God lowa en olabat grengrenfatha lowa
Methyu 15:1-9
71-4Ol detlot Juwish pipul bin abum lowa blanga washimbat olabat bingga bifo dei dagat daga, dumaji longtaim detlot serramonimen bin meigimbat olkainaba lowa blanga washimbat enijing. Wen dei baiyim eni daga brom shop, dei garra washim det daga bifo olabat dagat, en dei garra washimbat olabat kap en jag en sospen en olabat sweig du. Deibin meigimbat ol detlot lowa, dumaji deibin reken detkain ting garra meigim God gudbinji langa olabat.
Wal sambala serramonimen gulum Ferasi en sambala lowamen bin kaman brom Jerusalem, en deibin midap garram Jisas, en deibin luk sambala wekinmen blanga im bin dagadagat daga garram dardiwan bingga. Dei bina washim olabat bingga basdam. Bat najing.
5Wal detlot serramonimen en lowamen bin askim Jisas, “Wotfo yu wekinmen olabat nomo bulurrum det lowa weya bin kamat longtaim brom wi grengrenfatha olabat? Wotfo olabat dagadagat daga garram dardibala bingga?”
6Wal Jisas bin tok, “Longtaim det speshalwan mesinja blanga God neim Aisaiya bin tok trubala wed blanga yumob tufeis pipul. Imbin tok, ‘Dislot pipul tok gudbalawei blanga God garram olabat maus. Bat insaid langa olabat hat dei nomo jinggabat God. 7Nomeda dei weship langa God, bat stil dei nomo teiknodis langa im. Olabat reken dei bulurrum God lowa. Bat najing. Olabat bulurrum olabat ron lowa.’ Lagijat na det speshalwan mesinja bin tok.a,7Aisaiya 29:13
8“Wal ol yumob serramonimen, yumob lagijat na. Yumob tjakidawei det lowa blanga God, en yumob bulurrum yumob ron lowa. 9Yumob bin faindim klebabalawei blanga libum det lowa blanga God wulijim yumob gin bulurrum yumob ron lowa. 10Det lowa weya God bin gibit langa Mosis im tok, ‘Yu garra rispek en teiknodis langa yu mami en dedi dubala.’ En im tok, ‘If enibodi mokimbat im mami en dedi, dei garra kilim im ded.’bEksadas 20:12; 21:17; Labidakas 20:9; Dyudaranami 5:16 11Bat yumob titjimbat ola pipul nomo blanga bulurrum det wed blanga God. Yumob dalim olabat wen dei abum enijing, dei gin tok langa olabat mami en dedi, ‘Dijan im seikridwan. Im blanga God. Ai kaan gibit yunbala.’ 12En wen yumob lenim enibodi lagijat, yumob reken im rait weya im nomo album im mami en dedi. 13En wen yumob titjim ola pipul blanga dum enijing lagijat, yumob titjim olabat nomo blanga bulurrum det wed blanga God. Olkain nogudbala ting lagijat na yumob oldei dumbat.” Lagijat na Jisas bin tok langa detlot serramonimen.
14Afta na Jisas bin jingat langa ola pipul, en imbin dalim olabat, “Yumob irrim mi en jinggabat na. 15-16Wen yu dagat enijing, im nomo meigim yu nogudwan wen im gowin insaid langa yu. Oni detlot ting weya kamat brom insaid langa yu hat, detlot ting na meigim yu nogudwan.”
17Afta wen imbin tok lagijat, Jisas bin libum detlot pipul, en imbin gowin langa haus, en detlot wekinmen blanga im bin askim im blanga dalim olabat wanim imbin tokinabat, 18en Jisas bin dalim olabat, “Wotfo yumob askimbat mi? Yumob bina sabi na. Wen yu dagat enijing, det daga kaan meigim yu nogudwan wen im gowin insaid langa yu, dumaji im nomo gowin langa yu hat. 19Im gowin langa yu binji, en afta im kamat brom yu bodi.”
Wal wen Jisas bin tok lagijat, imbin dalim im wekinmen olabat dei gin dagat enikain daga.
