Falipiyans
Det Leda Blanga Album Kristjan Pipul Blanga Oldei Luk Langa Jisas
Pol bin raidimdan dijan leda
11
Det taun gulum Filapai
Orait, mi na Pol, en mi wekinmen blanga Jisas Krais, en mi raidimbat dijan leda garram det najawan wekinmen blanga mi neim Timathi.
Wal mi raidimdan dijan leda langa ola tjetj lidamob en langa ola tjetj wekinmen deya langa det taun gulum Filapai, en dijan leda im blanga ola pipul deya hubin joinap garram Jisas Krais.aEks 16:12
2Wal God im dedi blanga wi, en Jisas Krais im bos blanga wi, en minbala Timathi wandim dubala garra brabli kainbala langa yumob en lukaftumbat yumob en meigim yumob jidan gudbalawei.
Pol bin oldei prei
3
Wal ebritaim wen mi oldei jinggabat yumob, mi oldei gibit theingks langa God blanga yumob. 4-5En ebritaim wen mi prei blanga yumob, mi oldei prei gudbinjiwei, dumaji yumob bin oldei albumbat mi dalimbat det gudnyus brom det taim wen yumob bin bilib raidap tudei.
6Wal God bin stat dumbat gudbala wek insaid langa yumob hat, en ai sabi im garra kipgon wek langa yumob laif raidap Jisas Krais garra kambek, en det taim na im garra binijim det wek.
7Wal mi oldei jinggabat yumob, en mi oldei abum det insaid filing blanga yumob, en im rait blanga mi blanga abum detkain filing blanga yumob, dumaji yumob bin oldei joinin garram mi langa det speshalwan wek weya God bin gibit langa mi. Nomeda mi jidan iya langa jeilhaus, bat stil yumob oldei joinin garram mi langa det wek seimwei laik yumob bin oldei joinin garram mi wen ai nomo bin jidan langa jeilhaus. Aibin oldei shoum ola pipul det gudnyus im trubala, en aibin album olabat bilib brabliwei du, en yumob bin oldei albumbat mi garram det wek.
8Wal God im witnis blanga mi. Trubala ai dalim yumob. Det insaid filing blanga main im kaman brom Jisas Krais imselp. 9En mi oldei prei langa God en askim im blanga meigim yumob laigim yumob braja olabat mowa en mowa ebridei, 10en mi askim im blanga meigim yumob sabi wanim trubala en wanim rait en rong wulijim yumob garra sabi wanim gudbala blanga meigim miselp jidan brabli gudbalawei, nomo garram enijing rong langa yumob wen Jisas Krais garra kambek.
11Wal yumob garra oldei jidan gudbalawei lagijat na. Bat yumob kaan meigim miselp jidan lagijat. Oni Jisas Krais na gin meigim yumob jidan lagijat. En im meigim yumob jidan lagijat blanga shoum ola pipul God im brabli haibala, en im dum lagijat blanga meigim ola pipul preisimbat God.
Hau blanga jidan blanga Jisas Krais
12Wal main braja olabat, ai wandim yumob garra sabi dijan trabul weya mi abum tudei bin meigim det gudnyus spredat mowa en mowa, 13en ol detlot solja hu oldei lukaftumbat det haus blanga det king en ol detlot najalot pipul olabat sabi mi jidan iya langa dijan jeilhaus garram tjein langa main fut dumaji mi wekinmen blanga Jisas Krais,bEks 28:30 14en wen main braja olabat bin irrim mi jidan iya langa dijan jeilhaus, Jisas Krais det bos blanga wi bin meigim olabat jidan brabli strongbala, en dei nomo bin bradin blanga kipgon dalimbat ebribodi det gudnyus blanga Jisas Krais.
15-16Wal sambala pipul dalimbat det gudnyus garram det gudwan filing, dumaji dei laigim God brabliwei, en dei sabi God bin gibit mi det wek blanga shoum ebribodi det gudnyus im trubala.
