Jisas bin pikimat 72 men
101Brom deya Jisas bin pikimat 72 men blanga go dubala dubala lida langa im ebriweya langa ol detlot taun weya imbin wandi go, 2en imbin dalim olabat, “Loda pipul ebriweya olabat redi blanga bulurrum God. Bat oni lilbit wekinmen blanga dalim olabat hau dei garra bulurrum im.
“Wal yumob garra askimbat God blanga jandim wekinmen blanga dalimbat detlot pipul.aMethyu 9:37,38 3En yumob garra go en dalimbat olabat du.
“Wal ai garra jandim yumob langa deinjawan pleis. Im jis laik weya lilwan kidikidi go langa det pleis weya ola wailwan dog jidanbat.bMethyu 10:16 4En yumob kaan garrimap mani o beig o but, en yumob kaan stap en tok langa enibodi langa roud. 5Yumob garra go streit langa det pleis, en wen yumob gowin langa enibodi haus, yumob kaan tok eniwei. Yumob garra jis tok, ‘God garra meigim yumob jidan gudwei.’ Lagijat na yumob garra tok. 6En if det bos blanga det haus nomo agri langa yumob wen yumob tok det wed, wal God kaan album im jidan gudwei. Bat if im agri langa yumob, wal God garra album im, 7en yumob garra jidan langa det wan haus. Yumob kaan go eniwei. Oni deya na langa det wanbala haus yumob garra dagadagat daga. Det men im garra lukaftum yumob blanga dagasaid dumaji yumob dumbat wek blanga God.cFes Karinthiyans 9:14; Fes Timathi 5:18
8“En wen yumob go langa eni taun en dei welkam yumob, nomeda wanim dei garra gibit langa yumob blanga dagat, bat stil yumob garra dagat. 9En yumob garra meigim ola sikbala pipul langa det taun gudbala, en yumob garra dalim ola pipul deya. Yumob garra tok, ‘God wandim yumob blanga bulurrum im brabliwei.’ Lagijat na yumob garra tok.
10“En wen yumob go langa eni taun en dei nomo welkam yumob, wal yumob garra go en jandap langa midul langa det roud, 11en yumob garra tok, ‘Dijan taun blanga yumob bin dastim melabat, en melabat sheikim ola das brom melabat fut blanga gibit yumob woning. Yumob jinggabat na. God bin wandim yumob blanga bulurrum im brabliwei.’ Lagijat na yumob garra tok.dMethyu 10:7-14; Mak 6:8-11; Luk 9:3-5; Eks 13:51
12“Wal ai dalim yumob wekinmen main, wen det taim garra kaman weya God garra jadjim ebribodi, im garra panishim ol detlot nogudbala pipul langa det taun gulum Sadam. Bat im garra panishim brabliwei ol detlot pipul weya nomo welkam yumob.” Lagijat na Jisas bin tok langa detlot 72 men.eJenasis 19:24-28; Methyu 10:15; 11:24
Detlot taun weya nomo bilib
Methyu 11:20-24
13Afta na Jisas bin tok, “Im brabli nogud blanga ola pipul langa det dubala taun gulum Korasin en Bethsaida, dumaji aibin dum loda klebabala ting langa det dubala taun. Bat dei nomo bin bilib langa mi. En if ola nogudbala pipul langa det dubala taun gulum Taya en Saidan bin luk ol detlot klebabala ting weya aibin dum langa Korasin en Bethsaida, dei bina tenim miselp brom det nogudbalawei blanga olabat, en dei bina werrimon det sekbeigwan klos en rabum miselp garram eshis blanga shoum God olabat sori blanga ola nogudbala ting weya deibin dumbat.fAisaiya 23:1-18; Isikiyel 26:1-28:26; Jowal 3:4-8; Eimos 1:9,10; Sekaraiya 9:2-4
