Sambala gel bin bulurrum Jisas
81Bambai na Jisas bin go ebriweya langa ola taun en ola najalot lilwan pleis, en imbin dalimbat ola pipul det gudnyus blanga God weya imbin meigim wei blanga olabat blanga kaman langa im. Imbin go garram det twelbala wekinmen blanga im, 2en loda gel bin bulurrum im du, dumaji imbin andimwei dibuldibul brom insaid langa olabat en imbin meigim olabat gudbala brom olkain siknis.
Wal wan gel hubin bulurrum Jisas bin neim Meri Megdalin, en Jisas bin andimwei sebenbala nogudwan spirit brom insaid langa im. 3En najawan gel hubin bulurrum Jisas bin neim Jowena. Imbin merrit langa wan men neim Tjusa hubin wekinmen blanga det gabman bos neim Herod. En najawan gel hubin bulurrum Jisas bin neim Susena. Detlot thribala gel en detlot najalot gel bin oldei lukaftumbat Jisas en im wekinmen garram olabat ron enijing.a,3Methyu 27:55,56; Mak 15:40,41; Luk 23:49
Stori blanga sid
Methyu 13:1-9; Mak 4:1-9
4Wal loda pipul bin kipgon kaman langa Jisas brom ebri taun, en wen detmatj pipul bin deya, Jisas bin dalim olabat dijan stori blanga meigim olabat jinggabat.
5Imbin tok, “Wantaim wan men bin go blanga plentimbat sid, en imbin tjakam detlot sid ebriweya, en sambala sid bin buldan langa roud weya ola pipul bin pudumbut en ola bard bin dagat. 6En sambala sid bin buldan langa stoniwan pleis, en wen detlot sid bin gro, deibin draiyap, dumaji dei nomo bin abum eni woda langa det stoniwan graun. 7En sambala sid bin buldan insaid langa ola jigiwan gras, en wen deibin gro, detlot jigiwan gras bin jugum olabat. 8En sambala sid bin buldan langa gudwan graun, en deibin gro gudwei, en deibin abum loda daga.”
Lagijat na Jisas bin dalim det stori, en wen imbin binij, imbin tok, “Yumob hubin irrim dijan stori, yumob garra jinggabat na.”
Wotfo det stori
Methyu 13:10-17; Mak 4:10-12
9Afta na ola wekinmen blanga Jisas bin askim im wanim det stori bin tok, 10en Jisas bin dalim olabat, “God garra meigim yumob sabi det nyubalawei blanga kaman langa im. Bat detlot najalot pipul kaan sabi. En ai garra oldei tok langa olabat garram detkain stori, dumaji dei garra irrim det trubala wed. Bat dei kaan sabi det wed. En dei garra lukabat det wei langa God. Bat dei kaan faindim det wei.bAisaiya 6:9,10
Jisas dalim olabat wanim det stori tok
Methyu 13:18-23; Mak 4:13-20
11“Wal ai dalim yumob wanim det stori im tok. Det sid im jis laik det wed blanga God.
12“Detlot sid weya bin buldan langa roud, dei jis laik detlot pipul hu irrim det wed. Bat Seitin im kaman en deigidawei det wed brom olabat wulijim olabat kaan bilib langa det wed en God kaan seibum olabat.
13“Detlot sid weya bin buldan langa stoniwan pleis, dei jis laik detlot pipul hu irrim det wed en dei lisin langa det wed gudbinjiwei. Bat det wed nomo gowin insaid langa olabat, en dei nomo lisin langa det wed fo longtaim. Wen enikain trabul kaman langa olabat dumaji deibin bilib langa det wed, dei gibit bekboun langa det wed na.
14“Detlot sid weya bin buldan langa detlot jigiwan gras, dei jis laik detlot pipul hu irrim det wed en dei bilib langa det wed. Bat dei wori blanga enijing en dei jinggabat blanga mani en dei wandim olkain ting. Dei nomo gibit rum langa det wed, en det wed kaan wek langa olabat laif na.
15“Detlot sid weya bin buldan langa det gudwan graun, dei jis laik detlot pipul hu irrim det wed en dei bilib langa det wed, en det wed im wek langa olabat laif, dumaji olabat duwit wanim det wed dalim olabat blanga dum, en dei nomo gobek langa det nogudbalawei. Blendibala daga bin kamat brom detlot sid weya bin buldan langa det gudwan graun. En im lagijat na wen det wed im wek langa enibodi laif. Im meigim im jidan strongbala mowa en mowa ebridei.”
Stori blanga lemp
Mak 4:21-25
16Wal Jisas bin kipgon dalimbat olabat stori, “Wen enibodi laidim lemp, im kaan go en pudum det lemp andanith langa dram o andanith langa im bangk. Im garra heingimap det lemp blanga meigim lait wulijim enibodi gin luk det lait wen dei kaman insaid.cMethyu 5:15; Luk 11:33
17“En im lagijat na langa det wed blanga God. Wen im blandim det wed blanga im, afta im garra shoum det wed. En wen im gaburrumap det wed blanga im, afta im garra meigim det wed kamat langa opin weya ebribodi gin sabi.dMethyu 10:26; Luk 12:2
18“Wal yumob garra jinggabat brabliwei ol dislot ting weya mi dalimbat yumob, dumaji if yumob garram det wed langa yumob laif, wal God garra meigim yumob sabi mowa. Bat if yumob irrim det wed, en yumob nomo duwit, wal God garra deigidawei det wed brom yumob.” Lagijat na Jisas bin tok.eMethyu 25:29; Luk 19:26
Jisas en im femili
Methyu 12:46-50; Mak 3:31-35
19Brom deya det femili blanga Jisas bin kaman langa im. Bat dei nomo bin gedim rum blanga go langa im, dumaji bigmob pipul bin deya, 20en sambodi bin dalim Jisas, “Yu mami en yu braja olabat deya atsaid, en olabat wandi luk yu.”
21Wal Jisas bin tok, “Ol detlot pipul hu lisin langa det wed blanga God en duwit, olabat na main mami en main braja olabat.”
Jisas bin stapam win en weib
Methyu 8:23-27; Mak 4:35-41
22Bambai na wandei Jisas bin dalim im wekinmen olabat, “Kaman na. Wi go najasaid langa dijan bigwan leik.” En deibin gowin langa bout blanga krosim det woda, 23en hafwei Jisas bin go silip, en wen imbin stil silip, strongbala win bin kaman langa det woda, en imbin blowimbat det bout ebriwei, en ola woda bin stat gowin langa det bout, en detlot wekinmen bin bradin, dumaji deibin luk miselp langa trabul, 24en deibin go en weikimap Jisas, en deibin tok, “Bos! Bos! Wi binij na! Wi garra dai!”
Wal Jisas bin gidap, en imbin dalim det strongbala win en bigbala weib blanga stap, en streidawei dubala bin stap, en ebrijing bin jidan kwaitbala.
25Afta na Jisas bin dalim detlot wekinmen, “Wotfo yumob nomo bilib langa mi?”
Bat detlot wekinmen bin hatjamp en bradin, en deibin askim miselp, “Wotkain men dijan? Imbin dalim win en weib blanga stap, en dubala bin duwit langa im!”
Nogudbala spirit en bigibigi
Methyu 8:28-34; Mak 5:1-20
26Afta na wen Jisas en im wekinmen olabat bin krosim det bigwan woda, deibin kamat langa det kantri gulum Gerasa najasaid brom Gelali, 27en wen Jisas bin godan brom det bout, wan men brom det taun bin midim im deya.
Wal det men bin abum nogudbala spirit insaid langa im, en im nomo bin werrimbat klos brom longtaim, en im nomo bin jidanbat langa im kemp du. Imbin oldei jidanbat langa detlot keib weya deibin oldei pudumbat ola dedbala pipul. 28-29Lodataim detlot pipul langa det taun bin trai en taiyimap det men langa im bingga en langa im fut garram tjein jis laiga prisana. Bat det nogudbala spirit bin oldei wek insaid langa im, en det men bin oldei breigim detlot tjein, en det nogudbala spirit bin oldei deigidawei im langa det bush kantri.
Wal wen det men bin luk Jisas, imbin jingat adbala, en imbin buldan langa Jisas fut, en Jisas bin dalim det nogudbala spirit blanga gowei brom det men, en det men bin tok, “Jisas, ai sabi yu det san blanga det brabli haibala God. Wal wanim yu wandim brom mi? Yu pramis mi yu kaan ardim mi.”
30Wal Jisas bin askim det men, “Wanim yu neim?”
En det men bin tok, “Main neim Bigmob.” Lagijat na imbin tok, dumaji bigmob nogudbala spirit bin jidan insaid langa im, 31en detlot nogudbala spirit bin askimbat Jisas nomo blanga lokimap olabat langa det dipwan hol.
32Wal bigmob bigibigi bin fidabat deya wansaid langa det hil, en detlot nogudbala spirit bin askimbat Jisas blanga larram olabat go langa detlot bigibigi, en imbin larramgo olabat deya. 33Imbin andimwei olabat brom det men, en deibin gowin insaid langa detlot bigibigi, en ol detlot bigibigi bin randan langa det klif, en deibin buldan langa det woda, en deibin ol draun.