20-21Afta na Jisas bin kipgon tok, “Detlot ting weya kamat brom insaid langa yu hat, detlot ting na meigim yu nogudwan, dumaji brom insaid langa yu hat yu oldei jinggabat nogudbalawei blanga dum olkain nogudbala ting. 22Yu jinggabat blanga stilimbat en kilimbat en silip garram najamen waif en meigim miselp gridi en dalimbat laiya. Insaid langa yu hat na yu oldei jinggabat blanga dumbat olkain nogudbala ting, en yu jidan nomo garram sheim, en yu jelasjelas, en yu tokinabat enibodi, en yu jidan blasbala. Yu nomo jinggabat gudbalawei, najing. 23Yumob sabi na? Ola nogudbala ting kamat brom insaid langa yu hat, en detlot ting na meigim yu nogudwan.” Lagijat na Jisas bin tok.
Olgamen brom longwei kantri
Methyu 15:21-28
24Afta na Jisas bin gowei brom deya, en imbin go gulijap langa det taun gulum Taya deya langa det kantri gulum Siriyafanisha, en imbin gowin langa wan haus deya, dumaji im nomo bin wandim enibodi blanga sabi imbin deya. Bat nomeda imbin trai en blandim miselp, bat stil pipul bin faindim im.
25-26Wal wan olgamen deya bin abum doda hubin abum nogudbala spirit insaid langa im, en wen det olgamen bin irrim det nyus blanga Jisas, nomeda im nomo bin kantrimen blanga im, bat stil imbin go streidawei langa Jisas, en imbin buldan langa im futwei, en imbin askim Jisas blanga andimwei det dibuldibul brom insaid langa im doda.
27Wal Jisas bin tok, “Yu irrim mi na, olgamen, dumaji yunmi nomo kantrimen gija. Ai garra gibit daga langa main biginini basdam. Ai kaan pulumat daga brom main biginini en gibit langa dog.” Lagijat na Jisas bin tok, dumaji imbin wandi lukaftumbat im ron kantrimen basdam.
28Wal det olgamen bin tok, “Trubala tharran yu tok. En ai sabi yu kantrimen gulum melabat dog. Bat ola dog oldei dagat detlot daga weya detlot biginini meigim buldan langa graun. En nomeda mi nomo kantrimen blanga yu, bat stil ai wandim yu garra album mi.”
29Wal Jisas bin tok, “Yubin ensim mi klebawei. En blanga tharran na yu gin gobek langa yu kemp na. Yu doda im rait. Det dibuldibul bin gowei brom im.”
30Wal det olgamen bin gobek langa im kemp, en imbin faindim im doda leidanbat langa im sweig gudbala, en im nomo bin abum det dibuldibul na.
Defwan men
31Afta na Jisas bin gowei brom det pleis weya imbin jidan, en imbin go thru det taun gulum Saidan, en imbin kipgon langa Leik Gelali, en imbin goran sanraiswei langa det kantri gulum Dikapalas, 32en deya na sambala pipul bin bringimap wanbala men langa Jisas. Det men bin def, en im nomo bin oldei tok gudwei, en detlot pipul bin askim Jisas blanga pudum im bingga langa det defwan men.
33Wal Jisas bin gajim det men, en dubala bin gowei longwei brom detlot pipul, en Jisas bin pudum im bingga langa det men irriwol, en imbin spit, en imbin tatjim im tang, 34en imbin lukap langa top, en imbin fil sori blanga det men, en imbin tok langa det men na. Garram im ron langgus imbin tok, “Opinap na.” 35En streidawei wen imbin tok lagijat, det men irriwol bin opin, en det tang blanga im bin go luswan, en imbin tok gudwei na.
36Wal Jisas bin dalim detlot pipul nomo blanga dalim ebribodi blanga tharran. Bat wen imbin tok lagijat langa olabat, deibin jis kipgon dalimbat enibodi blanga im, 37en ebribodi hubin irrim det nyus bin ol hatjamp brabliwei, en deibin tok, “Im meigim defwan irrim, en im meigim damwan tok gudwei. Im dum ebrijing brabli gudbalawei.”

a7:6: ,7Aisaiya 29:13

b7:10: Eksadas 20:12; 21:17; Labidakas 20:9; Dyudaranami 5:16