Yu garra jidan garram det lait
51Wal God bin meigim yumob im brabli ronwan biginini olabat, en blanga tharran na yumob garra jidan seimwei laik im. 2Yumob garra oldei laigim yumob braja olabat jis laik Jisas Krais bin laigim yumob. Imbin laigim wi, en imbin dai blanga wi, en imbin gibit im laif blanga wi jis laiga ofring langa God, en God bin gudbinji.aEksadas 29:18; Ola Saam 40:6
3Wal God bin meigim yumob im ronwan pipul olabat, en blanga tharran na yumob kaan jidan gridibala en yumob kaan silip garram enibodi o shoum miselp bodi langa enibodi o luk en wandim det bodi blanga enibodi o stilimbat enibodi waif o hasbin. Yumob kaan dum detkain ting, en yumob kaan jinggabat detkain ting du, 4en yumob kaan meigim fan blanga detkain ting en tok garram olkain nogudbala wed. Im nomo rait blanga Kristjan pipul blanga yusum detkain wed. Yumob garra oldei tok gudbalawei en gibit theingks langa God.
5Trubala ai dalim yumob. Detlot pipul hu oldei dumbat detkain nogudbala ting kaan go en jidan garram Jisas Krais en God, dumaji wen enibodi luk en laigimbat enijing detmatj, im meigim det ting deigim pleis blanga God.
6Wal yumob nomo wandi larram enibodi trikimbat yumob garram laiyawan wed en meigim yumob bilib langa olabat en bulurrum det nogudbalawei blanga olabat.
Trubala ai dalim yumob. God garra panishim ol detlot pipul hu dumbat detkain nogudbala ting en nomo lisin langa im. 7En yumob nomo wandi joinin garram detkain nogudbala pipul.
8Basdam yumob bin bulurrum det nogudbalawei wen yumob bin jidan langa dakbala. Bat det bos blanga wi bin meigim yumob im ronwan pipul olabat, en yumob jis jidan laiga lait na, en yumob garra shoum ebribodi yumob nomo blanga det dakbala. Yumob blanga det brabliwan lait, 9en det lait na meigim yumob jidan gudbalawei, en det lait meigim yumob jidan raitwei jis laik God wandim yumob blanga jidan, en det lait meigim yumob jidan trubalawei du.
10Wal yumob garra faindat wotkain ting oldei meigim God gudbinji, 11en yumob kaan joinin langa ol detlot nogudbala ting weya kamat brom det dakbala. Yumob garra shoum ola pipul detlot ting brom det dakbalawei olabat brabli nogud. 12Ai sabi im meigim yumob sheim wen yumob tokabat detkain nogudbala ting weya pipul oldei dumbat snikinwei. 13-14Bat wen yumob shoum olabat garram det lait brom God wed, det lait shoum olabat dei dumbat nogudbala ting, dumaji det wed blanga God meigim ebrijing kamat en shoum miselp wotkain im. Blanga tharran na sambodi bin tok, “Granggibala, yu garra gidap brom det dakbala en larram det lait blanga Jisas Krais shain langa yu!”
15Wal yumob garra jinggabat brabliwei hau yumob jidan, dumaji yumob nomo wandi jidan seimwei laik detlot nogudbala pipul hu nomo sabi enijing blanga det wei blanga God. Yumob sabi God, en yumob garra jidan gudbalawei en nomo weistimbat taim. 16Yumob garra oldei dumbat gudbala ting, dumaji loda pipul jidan nogudbala tudei,bKaloshans 4:5 17en yumob nomo wandi jidan granggibalawei laik olabat. Yumob garra faindat wanim God wandim yumob blanga dum, en yumob garra duwit.
18Wal yumob nomo wandi jidan drangginbala, dumaji det grog im deigidawei yumob en meigim yumob laif nogud. Yumob garra larram det Holi Spirit jidan langa yumob brabliwei, 19en yumob garra oldei tok en dalimbat miselp garram ola gudbala wed brom ola song, en yumob garra oldei sing en preisim det bos blanga wi brom insaid langa yumob hat, 20en blanga ebrijing yumob garra oldei gibit theingks langa God det dedi blanga wi, en wen yumob gibit theingks langa im, yumob garra oldei yusum det neim blanga Jisas Krais det bos blanga wi.c,20Kaloshans 3:16,17
Hasbin en waif
21Wal yumob garra lisin langa yumob Kristjan braja olabat, dumaji yumob rispek langa Jisas Krais.
22-23En ola gel garra lisin langa olabat hasbin jis laik dei lisin langa Jisas Krais det bos blanga wi, dumaji det hasbin im bos langa im waif jis laik Jisas Krais im bos langa ola bilibamob. Jisas Krais bin seibum wi, en wi jidan jis laik det bodi blanga im,d,23Kaloshans 3:18; Fes Pida 3:1 24en blanga tharran na ola gel garra oldei lisin langa olabat hasbin jis laik ola bilibamob lisin langa Jisas Krais.
25En ola hasbin garra laigim olabat waif jis laik Jisas Krais bin laigim ola bilibamob wen imbin gibit im laif blanga wi.eKaloshans 3:19; Fes Pida 3:7 26Imbin dai blanga wi blanga meigim wi klinbala en blanga meigim wi jidan blanga God. Imbin washim wi garram woda en garram im wed. 27En imbin dum lagijat blanga meigim ola bilibamob jandap lida langa im brabli gudbalawei nomo garram enijing rong en nomo garram eni folt.
28Wal ola men garra laigim olabat waif en lukaftum olabat jis laik dei lukaftum olabat ron bodi, en wen enibodi laigim im waif, wal im laigim im ronselp.
29-30Yumob sabi? Nobodi kaan heidim im ron bodi, dumaji im oldei fidim miselp en lukaftum miselp jis laik Jisas Krais oldei dum langa ola bilibamob, dumaji wi jidan jis laik det bodi blanga im.
31Wal im tok langa oltestaman blanga tharran deya. Im tok, “Blanga tharran na ebri men oldei libum im mami en dedi en merrit langa im waif, en afta dubala jidan wanbala.” Lagijat na im tok langa oltestaman,fJenasis 2:24 32en det wed im garram speshalwan mining. Im tok blanga Jisas Krais en ola bilibamob, 33en im tok blanga yumob du. Ebri hasbin garra laigim im waif en lukaftum im jis laik im lukaftum miselp, en ebri waif garra rispek im hasbin du.

a5:2: Eksadas 29:18; Ola Saam 40:6

b5:16: Kaloshans 4:5

c5:19: ,20Kaloshans 3:16,17

d5:22: ,23Kaloshans 3:18; Fes Pida 3:1

e5:25: Kaloshans 3:19; Fes Pida 3:7

f5:31: Jenasis 2:24