Trubala speshalwan mishanri en laiyawan speshalwan mishanri
111Wal ai garra meigim miselp haibala na, en ai garra tok praudbalawei. En yumob garra kipgon irrimbat mi.
2Wal yumob jinggabat na. Yumob jis laiga yanggel weya nomo bin silip garram enibodi, en mi na bin pramisim yumob langa wanbala men, en det men na Jisas Krais. En blanga tharran na God nomo wandim yumob blanga laigim enibodi. En ai nomo wandim yumob blanga laigim enibodi du.
3Yumob sabi? Seitin bin trikim det gel neim Ib garram laiyawan wed, en imbin deigidawei im. En mi bradin maitbi im garra meigim yumob jinggabat rongwei en deigidawei yumob en meigim yumob nomo laigim Jisas Krais en nomo bulurrum im.aJenasis 3:1-5,13
4Yumob sabi wanim mi toktok? Wen enibodi kaman langa yumob en tok laiyawan wed blanga difrinwan Jisas brom det Jisas weya aibin dalimbat yumob, wal yumob oldei gudbinji langa im. En wen enibodi kaman langa yumob en wandi gibit yumob difrinwan spirit brom det Holi Spirit weya yumob bin gedim, wal yumob oldei gudbinji langa im du. En wen enibodi kaman langa yumob garram difrinwan gudnyus brom det gudnyus weya yumob bin bilib, wal yumob oldei gudbinji langa im du.
5Yu si? Geman yumob garram olkain haibala speshalwan mishanri. Bat ai reken mi nomo lobala langa olabat. 6En nomeda loda pipul reken mi nomo sabi toktok, bat stil ai sabi ebrijing. En wen aibin deya garram yumob, aibin shoum yumob trubala mi sabi ebrijing. Olkain aibin shoum yumob.
7Wal yumob jinggabat na. Wen aibin dalimbat yumob det gudnyus blanga God, ai nomo bin meigim yumob gibit mi mani. Aibin meigim miselp lobala blanga meigim yumob haibala.
Wal yumob dalim mi na? Aibin dum nogudbala ting tharran? Nomo. Aibin dum gudbala ting.
8Yu si? Wen aibin wek deya garram yumob, ai nomo bin gajimbat mani brom yumob. Ola najalot tjetj bin gibit mi mani, en aibin gajim det mani brom olabat blanga album yumob. 9En wen aibin wandim enijing, ai nomo bin gibit yumob adtaim. Detlot braja blanga wi hubin kaman brom Mesadoniya bin gibit mi ebrijing aibin wandim. Lagijat na aibin dum wen aibin deya garram yumob. En ai garra kipgon dum lagijat du, dumaji ai nomo wandi meigim ad blanga yumob.bFalipiyans 4:15-18 10En ai garra toktok praudbalawei blanga tharran. En nobodi kaan meigim mi fosim enibodi iya langa dijan kantri Akeiya blanga gibit mi mani. En Jisas Krais na sabi mi tok trubalawei.
11Wal wotfo ai nomo bin meigim yumob gibit mi mani? Dumaji mi nomo laigim yumob? Nomo. Dumaji mi laigim yumob. En God sabi mi laigim yumob.
12Wal ai kaan gajimbat mani brom yumob seimwei laik detlot laiyawan speshalwan mishanri oldei gajimbat, dumaji ai nomo wandim yumob blanga reken olabat dum det wek seimwei laik mi dum. 13En ai nomo wandi gibit tjens langa olabat blanga tok praudbalawei, dumaji olabat nomo trubala speshalwan mishanri. Olabat gemanwan, en dei dalimbat laiya blanga olabat wek, en dei meigim miselp luk jis laiga trubalawan speshalwan mishanri blanga Jisas Krais.
14Wal wi kaan hatjamp blanga tharran, dumaji Seitin du gin tenim miselp en meigim miselp luk jis laiga einjul. 15En if im meigim miselp luk jis laiga einjul, wal wi sabi im wekinmen olabat garra meigim miselp luk jis laiga wekinmen blanga det gudbalawei. Bat bambai God garra peiyimbek olabat blanga detlot nogudbala ting weya dei dumbat.
Ola trabul weya Pol bin abum
16Wal wanmo ai dalim yumob. Ai nomo wandim enibodi garra irrim mi tok praudbalawei en reken mi granggibala. Bat if enibodi reken mi granggibala, wal im rait, dumaji ai garra meigim miselp granggibala en tok praudbalawei. 17Bat wen mi tok praudbalawei, mi nomo toktok hau Jisas Krais det bos blanga wi wandim mi blanga tok. Nomo. Mi tok granggibalawei, dumaji mi reken miselp.
