Jisas bin gidap laibala brom greib
Methyu 28:1-8; Luk 24:1-12; Jon 20:1-10
161Afta na wen det Sebathdei bin binij, detlot thribala gel neim Meri Megdalin en Meri det mami blanga Jeims en det najawan gel neim Salomi, deibin baiyim det gudsmelwan medisin blanga rabum det bodi blanga Jisas, 2en Sandei ailibala wen det san bin gidap, deibin go langa det greib, 3en langa roud deibin askim miselp, “Hu garra pushumwei det bigwan ston brom det dowa?”
4Wal wen detlot gel bin kamat langa det greib deya, deibin luk det bigwan ston nomo bin deya langa det dowa,
5en deibin gowin insaid langa det keib, en deibin luk wanbala yangboi deya. Det yangboi bin werrimon longwan waitwan klos, en imbin jidanbat raidensaid langa det keib.
Wal detlot gel bin gida shok brabliwei wen deibin luk det yangboi deya langa det dowa, 6en det yangboi bin tok langa olabat, “Yumob nomo bradin. Ai sabi hu yumob lukabat. Yumob lukabat det bodi blanga Jisas brom Nesareth. Imbin dai langa det kros. