141Wal yumob garra larram detlot Kristjan braja hu nomo bilib strongbalawei jidan gudfren blanga yumob. En yumob kaan tok nogudbalawei langa olabat blanga hau dei oldei jinggabat blanga dum enijing, dumaji detlot pipul hu bilib strongbalawei sabi dei gin dagat enikain daga. 2Bat sambala pipul hu bilib lilbit reken dei kaan dagat bif, dumaji dei reken wen dei dagat det bif, dei dumbat nogudbala ting.

3Wal detlot pipul hu dagat enikain daga kaan reken miselp haibala langa detlot pipul hu nomo dagat bif. En detlot pipul hu nomo dagat bif kaan tok enijing blanga detlot pipul hu dagat enikain daga, dumaji God bin meigim olabat jidan gudfren blanga im.

4Yumob sabi na? Yumob kaan tok enijing blanga detlot wekinmen hu garram olabat ron bos, dumaji olabat ron bos garra kotim olabat if dei dumbat gudbala ting o nogudbala ting. En ai sabi dei garra dum gudbala ting, dumaji Jisas Krais det bos blanga wi garra meigim olabat strongbala blanga dumbat gudbala ting.

5Wal yumob jinggabat na. Sambala pipul reken det wandei im mowa haibala langa ola najalot dei. Bat sambala pipul reken ola dei olabat seim.

Wal ebribodi garra jinggabat brabliwei blanga im ronselp. 6En wen enibodi reken eni dei im haibala, im meigim det dei haibala blanga Jisas Krais det bos blanga wi. En wen enibodi dagat enikain daga, im jinggabat Jisas Krais det bos blanga wi wen im dagat enikain daga lagijat, dumaji im gibit theingks langa God blanga detlot daga. En wen enibodi nomo oldei dagat bif, im jinggabat Jisas Krais det bos blanga wi wen im nomo dagat bif, en im gibit theingks langa God blanga detlot daga weya im oldei dagat.aKaloshans 2:16

7Yumob sabi wotfo? Im lagijat dumaji nobodi jidan iya langa dijan kantri blanga imselp. 8En wen enibodi dai, im nomo dai blanga imselp du, dumaji wen wi jidan iya langa dijan kantri, wi jidan iya blanga Jisas Krais det bos blanga wi. En wen wi dai, wi stil jidan blanga im.

Yu si? Nomeda wi jidan laibala o wi dai, bat stil wi jidan blanga Jisas Krais det bos blanga wi. 9En blanga tharran na Jisas Krais bin dai en imbin gidap laibala brom dedbala wulijim im garra jidan bos blanga laibala pipul en dedbala pipul du.

10Wal yumob dalim mi na. Wotfo yumob jadjim yumob Kristjan braja olabat? Wotfo yumob oldei reken miselp haibala langa olabat? Yumob nomo wandi dum lagijat, dumaji wi garra ol jandap lida langa God, en im na garra jadjim wi holot.bSekan Karinthiyans 5:10 11Wi sabi tharran, dumaji langa det oltestaman God bin tok, “Mi na det laibalawan God, en trubala ai dalim yumob. Wen det taim garra kaman, ebribodi garra buldan langa olabat ni lida langa mi, en ebribodi garra tok, ‘Yu na God’.”cAisaiya 45:2

12Yumob sabi na? Wi holot garra dalim miselp langa God, en wi garra dalim im blanga ebrijing weya wibin dumbat.

13Wal wi garra stap jadjimbat wi Kristjan braja olabat. Mobeda wi jinggabat nomo blanga dum enijing weya garra meigim wi braja olabat dum nogudbala ting.

14Wal yumob irrim mi na. Aibin joinap garram Jisas Krais det bos blanga wi, en ai sabi brabliwei nomo eni daga nogudwan. Bat ai sabi wen enibodi reken det daga im nogudbala, im kaan dagat det daga, dumaji blanga im det daga im nogudwan. 15En if eni Kristjan braja blanga wi jidan nogudbinji dumaji im luk wi dagat det daga weya im reken im nogudwan, wal wi nomo laigim im, dumaji wi dagat det daga weya meigim im nogudbinji.

Wal ai dalim yumob. Wi kaan dagat enijing weya meigim wi braja libum det trubalawei, dumaji Jisas Krais bin dai blanga im.

16-17Yu si? Wi kaan dum enijing weya garra meigim pipul tok nogudbalawei blanga enijing weya wi reken im rait blanga dum, dumaji det wei blanga dijan Kristjan laif im nomo blanga dagadagat en dringgimbat. Nomo. Det wei blanga dijan Kristjan laif im blanga dumbat wanim God wandim wi blanga dum en blanga jidan gudbalawei garram ebribodi en blanga jidan gudbinji garram det Holi Spirit. 18En wen enibodi bulurrum Jisas Krais en wek blanga im lagijat, im meigim God gudbinji langa im, en im meigim ola pipul gudbinji langa im du.

19Yumob sabi na? Wi garra oldei dumbat ebrijing brabliwei blanga meigim miselp jidan gudwei en blanga album miselp jidan strongbala.

20Yu si? Wi nomo wandim larram daga meigim wi meigim det wek blanga God nogud, dumaji det daga im gudwan. Bat im nogud blanga enibodi blanga dagat enijing weya garra meigim im Kristjan braja jinggabat nogudbalawei en dumbat nogudbala ting. 21Wi nomo wandi meigim wi braja olabat dumbat nogudbala ting. Mobeda wi libum dagadagat bif en dringgimbat wain o dumbat enijing weya garra meigim wi braja olabat dum nogudbala ting.

22Yumob sabi na? Yumob garra jinggabat yumob ronselp if im rait blanga dagat bif en dringgim wain. En yumob kaan dalimbat ebribodi. Yumob garra dalim oni God. En wen yumob dum enijing weya yumob reken im rait blanga dum, if yumob nomo pudum bleim langa miselp, wal yumob garra gudbinji. 23Bat if yumob dum enijing weya yumob reken im nomo rait, wal yumob garra meigim God panishim yumob, dumaji yumob nomo bilib God wandim yumob blanga dum det ting weya yumob dum. En if yumob dum enijing weya yumob nomo bilib God wandim yumob blanga dum, wal yumob dum nogudbala ting tharran.