18Wal ai nomo wandi tok lagijat. Bat loda pipul deya langa yumob oldei toktok praudbalawei eniwei. En blanga tharran na maitbi ai garra tok praudbalawei langa yumob du. 19Nomeda yumob reken yumob brabli klebabala, bat stil yumob oldei gudbinji langa granggibala. En blanga tharran na ai garra tok granggibalawei wulijim yumob garra lisin langa mi.
20Yumob sabi? Yumob oldei gudbinji langa detlot pipul hu meigim miselp bos blanga yumob, en yumob oldei gudbinji langa detlot pipul hu trikim yumob en pulumat yumob enijing, en yumob oldei gudbinji langa detlot pipul hu meigim miselp haibala langa yumob, en yumob oldei gudbinji langa detlot pipul hu oldei mokimbat yumob.
21Wal geman mi sheim blanga dalim yumob dijan. Bat wen aibin deya garram yumob, ai nomo bin tridim yumob adbalawei lagijat, dumaji aibin wikwan. Bat ai sabi ai garra tok praudbalawei langa yumob. Nomeda mi granggibala blanga tok lagijat, bat stil ai garra tok praudbalawei seimwei laik detlot pipul hu reken miselp mishanri blanga yumob.
22Wal yumob dalim mi na? Detlot pipul brom det Hibru traib? Wal mi brom det Hibru traib du. En detlot pipul Juwish pipul? Wal mi Juwish men du. En detlot pipul blanga Eibrahem biginini? Wal mi blanga Eibrahem biginini du. 23En detlot pipul wekinmen blanga Jisas Krais? Wal mi wekinmen blanga Jisas Krais du. En ai garra tok brabli granggibalawei na. Mi mobedawan wekinmen, dumaji aibin wek brabli adbala, en deibin tjakam mi langa jeilhaus lodataim, en deibin beldim mi garram wip lodataim, en aibin gulijap dai lodataim du.cEks 16:23 24Faibala taim detlot Juwish pipul bin beldim mi garram wip brabli adbalawei,dDyudaranami 25:3 25en thritaim detlot Roman pipul bin beldim mi garram wadi, en wantaim sambala pipul bin stonim mi, en thritaim bout bin draun garram mi, en wantaim aibin langa solwoda brom ailibala raidap neksdei.eEks 14:19; 16:22
26En wen aibin oldei trebul, aibin oldei abum trabul langa fladwoda en brom stilinbala en brom main ron Juwish kantrimen olabat en brom Jintail pipul du. Nomeda weya aibin oldei go, bat stil aibin oldei abum trabul langa taun en langa bush kantri en langa solwoda. En aibin abum trabul brom laiyawan bilibamob du.fEks 9:23; 14:5 27Aibin oldei adwek en swetgidap, en lodataim ai nomo bin abum taim blanga silip. En lodataim aibin jidan hanggri en thesti, dumaji ai nomo bin abum eni daga blanga dagat en woda blanga dringgim. En lodataim aibin jidan kolbala, dumaji ai nomo bin abum eni klos blanga werrimon blanga meigim miselp wombala.
28-29Ol detkain trabul na aibin oldei abum. En ebridei aibin oldei wori miselp nomo lilbit blanga detlot bilibamob langa ebri kantri, dumaji wen detlot bilibamob jidan wikwan, mi abum det seimwan filing en mi jidan wikwan du. En wen enibodi deigidawei detlot bilibamob en meigim olabat dumbat nogudbala ting, im meigim mi fil brabli nogud insaid.
30Wal ai dalim yumob. If ai garra tok praudbalawei, wal ai garra tok praudbalawei blanga detlot ting weya shoum mi detmatj mi jidan wikwan.
31-33Yumob sabi? Wen Eretas bin jidan king, det gabman bos blanga det taun gulum Dameskas bin jandim blijiman blanga blokim ola geit blanga det taun blanga gajulum mi. Bat sambodi bin pudumdan mi garram baskit snikinwei thru langa windo biyain langa det taun, en aibin gidawei. Trubala imbin hepin langa mi lagijat. En God det dedi blanga Jisas Krais det bos blanga wi sabi mi nomo dalimbat yumob laiya. Oni im na wi garra preisimbat olagijawan.g,33Eks 9:23-25

a11:3: Jenasis 3:1-5,13

b11:9: Falipiyans 4:15-18

c11:23: Eks 16:23

d11:24: Dyudaranami 25:3

e11:25: Eks 14:19; 16:22

f11:26: Eks 9:23; 14:5

g11:32: ,33Eks 9:23-25