Jisas bin tok blanga im wekinmen
Methyu 18:6,7, 21,22; Mak 9:42
171Afta na Jisas bin tok langa ola wekinmen blanga im, “Sambala pipul garra temtimbat yumob blanga meigim yumob go langa det nogudbalawei. Bat God garra panishim brabliwei ol detlot pipul hu temtimbat enibodi. 2Mobeda detkain pipul garra taiyimap miselp garram bigbala ston langa im nek en tjakam miselp langa det solwoda en kilim miselp bifo im meigim enibodi bulurrum det nogudbalawei. 3En yumob garra meiksho yumob nomo meigim enibodi go langa det nogudbalawei du.
“Yumob irrim mi na. If yumob braja dum nogudbala ting langa yumob, wal yumob garra tok langa im, en if im sori blanga det ting, wal yumob garra larramgo im fri brom det nogudbala ting weya imbin dum langa yumob.aMethyu 18:15 4Nomeda maitbi im dum nogudbala ting langa yumob 7 taim langa wan dei, en ebritaim im kaman langa yumob en im tok, ‘Mi sori blanga det ting weya aibin dum langa yumob.’ Bat stil yumob garra larramgo im fri.” Lagijat na Jisas bin tok.
5Wal detlot speshalwan mishanri blanga Jisas bin dalim im, “Bos, melabat wikwan, en yu garra album melabat bilib langa God brabliwei.”
6Wal Jisas bin tok, “Nomeda yumob bilib lilbit, bat stil yumob gin dum bigbala wek blanga God. Trubala yumob garra dum bigbala wek blanga im. 7Bat yumob kaan reken miselp.
“Yumob jinggabat na. If sambodi abum wekinmen, wal wanim im dalim det wekinmen wen im binij im wek langa gadin o stakyad? Det bos nomo dalim im blanga go en dagat im daga streidawei. 8Im dalim im blanga go en gugum det daga blanga im bos. Det wekinmen garra gugum ola daga blanga det bos basdam, en wen det bos binij dagat en dringgimbat, det taim na im larram det wekinmen go en dagat im daga. 9En wen det wekinmen duwit langa im bos, det bos kaan tok theingkyu langa im, dumaji tharran na im wek. 10En im lagijat du langa yumob wekinmen blanga God. Wen yumob duwit langa God wanim im dalim yumob blanga dum, yumob garra tok, ‘Melabat oni wekinmen, en melabat bin dum melabat wek.’ Lagijat na yumob garra tok.”
Tenbala men garram leprasi
11Afta na wen Jisas bin trebulin blanga go langa Jerusalem, imbin bulurrum det roud langa det boda blanga det dubala kantri gulum Sameriya en Gelali, 12en wen imbin kamat langa wan lilwan taun deya, tenbala men garram leprasi bin midim im. Olabat bin jandap brom longwei, 13en deibin jingat langa im, “Jisas! Bos! Yu sori langa melabat!”
14Wal wen Jisas bin luk olabat, imbin tok, “Yumob go en larram det serramonimen luk yumob.”
Wal olabat bin go, en wen deibin wokwok langa det roud blanga go langa det serramonimen, olabat bin go gudbala na.bLabidakas 14:1-32
15-16Wal wanbala men deya bin brom det kantri Sameriya, en wen imbin luk det siknis bin libum im bodi en imbin gudwan, imbin gobek langa Jisas, en imbin jinginat theingkyu langa God adbala. Imbin gobek raitbek langa Jisas, en imbin buldan langa graun, en imbin tok theingkyu langa im.
17Wal Jisas bin dalim ola pipul deya, “Tenbala sikbala men bin go gudbala. Wal wujei detlot najalot? 18Wotfo oni wanbala bin kambek blanga sei theingkyu langa God? Dijan im brom najawan kantri. Bat imbin stil kambek.”