14“Wal wen det taim garra kaman weya God garra jadjim ebribodi, im garra panishim detlot nogudbala pipul langa Taya en Saidan. Bat im garra panishim brabliwei ol detlot pipul langa Korasin en Bethsaida. 15En ola pipul langa det taun gulum Kapeniyam reken dei garra go langa hebin du. Bat najing. God garra tjakamdan olabat langa det helfaiya.” Lagijat na Jisas bin tok.gAisaiya 14:13-15
16Afta na Jisas bin dalim im wekinmen olabat, “If enibodi lisin langa yumob, wal im lisin langa mi du. En if enibodi nomo teiknodis langa yumob, wal im nomo teiknodis langa mi du. En if im nomo teiknodis langa mi, wal im nomo teiknodis langa main dedi du.” Lagijat na Jisas bin tok.hMethyu 10:40; Mak 9:37; Luk 9:48; Jon 13:20
17Brom deya detlot 72 men bin go langa ol detlot taun, en wen deibin kambek langa Jisas, deibin brabli gudbinji, en deibin tok, “Bos, wen melabat bin yusumbat yu neim, ol detlot dibuldibul bin duwit wanim melabat bin dalim olabat.”
18Wal Jisas bin dalim olabat, “Aibin luk Seitin det boswan dibuldibul, en imbin buldan brom hebin jis laik laitining.
19“Wal yumob irrim mi na. Ai gibit yumob pawa en meigim yumob bos wulijim yumob gin wok ontop langa sneik en skopiyan, en yumob gin go oba det pawa blanga det enami blanga wi, en nomo enijing kaan ardim yumob.iOla Saam 91:13 20En nomeda yumob garram det pawa blanga meigim ola nogudwan spirit duwit langa yumob, bat stil yumob kaan gudbinji blanga tharran. Yumob garra gudbinji dumaji God bin raidimdan yumob neim langa hebin.” Lagijat na Jisas bin tok langa detlot 72 men.
21Wal det taim na det Holi Spirit bin meigim Jisas brabli gudbinji, en Jisas bin tok langa God na, “Dedi, yu na bos langa hebin en langa dijan kantri, en ai gibit yu theingks, dumaji loda ting deya yu nomo bin shoum langa detlot pipul hu gulum miselp klebabala. Bat yubin shoum detlot ting langa detlot pipul hu nomo gulum miselp klebabala. Yuwai, main dedi, yubin dum lagijat na, dumaji yubin wandim lagijat.”
22Afta na Jisas bin tok langa ola pipul deya, “Main dedi bin gibit mi ebrijing. Bat nobodi kaan sabi main dedi san. Oni main dedi sabi im san. En nobodi kaan sabi main dedi du. Oni mi na sabi im, dumaji mi na det san blanga im. En detlot pipul weya ai garra pikimat en shoum main dedi langa olabat, detlot pipul du garra sabi main dedi.”jJon 3:35; 10:15
23Afta na Jisas bin tenaran, en imbin tok langa im wekinmen olabat, “Yumob brabli lakiwan, dumaji yumob luk loda ting weya nobodi bin luk bifo. 24Ai dalim yumob. Ol detlot longtaimwan mesinja blanga God en ol detlot longtaimwan bos langa dijan kantri bin ol wandi luk detlot ting. Bat dei nomo bin luk. En deibin wandi irrim wanim yumob irrimbat. Bat dei nomo bin irrim.” Lagijat na Jisas bin tok.
Wan lowamen bin wandi trikim Jisas
25Brom deya wan lowamen bin kaman langa Jisas blanga trikim im, en imbin tok, “Titja, wanim ai garra dum blanga jidan laibala olagija?”
26Wal Jisas bin tok, “Wanim det lowa weya deibin raidimdan langa oltestaman im tok? Wanim yubin ridim deya?”
27Wal det lowamen bin tok, “‘Yu garra laigim God brabliwei. Yu garra gibit miselp laif langa im. Holbit yu garra gibit miselp langa im. En yu garra abum filing oni blanga im, en yu garra jinggabat im oldei langa yu main, en yu garra adwek blanga im.’ en ‘Yu garra laigim ola najalot pipul brabliwei jis laik yu laigim miselp.’” Lagijat na det lowamen bin tok.kLabidakas 19:18; Dyudaranami 6:5
