Jisas langa im ron taun
Methyu 13:53-58; Luk 4:16-30
61Afta na Jisas bin gowei brom det pleis garram im wekinmen olabat, en deibin gobek langa im ron kantri langa Nesareth weya imbin growap, 2en wen det Sebathdei bin kaman, Jisas bin go langa det Miting Pleis blanga ola Juwish pipul deya langa det taun.
Wal bigmob pipul bin deya langa det Miting Pleis, en Jisas bin stat toktok langa olabat, en wen deibin irrim im tok, deibin ol hatjamp, en deibin askimbat miselp, “Brom weya imbin gajim ol dislot stori? Hubin meigim im kleba lagijat? Weya imbin gajim det pawa blanga toktok lagijat? 3Wi sabi im det kapinta, det san blanga Meri. Wi sabi im braja blanga Jeims en Josef en Judas en Saiman. En im sista olabat iya langa wi.” Lagijat na deibin tok, en dei nomo bin teiknodis langa im na.
4Wal Jisas bin dalim olabat, “Pipul ebriweya oldei shoum rispek langa ola speshalwan mesinja blanga God. Bat detlot pipul langa olabat ron taun kaan rispek olabat. Olabat ron femili en rileishan kaan teiknodis langa olabat en rispek olabat.” Lagijat na Jisas bin tok.aJon 4:44 5Wen imbin langa detlot pipul langa im ron taun imbin brabli nogudbinji, dumaji dei nomo bin bilib langa im. En im nomo bin dum eni klebabala ting deya. Imbin oni pudum im bingga langa sambala sik pipul en meigim olabat gudbala.
Jisas bin dalim im wekinmen blanga dum wek
Methyu 10:5-15; Luk 9:1-6
6Afta na Jisas bin gowei brom Nesareth, en imbin go langa ola najalot lilwan taun langa det kantri, en imbin titjimbat ola pipul.
7Bambai na Jisas bin tok langa detlot twelbala wekinmen blanga im, “Dubaladubala yumob garra go ebriweya en titjimbat ola najalot pipul, en ai gibit yumob pawa blanga andimwei nogudbala spirit.
8“Wal wen yumob go, yumob kaan deigim enijing garram yumob. Yumob kaan garrimap daga o beig o mani. Oni det wokinstik na yumob gin garrimap. 9En yumob gin werrimon but. Bat yumob kaan garrimap eni speyawan klos. 10En wen yumob kamat langa eni taun, en olabat welkam langa yumob, wal yumob garra jidan langa det wan haus raidap yumob gowei brom det taun. 11En wen yumob kamat langa eni taun, en dei nomo welkam langa yumob en dei nomo lisin langa yumob, wal yumob garra gowei brom det taun. Bat bifo yumob gowei, yumob garra sheikim ola das brom yumob fut blanga gibit woning langa olabat, dumaji God garra panishim olabat.” Lagijat na Jisas bin tok.bLuk 10:4-11; Eks 13:51
12Wal detlot wekinmen bin go ebriweya, en deibin dalimbat ola pipul blanga tenim miselp brom ola nogudbalawei blanga olabat, 13en deibin andimwei dibuldibul brom insaid langa loda pipul, en deibin rabum loda sik pipul garram det oil medisin, en deibin meigim detlot sik pipul gudbala.cJeims 5:14
Herod bin kilim Jon Beptis
Methyu 14:1-12; Luk 9:7-9
14Wal det nyus blanga Jisas bin spredat ebriweya, en King Herod bin irrim det nyus.
Wal sambala pipul bin tok, “Jisas garram pawa blanga dumbat olkain klebabala ting, dumaji im na det Jon Beptis. King Herod bin kilim im ded. Bat imbin gidap laibala.” 15Bat najalot pipul bin tok, “Nomo. Im det speshalwan mesinja blanga God hubin jidan longtaim neim Ilaija.” En najalot pipul bin tok, “Nomo. Im speshalwan mesinja jis laik ol detlot najalot mesinja hubin wokaran iya bifo.”d,15Methyu 16:14; Mak 8:28; Luk 9:19
16Wal wen King Herod bin irrim detlot wed, imbin tok, “Im na Jon Beptis. Aibin kadimof im hed. Bat imbin gidap laibala brom dedbala.”