Bat ai sabi sambala pipul dalimbat det gudnyus dumaji dei jelas langa mi en dei oldei wail langa mi. 17Dei nomo dalimbat det gudnyus garram gudwan filing. Dei dalimbat det gudnyus dumaji dei wandi meigim miselp haibala, en dei reken dei garra meigim mowa trabul blanga mi weya mi jidanbat iya langa dijan jeilhaus.
18Wal nomeda sambala pipul dalimbat det gudnyus lagijat, bat mi stil gudbinji, dumaji dei dalimbat det gudnyus blanga Jisas Krais. Nomeda pipul dalimbat det gudnyus garram det gudwan filing o garram det nogudwan filing, bat ai garra stil kipgon jidanbat gudbinjiwei. 19En mi gudbinji du, dumaji ai sabi yumob oldei prei blanga mi, en ai sabi det Spirit blanga Jisas Krais garra album mi, en ai sabi det preya blanga yumob en det Holi Spirit garra meigim mi fri brom dijan trabul weya mi jidan iya langa dijan jeilhaus.
20Wal nomeda wanim garra hepin langa mi, bat stil ai nomo wandi sheim blanga enijing weya mi dumbat.
Trubala ai dalim yumob. Tudei en ebridei ai wandi jidan brabli strongbala en nomo bradin blanga enibodi. En nomeda dei kilim mi ded o larram mi jidan laibala, bat stil ai wandi kipgon meigimbat pipul sabi Jisas Krais im brabli haibala.
21Dumaji wotfo wi garra jidan laibala? Ai reken ai garra jidan laibala blanga Jisas Krais. En if dei kilim mi ded, wal im mobeda blanga mi.
Yumob sabi wotfo? 22-23If dei nomo kilim mi ded, wal ai garra kipgon dumbat det gudbala wek blanga Jisas Krais. Bat if ai dai, wal ai garra go en jidan garram im.
Wal ai nomo sabi wanim ai wandim. Det filing main im ol miksap, dumaji im mobeda blanga mi if ai dai en go en jidan garram Jisas Krais. 24Bat im mobeda blanga yumob if ai kipgon jidan laibala.
25Wal ai sabi dei kaan kilim mi ded, dumaji im mobeda mi jidan laibala en album yumob bilib mowa strongbalawei en jidan brabli gudbinjiwei. 26Ai sabi ai garra kipgon jidan laibala, dumaji ai garra kaman langa yumob en meigim yumob sabi trubala God bin maindimbat mi, en tharran na garra meigim yumob preisimbat Jisas Krais detmatj.
27Wal det gudnyus blanga Jisas Krais dalim yumob hau blanga jidan, en nomeda wanim garra hepin langa mi, bat stil yumob garra jidan gudbalawei jis laik det wed dalimbat yumob blanga jidan. Maitbi ai garra kaman en luk yumob. Ai nomo sabi. Bat if yumob jidan gudbalawei jis laik det wed dalimbat yumob blanga jidan, wal ai garra irrim det nyus weya yumob kipgon jidanbat wan pipul brabliwei en yumob adwek blanga meigim miselp bilib strongbalawei jis laik det gudnyus dalimbat yumob.
28Wal ai sabi yumob bilib langa Jisas Krais. En ai sabi sambala pipul nomo laigim yumob dumaji yumob bilib langa im. Bat yumob kaan bradin blanga detlot pipul. Yumob garra oldei jidan strongbala, en wen detlot pipul luk yumob jidan lagijat, dei garra sabi dei kaan bidim yumob, en dei garra sabi God na garra meigim yumob win.
29Wal im garra hepin lagijat langa yumob, dumaji God bin pikimat yumob blanga meigim yumob bilib langa Jisas Krais, en imbin pikimat yumob blanga abum trabul blanga im du. 30Yumob bin luk aibin abum trabul blanga det gudnyus wen aibin deya garram yumob, en stil tudei yumob bin irrim ai garram trabul blanga det gudnyus.
Wal yumob sabi na? Yumob garra abum trabul du, dumaji yumob bulurrumbat Jisas Krais.cEks 16:19-40

a1:1: Eks 16:12

b1:13: Eks 28:30

c1:30: Eks 16:19-40