19Wal Jisas bin tok langa det wanbala men na, “God bin meigim yu gudbala, dumaji yubin bilib langa im. Wal yu gidap en go na.”
Det speshalwan men garra kambek
Methyu 24:23-28, 37-41
20Wal sambala serramonimen gulum Ferasi bin askim Jisas, “Wotaim God garra jandim det boswan hu garra jidan king blanga wi?”
Wal Jisas bin tok, “Yumob kaan luk wen det boswan garra kaman en jidan. 21Nobodi kaan tok, ‘Yu luk! Iya im!’ o ‘Deya im! Yu luk!’ Dumaji im garra jidan insaid langa ola pipul.”
22Afta na Jisas bin tok langa ola wekinmen blanga im, “Mi na det speshalwan men, en det taim garra kaman wen yumob garra wandi luk mi garra kambek. Bat yumob kaan luk yet. 23Sambala pipul garra tok langa yumob lagijat. Dei garra tok, ‘Yu luk! Iya im!’ o ‘Deya im! Yu luk!’ 24Bat yumob kaan go en lukabat mi ebriweya, dumaji wen det rait taim garra kaman, ai garra kambek jis laik det laitining weya im tjakam det lait ebriweya langa skai.
25“Bat bifo ai garra kambek lagijat, ai garra abum det pein basdam, en ai garra ardimbat du, en ola pipul hu jidan laibala tudei garra tjakidawei mi.
26“Det taim wen ai garra kambek garra jidan jis laik det taim blanga Nowa.cJenasis 6:5-8 27Ebribodi bin kipgon dagadagat daga en dringgimbat en merriyimbat gija raidap det dei wen Nowa bin gowin langa det bout en det fladwoda bin kaman en kilim olabat holot ded.dJenasis 7:6-24
28“Det taim wen ai garra kambek garra jidan jis laik det taim blanga Lot det san blanga Eibrahem braja. Ebribodi bin kipgon dagadagat daga en dringgimbat en baiyimbat enijing en selimbat enijing en plentimbat gadin en bildimbat haus. 29En det dei wen Lot bin gowei brom det taun gulum Sadam, det faiya en hotwan ston bin buldan brom top en kilim olabat holot ded.e,29Jenasis 18:20-19:25
30-31“Ai dalim yumob. Wen det taim garra kaman, det men weya im ontop langa im haus kaan godan blanga gajim enijing insaid langa det haus. En det men weya im wekin langa im gadin kaan gobek langa im kemp du.fMethyu 24:17,18; Mak 13:15,16
32“Yumob jinggabat det waif blanga Lot. Imbin lukbek, en imbin dai.gJenasis 19:26 33En if enibodi trai en seibum im ron laif, wal im garra lujim im laif. Bat if enibodi lujim im laif blanga mi, wal im seibum im laif.hMethyu 10:39; 16:25; Mak 8:35; Luk 9:24; Jon 12:25
34“Ai dalim yumob. Wen det taim garra kaman, if dubala silip, wal God garra deigidawei wanbala en libum det najawan biyain. 35-36En if dubala gel grandimbat det sid daga, wal God garra deigidawei wanbala en libum det najawan biyain.” Lagijat na Jisas bin tok.
37Wal ola wekinmen blanga Jisas bin askim im, “Bos, weya dijan ting garra hepin?”
En Jisas bin tok, “Ebriweya yu faindim dedbala enimul, ola bard dagat olabat deya gin, indit? Wal lagijat na ebriweya yu faindim pipul, God garra kadimat olabat deya gin.”

a17:3: Methyu 18:15

b17:14: Labidakas 14:1-32

c17:26: Jenasis 6:5-8

d17:27: Jenasis 7:6-24

e17:28: ,29Jenasis 18:20-19:25

f17:31: Methyu 24:17,18; Mak 13:15,16

g17:32: Jenasis 19:26

h17:33: Methyu 10:39; 16:25; Mak 8:35; Luk 9:24; Jon 12:25