17Wal Herod bin jinggabat na wanim imbin dum langa Jon Beptis bifo. Imbin dalim im wekinmen olabat blanga go en grebum im en taiyimap im garram tjein en pudum im langa jeil. 18Herod bin dum lagijat langa Jon Beptis, dumaji imbin merrit langa im ron braja Filip waif neim Herodiyas, en Jon Beptis bin dalimbat im, “Yu kaan pulumat det gel brom yu braja en merrit langa im. Im nomo rait.”e,18Luk 3:19,20
19Wal det gel bin heidim Jon brabliwei, en imbin wandi kilim im. Bat Herod nomo bin larram im kilim im, dumaji imbin bradin langa Jon. 20Imbin sabi Jon bin gudbala men en imbin speshalwan wekinmen blanga God, en im nomo bin larram enibodi ardim Jon. Imbin oldei laigim irrim Jon toktok. Bat wen imbin oldei irrim det wed, det wed bin oldei meigim im nogudbinji langa im main.
21-22Afta na det gel Herodiyas bin abum tjens. Wen King Herod bin abum im bethdei padi, bigmob pipul bin deya, en det doda blanga Herodiyas bin dens blanga olabat.
Wal King Herod en ola gabman bos en ola ami bos en ola boswan lida brom Gelali, deibin ol gudbinji wen deibin luk det gel dens, en afta King Herod bin tok langa det gel, “Yu gin askim mi enijing yu wandim, en ai garra gibit yu. 23Ai pramisim yu enijing yu askim mi. Enijing yu wandim, ai garra gibit langa yu.”
24Wal det gel bin go, en imbin askim im mami, “Wanim ai garra askim im, mami?”
En im mami bin tok, “Yu askim im blanga det hed blanga Jon Beptis.”
25Wal streidawei det gel bin go langa King Herod, en imbin askim im lagijat na, “Ai wandim det hed blanga Jon Beptis langa pleit.”
26Wal det king bin brabli nogudbinji na. Bat imbin lafta duwit, dumaji imbin meigim det pramis langa det gel wen ol detlot boswan men bin deya.
27Wal King Herod bin jandim wan solja langa det jeilhaus, en det solja bin kadimof Jon Beptis hed, 28en imbin pudum im hed langa pleit, en imbin bringimbek det pleit garram det hed, en imbin gibit langa det gel, en det gel bin gibit langa im mami.
29Wal wen detlot wekinmen blanga Jon Beptis bin irrim det bednyus blanga Jon, deibin go en gajim im bodi, en deibin berrim im.
Jisas bin fidim 5,000 men
Methyu 14:13-21; Luk 9:10-17; Jon 6:1-14
30Bambai na ol detlot speshalwan mishanri blanga Jisas bin kambek langa im, en deibin dalim im blanga ol detlot ting weya olabat bin dumbat en blanga ebrijing weya olabat bin titjimbat langa detlot pipul ebriweya weya deibin go.
31Wal bigismob pipul bin kaman deya langa olabat, en olabat nomo bin abum taim blanga dagat daga, en Jisas bin dalim im wekinmen olabat, “Kaman na. Wi lafta gowei samweya langa kwaitwan pleis blanga abum spel.”
32Wal deibin gowei garram olabat bout langa kwaitwan pleis. 33Bat loda pipul bin luk olabat deya langa det bout, en deibin sabi olabat, en loda pipul brom ol detlot taun bin go futwok lida langa olabat, en detlot pipul bin kamat langa det pleis bifo olabat bin kamat.
34Bambai na wen Jisas bin kamat brom det bout, imbin luk detlot bigismob pipul, en imbin fil sori blanga olabat, dumaji wen imbin luk olabat, deibin jis laik ship nomo garram enibodi blanga maindimbat olabat. En Jisas bin stat titjimbat olabat olkain ting.fNambas 27:17; Fes Kings 22:17; Sekan Kranakuls 18:16; Isikiyel 34:5; Methyu 9:36
35Wal wen imbin gulijap sangodan, ola wekinmen blanga Jisas bin kaman langa im, en deibin tok, “Dijan im leitbala na, en wi longwei brom taun. 36Wal yu jandimwei dislot pipul wulijim dei gin go langa detlot gulijapwan fam en taun blanga baiyim olabat daga.”
