Mami en dedi en ola biginini olabat
61-2Wal ola biginini olabat garra duwit langa olabat mami en dedi, dumaji olabat blanga Jisas Krais det bos blanga wi, en im rait ting blanga duwit langa mami en dedi, dumaji langa oltestaman im tok, “Yu garra lukbek langa yu dedi en mami.”a,2Kaloshans 3:20 3En det lowa bin abum det feswan pramis du weya im tok, “If yu rispek en teiknodis langa yu mami en dedi, wal God garra meigim yu jidan gudbalawei, en yu garra jidan longtaim langa det kantri weya God garra gibit langa yu.”b,3Eksadas 20:12; Dyudaranami 5:16
4En ola mami en dedi garra tridim olabat biginini gudwei en nomo meigim olabat gitwail, en dei garra growimap olabat gudbalawei en panishim olabat raitwei en titjimbat olabat hau blanga jidanbat laik Jisas Krais det bos wandim olabat blanga jidan.cKaloshans 3:21
Ola wekinmen en olabat bos
5Wal ola wekinmen en ola wekingel hu jidan laiga prisana garra duwit langa ola bos blanga olabat, en dei garra rispek olabat bos en duwit brabliwei jis laik dei wek blanga Jisas Krais. 6-7Dei kaan wek nogudwei wen olabat bos nomo deya. Dei garra wek gudwei olataim. Bat dei kaan wek gudwei blanga meigim olabat bos gudbinji blanga olabat. Dei garra wek gudwei blanga meigim God gudbinji, dumaji dei dumbat det wek blanga det bos Jisas Krais, 8en dei garra jinggabat wanim det bos garra du. Bambai im garra gibit prais langa ebribodi blanga ola gudbala wek weya deibin dumbat. Nomeda olabat jidan wekinmen laiga prisana o wekinmen weya jidan fri, bat stil dei garra gedim det prais brom Jisas Krais.dKaloshans 3:22-25
9En ola bos garra tridim olabat wekinmen en wekingel gudwei du, en dei kaan yusum raf wed langa olabat, dumaji olabat sabi dei garram det seimwan bos langa hebin hu jidan bos blanga ola wekinmen en wekingel blanga olabat, en det bos na garra jadjim ebribodi seimwei bambai.eDyudaranami 10:17; Kaloshans 3:25; 4:1
Detlot speshalwan klos blanga ola Kristjan pipul
10Wal wanmo ting ai garra dalim yumob. Yumob garra meigim miselp strongbala garram Jisas Krais det bos blanga wi en garram det brabli strongbala pawa blanga im, 11en yumob garra yusum ola ting weya God oldei gibit langa yumob blanga bidim det boswan dibuldibul en ola nogudwan trik blanga im. 12Yumob garra yusum ol detlot ting blanga God jis laiga solja weya im yusum ola ting blanga fait. Bat wi nomo fait langa pipul. Wi oldei fait langa ola dibuldibul en langa ola nogudwan spirit en langa ol detkain ting weya kamat brom dakbala en meigim miselp bos.
13Wal yumob garra oldei werrimon detlot ting brom God jis laik det solja weya im oldei werrimon detlot speshalwan klos blanga fait, en if yumob jidan redi lagijat ebridei, wal wen det dibuldibul kaman langa yumob blanga trai en deigidawei yumob, yumob garra jidan redi blanga det fait garram im, en yumob garra bidim im en nomo nokap.
14Wal ol dislot ting na yumob garra werrimon jis laik det speshalwan klos blanga fait. Det trubala wed blanga God im jis laiga belt weya meigim ebrijing fit, en yumob garra werrimon det belt brabliwei. En yumob garra oldei dum ebrijing raitwei du, dumaji wen yumob jidan lagijat, im jis laik yumob werrimon det speshalwan shet weya enijing kaan ardim yu insaid langa hat.fAisaiya 11:5; 59:17 15En yumob garra oldei jidan redi blanga go en dalimbat det gudnyus, dumaji det gudnyus na garra meigim pipul jidan gudwei. En yumob garra jidan redi jis laik det solja weya im oldei werrimon im but redi blanga fait.gAisaiya 52:7 16En yumob garra oldei bilib brabliwei en nomo larram enijing brom det boswan dibuldibul tatjim yu jis laik det solja weya im yusum det shild blanga stapam enijing weya det enami tjakambat langa im. 17En yumob garra oldei jinggabat weya God im seibum yumob, dumaji wen yumob jinggabat lagijat, im jis laik det speshalwan het weya det solja oldei werrimon blanga stapam enijing brom kilimbat im langa hed. En yumob garra garrimap det wed blanga God langa yumob main, dumaji im jis laik det bigbala naif weya det solja oldei garrimap, en det Holi Spirit bin gibit yumob det naif.hAisaiya 59:17
18Wal yumob garra oldei dum ol detlot ting na, en yumob garra oldei prei langa God du en askim im blanga album yumob, en yumob garra oldei larram det Holi Spirit lidim yumob wen yumob prei, en yumob garra oldei wotjim miselp en nomo slekap. Yumob garra oldei prei blanga ola Kristjan pipul, 19en yumob garra prei blanga mi du en askim God blanga dalim mi wanim im wandim mi blanga tok ebritaim weya mi abum tjens blanga tok langa pipul, en yumob garra askim im blanga meigim mi tok strongbalawei en meigim ola pipul sabi brabliwei det gudnyus en det plen blanga God. 20Nomeda mi jidan iya langa jeilhaus, bat stil mi speshalwan mesinja blanga det gudnyus, en ai wandim yumob garra prei blanga mi en askim God blanga meigim mi tok strongbalawei blanga det gudnyus jis laik im wandim mi blanga dum.
Pol im tok gudbai na
21-22Wal ai garra jandim det braja blanga wi neim Titjakas langa yumob. Wi laigim im brabliwei, en im brabli trubala wekinmen blanga Jisas Krais det bos blanga wi, en im garra dalim yumob blanga mi en meigim yumob sabi hau mi. Blanga tharran na mi jandim im langa yumob, en im garra dalim yumob ola nyus blanga melabat, en im garra album yumob en meigim yumob gudbinji.i,22Eks 20:4; Kaloshans 4:7,8; Sekan Timathi 4:12
23Wal mi askim God det dedi blanga wi en Jisas Krais det bos blanga wi blanga meigim ol yumob Kristjan braja gija jidan gudbalawei, en mi askim dubala blanga meigim yumob laigim miselp brabliwei en bilib strongbalawei, 24en mi askim God blanga jidan brabli kainbala langa yumob olagijawan, dumaji yumob laigim Jisas Krais det bos blanga wi brabliwei.
Binij na.

a6:1: ,2Kaloshans 3:20

b6:2: ,3Eksadas 20:12; Dyudaranami 5:16

c6:4: Kaloshans 3:21

d6:5-8: Kaloshans 3:22-25

e6:9: Dyudaranami 10:17; Kaloshans 3:25; 4:1

f6:14: Aisaiya 11:5; 59:17

g6:15: Aisaiya 52:7

h6:17: Aisaiya 59:17

i6:21: ,22Eks 20:4; Kaloshans 4:7,8; Sekan Timathi 4:12