51Yu si? Dijan bodi weya wi garram iya langa dijan wel im jis laiga tent weya wi jidan insaid. En wi sabi wen God garra pulumdan dijan tent, im garra gibit wi nyubala bodi deya langa hebin jis laiga haus blanga jidan insaid. Nobodi bin meigim det haus blanga wi. Oni God bin meigim. En det haus garra jidan olagijawan. 2En wen wi oldei jinggabat detmatj, wi wandim det haus brom hebin. Nomo dijan tent brom dijan wel.
Yumob sabi? Wi wandim God garra gibit wi det nyubala olagijawan bodi, en im garra meigim wi werrimon det nyubala bodi jis laik wi werrimon nyubala klos.
3-4Yu si? Wen wi jidan iya langa dijan wel garram dijan olbala bodi, wi oldei abum brabli nogudbala filing insaid langa wi, dumaji dijan olbala bodi blanga wi oldei abum loda trabul. En det filing blanga wi oldei wandim wi blanga tjakidawei dijan olbala bodi blanga wi jis laik wi tjakidawei olwan klos. Bat wi nomo wandi deigimat en tjakidawei ola olwan klos en jidan neigidbala. Nomo. Wi wandi werrimon nyuwan klos. En seimwei wi nomo wandi tjakidawei det olbala bodi en jidan nomo garram bodi. Wi wandi jidan garram det nyubala bodi, dumaji wi wandim det olagijawan laif garra deigim pleis blanga det olbala bodi weya garra binij.
5Wal God na bin meigim wi jidan redi blanga tjeinjim wi, en imbin gibit wi det Holi Spirit blanga im blanga shoum wi trubala im garra tjeinjim wi en gibit wi det olagijawan laif. 6En blanga tharran na wi jidan strongbala. Bat wi sabi wen wi jidan langa dijan bodi iya langa dijan wel, wi nomo jidan gulijap langa Jisas Krais det bos blanga wi. Wi jidan longwei brom im, dumaji im jidan deya langa hebin wansaid langa im dedi. 7En nomeda wi kaan luk im garram wi ai dubala, bat stil wi bilib langa im. Lagijat na wi jidan langa dijan laif. 8En wi jidan strongbala du.
Bat ai dalim yumob. Ai wandi libum dijan bodi iya langa dijan wel en go en jidan garram Jisas Krais det bos blanga wi. 9Tharran na garra meigim mi gudbinji. Bat ai kaan meigim miselp gudbinji. Ai garra meigim det bos blanga wi gudbinji. Nomeda wujan bodi mi jidan, bat stil ai garra meigim im gudbinji, dumaji ebribodi garra jandap lida langa im bambai, 10en im garra jadjim ebribodi, en im garra peiyimbek ebribodi blanga ola nogudbala ting weya deibin dumbat langa dijan laif, en im garra peiyimbek ebribodi blanga ola gudbala ting weya deibin dumbat langa dijan laif du.aRomans 14:10
Wi jidan fren blanga God
11Wal ai sabi hau blanga bradin langa God. En blanga tharran na mi oldei trai en meigim najalot pipul sabi im du.
Wal God im sabi mi brabliwei. En mi wandim yumob garra sabi mi brabliwei du, en mi wandim yumob garra abum det raitwan filing blanga mi du.
12Yumob sabi wanim mi toktok? Sambala pipul reken mi nomo mishanri. Bat olabat luk oni atsaidwei. Dei nomo luk langa mi insaidwei.
Wal yumob sabi mi brabliwan mishanri. En wen mi tok mi brabliwan mishanri, mi nomo reken miselp blanga meigim yumob laigim mi blanga main ronselp. Nomo. Mi trai en meigim yumob sabi mi brabliwei wulijim yumob garra abum det raitwan ensa blanga gibit langa detlot pipul hu reken mi nomo mishanri.
13Yumob sabi? Sambala pipul reken mi medwan. Bat ai kaan jinggabat olabat, dumaji mi dum det wek blanga God. En sambala pipul reken mi garram gudwan main. Bat ai kaan jinggabat olabat, dumaji mi dum det wek blanga album yumob.
14Yu si? Mi dumbat det wek dumaji Jisas Krais laigim mi, en ai sabi imbin dai blanga ebribodi, en ola pipul hu bilib langa im bin joinin langa im weya imbin dai. 15En ai sabi imbin dai blanga wi wulijim wi kaan jidan blanga wi ronselp. Wi garra jidan blanga im, dumaji im na bin dai blanga wi, en imbin gidap laibala brom dedbala blanga album wi.
16Wal basdam wen wi nomo bin bilib langa Jisas Krais, wibin oldei jinggabat im eniwei. Bat wi nomo jinggabat im nogudbalawei na, dumaji wi bilib langa im na, en wi sabi hu im. En seimwei wi kaan jinggabat enibodi eniwei. 17Wi garra jinggabat pipul gudbalawei, dumaji wen enibodi joinap garram Jisas Krais, im jidan nyuwan, en det olbalawei blanga im gowei, en det nyubalawei kaman. 18Bat im nomo tjeinjim miselp. God na tjeinjim im.
Yumob sabi? Basdam aibin jidan bedfren blanga God. Bat thru Jisas Krais imbin tjeinjim mi, en imbin meigim mi fren blanga im, en imbin gibit mi det wek blanga kipgon meigimbat ola pipul jidan fren blanga im du. 19En mi oldei dalimbat olabat God wandi meigim ebribodi jidan fren blanga im thru Jisas Krais, en mi dalimbat olabat wen dei bilib langa Jisas Krais, God kaan bukumdan ol detlot nogudbala ting weya deibin dumbat. Tharran na det wed weya God bin gibit langa mi blanga dalimbat ebribodi.
20Wal mi jis laiga mesinja blanga Jisas Krais, en wen mi tok langa yumob, im jis laik God imselp askimbat yumob thru mi. En mi askim yumob blanga Jisas Krais blanga larram God tjeinjim yumob en meigim yumob jidan fren blanga im.
21Yumob sabi? Jisas Krais nomo bin dum eni nogudbala ting. Bat God bin wandi album wi, en imbin meigim im jidan jis laiga sekrifais ofring blanga ola nogudbala ting weya wibin dumbat, en blanga tharran na thru Jisas Krais wi gin jidan raitwei langa God.

a5:10: Romans 14:10