Ofring blanga najalot Kristjan pipul
161Wal langa det leda weya yumob bin jandim langa mi, yumob bin askim mi blanga det mani weya yumob garra pudumbat blanga album detlot Kristjan pipul hu abumbat adtaim deya langa det kantri gulum Judiya.
Wal aibin dalim ol detlot najalot tjetjmob deya langa det kantri gulum Galeisha hau blanga pudumbat det mani, en yumob deya langa det taun Korinth garra dum seimwei du.aRomans 15:25,26
2Lagijat na yumob garra dum. Ebri Sandei ebribodi garra pudum wansaid sambala mani. Detlot pipul hu gedim bigmob mani garra pudum wansaid bigmob mani. En detlot pipul hu gedim lilbit mani garra pudum wansaid lilbit mani. En yumob garra hipimap ol detlot mani redi, dumaji ai nomo wandim yumob garra meigimap det mani wen ai garra kaman deya. Det mani garra weit blanga mi deya redi. 3En wen ai garra kaman, ai garra gibit leda langa detlot men weya yumob bin pikimat blanga deigim det mani langa Jerusalem. Ai garra gibit olabat det leda blanga dalim detlot pipul langa Jerusalem hu olabat. 4En if ai garra go langa Jerusalem du, wal ai garra deigim detlot men garram mi.
Pol, Timathi en Apalas
5Wal ai garra go langa det kantri gulum Mesadoniya basdam, en afta wen ai go thru langa det kantri, ai garra kaman deya langa yumob.bEks 19:21 6-7Ai nomo wandi kaman langa yumob streidawei, dumaji ai wandi jidan deya garram yumob lilbit longtaim. En if Jisas Krais det bos blanga wi larram mi, wal ai garra dum lagijat na. Maitbi ai garra kaman kolwethataim en jidan deya raidap kolwetha binij, dumaji if ai jidan garram yumob lilbit longtaim, wal yumob gin album mi wen ai gowei brom yumob. Bat ai nomo sabi weya ai garra go wen ai gowei brom yumob.
8Wal ai garra kipgon jidanbat iya langa Efasas raidap det dei gulum Pentakos, dumaji God bin gibit mi tjens blanga dum loda wek iya. 9Nomeda loda pipul nomo laigim mi dalimbat det gudnyus, bat stil loda pipul garra irrimbat det wed.c,9Labidakas 23:15-21; Dyudaranami 16:9-11; Eks 19:8-10
10Wal if Timathi go langa yumob deya, yumob garra welkam im en meigim im jidan gudbinji, dumaji im dumbat det wek blanga Jisas Krais det bos blanga wi seimwei laik mi.dFes Karinthiyans 4:17 11En nomeda im yangwan men, bat stil nobodi kaan jinggabat im nogudbalawei. Yumob garra ol album im gudwei blanga kambek iya langa mi, dumaji ai wandim im garra kambek iya garram detlot najalot Kristjan braja blanga wi.
12Wal ai garra dalim yumob na blanga Apalas det braja blanga wi. Aibin dalim im brabliwei blanga go langa yumob garram detlot najalot Kristjan braja blanga wi. Bat im nomo bin wandi go. Bat im garra go wen det rait taim garra kaman.
Pol im tok gudbai na
13Wal yumob irrim mi na. Yumob garra oldei wotjimbat miselp, en yumob garra kipgon bilib strongbalawei, en yumob kaan bradin blanga enijing, en yumob kaan larram enijing bidim yumob. 14En ebrijing weya yumob dumbat, yumob garra dum brabliwei, dumaji yumob laigim God en ola pipul olabat.
15-16Wal yumob sabi Stefanas en im femili olabat bin det fes Kristjan femili langa det kantri gulum Akeiya, en yumob sabi deibin gibit miselp langa det wek blanga albumbat Kristjan pipul olataim.
Wal main braja olabat, ai wandim yumob garra lisin langa detkain pipul na. En yumob garra lisin langa ol detlot pipul hu oldei joinin langa olabat en albumbat olabat garram det wek du.eFes Karinthiyans 1:16
17Wal aibin gudbinji wen Stefanas en Fotjunadas en Akeikas bin kaman iya, dumaji deibin deigim pleis blanga yumob weya yumob nomo bin iya, 18en deibin meigim mi brabli gudbinji jis laik deibin meigim yumob gudbinji.
Wal yumob garra teiknodis langa detkain pipul na.
19Wal ola tjetj langa det kantri gulum Eisha tok gudei langa yumob. En Akwila en Prisila en ola Kristjan pipul hu oldei abum sebis langa dubala haus tok gudei langa yumob brabliwei du, dumaji yumob bin joinap garram Jisas Krais det bos blanga wi.fEks 18:2
20Wal ola Kristjan braja blanga wi iya tok gudei langa yumob. En yumob garra tok gudei langa ola Kristjan pipul deya.
21Wal mi na, Pol, mi tok gudei langa yumob. Garram main ronwan bingga aibin raidimdan dijan wed.
22Wal ai dalim yumob. God garra panishim detlot pipul hu nomo laigim Jisas Krais det bos blanga wi. En langa im mi tok, “Yuwai, bos! Yu kaman na!”
23-24Wal mi laigim ol yumob pipul deya langa Korinth hubin joinap garram Jisas Krais det bos blanga wi, en mi askim im blanga jidan brabli kainbala langa yumob.
Binij na.

a16:1: Romans 15:25,26

b16:5: Eks 19:21

c16:8: ,9Labidakas 23:15-21; Dyudaranami 16:9-11; Eks 19:8-10

d16:10: Fes Karinthiyans 4:17

e16:15: Fes Karinthiyans 1:16

f16:19: Eks 18:2