Det Holi Spirit meigim wi sabi
21-3Wal main braja olabat, yumob jinggabat wen aibin kaman deya langa Korinth basdam blanga dalim yumob blanga God. Ai nomo bin strongbala. Aibin brabli bradin, en aibin sheiksheik nomo lilbit, en ai nomo bin tok brabliwei garram olkain bigwan wed, dumaji ai nomo bin wandi jinggabat enijing. Aibin wandi jinggabat oni blanga Jisas Krais en det kros weya imbin dai.aEks 18:9 4-5En wen aibin dalimbat yumob det gudnyus, ai nomo bin tok garram olkain bigwan wed blanga meigim yumob bilib langa mi. Nomo. Aibin tok garram det pawa blanga det Holi Spirit, dumaji ai nomo bin wandim bigwan wed garra meigim yumob bilib langa Jisas Krais. Aibin wandim det pawa brom God garra meigim yumob bilib langa im.
6Yumob sabi? Wen ai tok langa ol yumob Kristjan pipul, ai nomo dalimbat yumob eni wed weya bin kamat brom men. En ai nomo dalimbat yumob eni wed weya bin kamat brom nogudbala spirit du, dumaji ol detlot nogudbala spirit garra binij.
Yu si? Ai dalimbat yumob det wed weya bin kamat brom God, 7en det wed na dalim wi blanga det plen blanga God. Imbin meigim det plen bifo imbin meigim ebrijing, en imbin meigim det plen dumaji imbin wandim wi garra sabi im thru langa im san Jisas Krais. Bat nobodi bin sabi det plen blanga God weya im garra meigim wi jidan garram det brabli shainiwan lait blanga im, dumaji imbin oldei blandimbat.
8Wal nomeda God bin meigim det plen kamat na, bat stil ola boswan langa dijan wel nomo bin sabi det plen. If dei bina sabi det plen, wal dei nomo bina kilim Jisas Krais det brabli haibala bos.
9Yu si? God nomo bin shoum olabat det plen blanga im, dumaji “God bin meigim im ronwan plen blanga detlot pipul hu laigim im. Bat nobodi bin luk det plen, en nobodi bin irrim eni wed blanga det plen, en nobodi kaan sabi enijing blanga det plen.” Lagijat na im tok langa oltestaman.bAisaiya 64:4 10-11Bat God bin shoum wi det plen blanga im garram im Holi Spirit.
Wal yumob jinggabat na. Nobodi sabi wanim enibodi jinggabat langa im main. Oni det spirit blanga im sabi wanim im jinggabat. En im seimwei blanga God. Oni det Holi Spirit blanga im sabi wanim im jinggabat. Oni im na sabi det plen blanga God.
12Wal ai dalim yumob. Wi nomo bin gedim eni spirit brom dijan wel. Wibin gedim det Holi Spirit brom God. En wibin gedim det Holi Spirit blanga meigim wi sabi brabliwei det trubala wed weya God bin gibit langa wi.
13Yu si? Blanga tharran na wen mi titjimbat det wed blanga God langa detlot pipul hu garram det Holi Spirit, ai nomo oldei tok garram ola wed weya men oldei jinggabat. Mi oldei tok garram ola wed weya det Holi Spirit oldei gibit wi.
14Wal ai dalim yumob. Ol detlot pipul hu nomo garram det Holi Spirit kaan sabi det trubala wed weya kaman brom det Holi Spirit, dumaji det trubala wed nomo garram mining langa olabat, en dei kaan gajimap det mining, dumaji nobodi kaan sabi detlot wed wen im nomo garram det Holi Spirit.
15Yu si? If yu garram det Holi Spirit insaid langa yu, wal yu gin gajimap det mining blanga ebrijing, en yu gin sabi wanim rait en wanim rong. Bat detlot pipul hu nomo garram det Holi Spirit kaan dalim yu wanim rait en wanim rong langa yu laif. 16Wi sabi tharran, dumaji langa oltestaman im tok, “Nobodi sabi wanim God jinggabat langa im main. En nobodi kaan dalim im wanim blanga dum.” Bat God bin gibit wi det Holi Spirit, en wi na sabi det main blanga Jisas Krais.cAisaiya 40:13

a2:3: Eks 18:9

b2:9: Aisaiya 64:4

c2:16: Aisaiya 40:13