34Wal wen detlot men hubin lukaftumbat detlot bigibigi bin luk wanim bin hepin, deibin ol ranawei, en deibin go en dalimbat det nyus langa det taun en ebriweya langa det kantri, 35en ebribodi bin go deya blanga luk wanim bin hepin, en wen deibin kamat langa Jisas, deibin luk det men weya bin oldei abum detlot nogudbala spirit insaid langa im. Det men bin jidanbat deya gudbalawei, en imbin werrimon klos, en imbin jinggabat raitwei.
Wal wen detlot pipul bin luk det men, deibin ol bradin, 36en detlot pipul hubin luk det ting bin hepin bin dalimbat detlot pipul hau detlot nogudbala spirit bin gowei brom det men en det men bin gudbala na.
37Wal detlot pipul deya langa det kantri bin askim Jisas blanga gowei brom olabat kantri, dumaji olabat bin brabli bradin, en Jisas bin gowin langa det bout blanga gowei, 38en det men bin askimbat im, “Ai gin kaman garram yu?”
39Bat Jisas bin dalim im, “Nomo. Yu gobek langa ola femili blanga yu en dalim olabat wanim God bin dum blanga yu.” Lagijat na Jisas bin tok langa det men, en afta na imbin jandimwei im, en det men bin go ebriweya langa det taun, en imbin dalimbat ola pipul wanim Jisas bin dum blanga im.
Lilgel en olgamen
Methyu 9:18-26; Mak 5:21-43
40Afta na wen Jisas bin krosim det bigwan woda, loda pipul bin weidabat blanga im deya, en deibin gudbinji blanga im.
41Bambai na wan men neim Jairas bin kaman deya langa Jisas. Det men bin boswan blanga det Juwish Miting Pleis deya langa det taun, en imbin nildan langa Jisas fut, 42en imbin askim im brabliwei blanga go langa im haus, dumaji im doda bin brabli sik, en imbin gulijap dai. En det men bin abum oni det wanbala doda na, en det lilgel bin 12 yiya ol.
Wal Jisas bin go garram det men, en detmatj pipul bin bulurrum Jisas, en deibin bambumbat im ebriwei.
43Wal wan olgamen bin deya du garram detlot pipul. Det olgamen bin abum siknis 12 yiya, en imbin oldei lujim loda blad. Bat nobodi bin meigim im gudbala.
44Wal det olgamen bin kaman garram detlot pipul biyain langa Jisas, en imbin tatjim im klos, en streidawei det blad bin stap, en imbin gudbala na.
45Wal Jisas bin tok, “Hubin tatjim mi?”
Bat nobodi bin dalim miselp, en det wekinmen blanga im neim Pida bin tok, “Bos, yu luk bigmob pipul iya ebriweya dei bambumbat yu.”
46Bat Jisas bin tok, “Sambodi bin tatjim mi. Ai sabi, dumaji aibin filim det pawa bin gowei brom mi.”
47Wal det olgamen bin sabi Jisas bin sabi im, en imbin kaman bradinwei langa Jisas, en imbin buldan langa im fut, en deya na lida langa ebribodi imbin dalim Jisas wotfo imbin tatjim im en hau imbin meigim im gudbala streidawei.
48Wal Jisas bin dalim det olgamen, “Olgamen, yubin bilib brabliwei langa mi. En tharran na bin meigim yu gudbala. Wal yu gobek gudbalawei na, dumaji yu fri brom det trabul weya yubin abum.”
49Wal seimtaim wen Jisas bin toktok lagijat langa det olgamen, sambodi bin kaman brom det haus blanga det bosmen neim Jairas, en imbin dalim det bosmen, “Yu libum det titja na, dumaji yu doda bin dai, en yu kaan askimbat det titja blanga kaman langa yu kemp na.”
50Wal Jisas bin irrim olabat tok lagijat, en imbin dalim det bosmen, “Yu nomo nogudbinji. Yu garra bilib langa mi, en det lilgel garra jidan gudbala.”
51Afta na wen Jisas bin kamat langa det haus, im nomo bin larram enibodi gowin garram im. Oni det thribala wekinmen blanga im neim Pida, Jeims en Jon en det lilgel dedi en mami bin go garram im.
52Wal ebribodi deya langa det kemp bin ol nogudbinji en kraikrai blanga det lilgel, en Jisas bin tok, “Yumob nomo kraikrai. Det lilgel nomo dedwan. Im oni silip.”
53Wal deibin ol laf langa im, dumaji deibin sabi det lilgel bin dai.
54Bat Jisas bin grebum det lilgel bingga, en imbin tok, “Lilgel, yu gidap!” 55En streidawei det lilgel bin laibala, en imbin gidap, en Jisas bin dalim olabat blanga gibit det lilgel daga.
56Wal det lilgel mami en dedi bin hatjamp brabliwei, en Jisas bin dalim olabat nomo blanga dalim enibodi wanim bin hepin.

a8:2: ,3Methyu 27:55,56; Mak 15:40,41; Luk 23:49

b8:10: Aisaiya 6:9,10

c8:16: Methyu 5:15; Luk 11:33

d8:17: Methyu 10:26; Luk 12:2

e8:18: Methyu 25:29; Luk 19:26