37Bat Jisas bin tok, “Yumob na garra gibit olabat daga.”
Wal wen Jisas bin tok lagijat, detlot wekinmen bin hatjamp, en deibin tok, “Wanim yubin tok? Yu wandim melabat blanga weistimbat wan yiya weijis blanga baiyim naf daga blanga dismob pipul iya?”
38Wal Jisas bin dalim olabat, “Yumob go en luk haumatj daga yumob garram.”
Wal deibin go en luk, en deibin dalim im, “Wi garram faibala damba en dubala fish.”
39Wal Jisas bin dalim im wekinmen olabat blanga kadimatbat detlot pipul en meigim olabat jidan langa lilwanlilwan grup ebriweya langa det grinwan gras, 40en detlot pipul bin jidan maitbi 100 o maitbi 50 langa ebri lilwan grup. 41En wen deibin jidan lagijat, Jisas bin gajim detlot daga en det dubala fish, en imbin lukap langa top, en imbin gibit theingks langa God, en afta imbin breigim detlot daga, en imbin gibit langa im wekinmen blanga gibitat langa detlot pipul. En seimwei igin imbin dum langa det dubala fish.
42Wal ebribodi bin dagat na, en deibin ol sedisfaid, 43en afta detlot wekinmen bin bilimap twelbala baskit garram ola leftobawan daga en fish. 44En det namba blanga detlot men hubin dagat deya bin 5,000.
Jisas bin wok ontop langa woda
Methyu 14:22-33; Jon 6:15-21
45Wal wen ol detlot pipul bin binij dagadagat det daga, streidawei Jisas bin meigim im wekinmen olabat gowin langa det bout, en imbin dalim olabat blanga go lida langa det pleis gulum Bethsaida najasaid langa det bigwan woda.
Afta na Jisas bin jandimwei detlot pipul, 46en wen imbin gudbai langa olabat, imbin gowap langa det hil miselp blanga prei.
47Wal wen imbin naitaim, det bout garram ola wekinmen bin langa milwoda, en Jisas bin miselp langa det hil.
48Bambai na Jisas bin luk detlot wekinmen blanga im bin adwek pedulumbat det bout, dumaji det win bin blowim langa olabatwei.
Wal wen imbin longwei deilait bifo det san bin gidap, Jisas bin wok ontop langa det woda. Imbin wandi gopas langa im wekinmen olabat. 49-50Bat deibin faindim im wokwok ontop langa det woda, en deibin jingat adbala, en deibin bradin brabliwei, dumaji deibin reken im dibuldibul.
Wal Jisas bin jingat langa olabat, “Mi dijan. Yumob nomo bradin.” 51En imbin galimap langa det bout garram olabat, en det win bin stap na, 52en detlot wekinmen bin hatjamp brabliwei, dumaji wen deibin gowei garram det bout, dei nomo bin jinggabat wotkain men Jisas wen imbin fidim det bigmob pipul garram det faibala daga. Deibin jadimap olabat hat en main.
Sikbala pipul langa Genesaret
Methyu 14:34-36
53Wal Jisas en im wekinmen olabat bin krosim det bigwan woda garram det bout, en deibin kamat langa det pleis gulum Genesaret, 54en deibin taiyimap det bout, en wen deibin libum det bout, ola pipul bin luk Jisas, en streidawei deibin sabi im.
55Wal sambala pipul bin go thru langa det kantri, en deibin dalimbat ebribodi blanga Jisas, en wen detlot pipul bin gedim det nyus wujei Jisas im jidan, deibin garrimap ola sikbala pipul langa olabat sweig blanga go langa im.
56Ebriweya weya Jisas bin go langa taun en langa fam, pipul bin oldei bringimap ola sikbala pipul langa im, en deibin askimbat im blanga larram detlot sikbala pipul tatjim im klos, en imbin meigim detlot pipul hubin tatjim im klos, gudbala.

a6:4: Jon 4:44

b6:8-11: Luk 10:4-11; Eks 13:51

c6:13: Jeims 5:14

d6:14: ,15Methyu 16:14; Mak 8:28; Luk 9:19

e6:17: ,18Luk 3:19,20

f6:34: Nambas 27:17; Fes Kings 22:17; Sekan Kranakuls 18:16; Isikiyel 34:5; Methyu 9:36