol detlot pipul hu nomo bilib langa Jisas Krais garra luk hau yumob oldei jidan gudbalawei lagijat, dei garra rispek langa yumob brabliwei.
Jisas garra kambek
13Wal main braja olabat, melabat wandim yumob garra sabi wanim garra hepin langa detlot bilibamob hubin dai, dumaji melabat nomo wandim yumob garra nogudbinji en sori miselp blanga olabat seimwei laik ol detlot pipul hu nomo sabi God. 14Wi bilib Jisas bin dai en afta imbin gidap laibala brom dedbala en bambai im garra kambek blanga gajim ola bilibamob. En wi bilib ol detlot bilibamob hubin dai garra gidap laibala brom dedbala du en God garra meigim olabat go langa top garram Jisas.
15Wal det bos blanga wi bin dalim melabat dijan wed weya melabat dalimbat yumob. Wen Jisas garra kambek, ol detlot bilibamob hu stil jidan laibala iya langa graun kaan gowap lida bifo detlot bilibamob hubin dai. 16Lagijat na im garra hepin. Sambodi garra jingat adbala, en det brabli haibala einjul garra jingat, en det wisul blanga God garra jingat adbala du, en afta det bos blanga wi garra kamdan brom hebin, en detlot bilibamob hubin dai garra gidap laibala brom dedbala basdam, 17en afta ol detlot bilibamob hu stil jidan laibala garra gowap garram olabat garram ola klaud, en deya na wi garra midim det bos blanga wi langa skai, en afta wi garra oldei jidan garram det bos.aFes Karinthiyans 15:51,52
18Wal main braja olabat, yumob garra oldei kipgon dalimbat miselp dijan wed blanga meigim miselp gudbinji.

a4:15-17: Fes Karinthiyans 15:51,52