Pol im tok gudei
161Wal main braja olabat, ai dalim yumob. Det Kristjan sista blanga wi neim Fibi im brabli gudwan gel. Imbin wekingel blanga det tjetj langa det taun gulum Sinkriyai. 2En ai wandim yumob garra welkam im garram det neim blanga Jisas Krais det bos blanga wi jis laik Kristjan pipul ebriweya welkam gija. En ai wandim yumob garra album im en gibit im enijing im wandim, dumaji imbin oldei album loda pipul, en imbin oldei album mi du.
3Wal mi tok gudei langa det dubala Prisila en Akwila. Dubala wekinmen blanga Jisas Krais, en dubala bin oldei wek garram mi,aEks 18:2 4en mi gudbinji blanga dubala, dumaji dubala nomo bin oldei jinggabat dubala ron laif wen deibin albumbat mi. En ola Jintail Kristjan pipul gudbinji blanga dubala du.
5En mi tok gudei langa ola Kristjan pipul hu oldei majurrumap miselp blanga abum sebis langa det haus blanga Prisila en Akwila.
En mi tok gudei langa main gudfren Epanetas hubin bilib langa Jisas Krais bifo enibodi langa det kantri gulum Eisha.
6En mi tok gudei langa det gel Meri hubin adwek blanga album yumob.
7En mi tok gudei langa main dubala Juwish kantrimen Endronikas en Juniyas hubin jidan garram mi wen aibin langa jeilhaus. Dubala bin bilib langa Jisas Krais bifo mi, en dubala brabli gudwan speshalwan mishanri.
8En mi tok gudei langa main gudfren Empiliyatas hu oldei bulurrum Jisas Krais det bos blanga wi brabliwei.
9En mi tok gudei langa Yubanas det wekinmen blanga Jisas Krais hubin oldei wek garram mi.
En mi tok gudei langa main gudfren Stakiyas.
10En mi tok gudei langa Apeles hubin shoum miselp trubala langa Jisas Krais.
En mi tok gudei langa ola femili blanga Aristobalas.
11En mi tok gudei langa main Juwish kantrimen Herodiyan.
En mi tok gudei langa ola femili blanga Nasisas hu bilib langa Jisas Krais det bos blanga wi.
12En mi tok gudei langa det dubala gel Trafina en Trafosa hubin adwek blanga Jisas Krais det bos blanga wi.
En mi tok gudei langa det najawan gel main gudfren Pesis hubin adwek brabliwei blanga Jisas Krais det bos blanga wi.
13En mi tok gudei langa det men neim Rufas weya Jisas Krais det bos blanga wi bin pikimat.
En mi tok gudei langa det mami blanga Rufas du, dumaji imbin oldei tridim mi jis laik im ronwan san.bMak 15:21
14En mi tok gudei langa Asinkritas en Flegan en Hemis en Patrobas en Hemas en ola najalot Kristjan braja deya garram olabat.
15En mi tok gudei langa Filologas en Juliya en Neras en det sista blanga Neras en Olimpas en ola najalot Kristjan pipul deya garram olabat.
16Wal ola Kristjan pipul brom ebriweya tok gudei langa yumob, en yumob garra tok gudei langa ola Kristjan pipul deya blanga melabat. En yumob garra sheikhen gija du.
Pol im tok gudbai na
17Wal main braja olabat, ai dalim yumob na. Yumob garra oldei wotjim miselp blanga detlot pipul hu meigim yumob kadimat miselp en stapam yumob brom bilib brabliwei. Detlot pipul hu meigim yumob dum lagijat nomo bulurrum det wed weya yumob bin len.
18Wal yumob garra gowei brom detlot pipul, dumaji olabat nomo wek blanga Jisas Krais det bos blanga wi. Olabat wek blanga olabat ron nogudbala filing weya dei wandim olkain nogudbala ting, en dei yusumbat olkain wed blanga switinimap pipul hu nomo sabi, en afta dei trikim olabat.
19Wal ebribodi bin irrim det stori blanga yumob weya yumob bin oldei bulurrum det wed blanga Jisas Krais brabliwei. En tharran meigim mi brabli gudbinji blanga yumob. En ai wandim yumob garra kipgon sabi ola gudbala ting. Ai nomo wandim yumob garra oldei jinggabat ola nogudbala ting en meigim miselp gilti.
20Wal oni God na meigim pipul jidan gudwei. En nomo longtaim na im garra binijimap Seitin det boswan dibuldibul en meigim yumob jidan bos oba langa im.
Wal Jisas Krais det bos blanga wi im brabli kainbala langa wi, en mi askim im blanga kipgon kain langa yumob.
21Wal det wekinmen Timathi hubin oldei wek garram mi im tok gudei langa yumob. En Lusiyas en Jeisan en Sosapata detlot Juwish kantrimen main bin tok gudei langa yumob du.cEks 16:1
22En Tetaiyas hubin raidimdan dijan leda blanga mi tok gudei langa yumob dumaji im bilib langa Jisas Krais det bos blanga wi.
23En Gaiyas det bos blanga dijan haus weya mi jidan en weya ola Kristjan pipul oldei majurrumap miselp blanga abum sebis tok gudei langa yumob du.
En Irestas det men hu oldei lukaftumbat ola mani blanga dijan taun weya mi jidan tok gudei langa yumob du.
En Kwatas det braja blanga wi tok gudei langa yumob du.dEks 19:29; Fes Karinthiyans 1:14, Sekan Timathi 4:20
Wi garra gibit preis langa God
24-25Wal wi garra gibit preis langa God, dumaji im na garram det pawa blanga meigim yumob jandap strongbalawei weya yumob bin bilib langa det gudnyus. 26Aibin oldei dalim ola pipul det gudnyus blanga Jisas Krais weya God bin blandim longtaim, dumaji God bin shoum det trubalawan wed na. Imbin meigim det trubalawan wed kamat wen imbin yusum detlot speshalwan mesinja blanga im blanga raidimdan det wed blanga im. En tudei na imbin meigim det wed blanga im kamat langa opin. Oni God na olagijawan, en im na bin meigim det wed blanga im kamat langa opin wulijim pipul brom ebri kantri garra bilib langa im brabliwei en duwit langa im.
27Wal nobodi nomo God. Oni im na. En nobodi sabibala. Oni im na. En wi garra gibit preis langa im thru Jisas Krais olagijawan. Yuwai. Trubala ai dalim yumob.
Binij na.

a16:3: Eks 18:2

b16:13: Mak 15:21

c16:21: Eks 16:1

d16:23: Eks 19:29; Fes Karinthiyans 1:14, Sekan Timathi 4:20