28Wal Jisas bin tok, “Trubala tharran yu tok. En if yu duwit, wal yu garra jidan laibala olagija.”lLabidakas 18:5; 22:35-40; Mak 12:28-34
29Wal det lowamen bin wandi bekat na, en imbin askim Jisas, “Wal hu najalot pipul ai garra laigim?”
30Wal Jisas bin tok, “Wantaim wan men bin gowei brom Jerusalem blanga go langa det najawan taun gulum Jeriko, en wen imbin wokwok langa roud, sambala men bin grebum im, en deibin beldim im, en deibin pulumat im ola enijing, en deibin kilim im haf ded, en deibin libum im deya wansaid langa det roud.
31“Bambai na wan serramonimen bin wokwok langa det seimwan roud, en wen imbin luk det hafdedwan men, imbin gopas det said langa det roud. 32En lagijat gin wan men brom det Libai klen hubin wekinmen blanga detlot serramonimen bin wokwok langa det seimwan roud, en wen imbin luk det hafdedwan men, imbin go en lukinat langa im gulijap. Bat im nomo bin dum enijing blanga album det men. Imbin jis wokawei brom det hafdedwan men.
33“Bambai na wan men bin brom det kantri gulum Sameriya bin wokwok langa det seimwan roud. Im nomo bin kantrimen blanga det hafdedwan men seimwei laik det naja dubala. Bat wen imbin luk det men leidanbat deya, imbin fil sori blanga im,
34en imbin go langa im, en imbin pudum det oil en wain medisin langa im, en imbin bendijimap im, en afta imbin pikimap det men, en imbin pudum im ontop langa im ronwan dongki, en imbin deigim im langa wan haus, en imbin maindim im deya.m,34Sekan Kranakuls 28:15
35“Ailibala neksdei na det Sameriya men bin gibit sambala mani langa det boswan blanga det haus, en imbin dalim det boswan, ‘Yu maindim det men, en wen ai kambek, ai garra peiyim yu blanga enijing weya yubin dum blanga im.’”
36Wal Jisas bin askim det lowamen na, “Wujan men brom detlot thribala men bin laigim det hafdedwan men?”
37En det lowamen bin tok, “Det men hubin album im.”
En Jisas bin tok, “Wal yu garra go en dumbat lagijat du.”
Dubala sista neim Matha en Meri
38Bambai na Jisas en im wekinmen olabat bin kamat langa det lilwan taun weya det gel neim Matha bin jidan, en det gel bin welkam olabat langa im haus.
39Wal det gel bin abum sista neim Meri, en Meri bin jidan deya lisinbat langa Jisas wen imbin titjimbat ola pipul langa det haus,n,39Jon 11:1 40en im sista Matha bin nogudbinji, dumaji imbin dumbat ola wek miselp.
Wal Matha bin kaman langa Jisas, en imbin tok, “Bos, wotfo yu nomo jinggabat mi. Main sista bin libum ola wek langa mi blanga dum. Wal yu dalim im blanga kaman en album mi.”
41Wal Jisas bin tok, “Matha, yu oldei jinggabat en wori blanga olkain ting. 42Oni wanbala ting yu garra jinggabat. En yu sista Meri bin sabi det rait ting, en nobodi kaan deigidawei det ting brom im.”

a10:2: Methyu 9:37,38

b10:3: Methyu 10:16

c10:7: Fes Karinthiyans 9:14; Fes Timathi 5:18

d10:4-11: Methyu 10:7-14; Mak 6:8-11; Luk 9:3-5; Eks 13:51

e10:12: Jenasis 19:24-28; Methyu 10:15; 11:24

f10:13: Aisaiya 23:1-18; Isikiyel 26:1-28:26; Jowal 3:4-8; Eimos 1:9,10; Sekaraiya 9:2-4

g10:15: Aisaiya 14:13-15

h10:16: Methyu 10:40; Mak 9:37; Luk 9:48; Jon 13:20

i10:19: Ola Saam 91:13

j10:22: Jon 3:35; 10:15

k10:27: Labidakas 19:18; Dyudaranami 6:5

l10:25-28: Labidakas 18:5; 22:35-40; Mak 12:28-34

m10:33: ,34Sekan Kranakuls 28:15

n10:38: ,39Jon 11:1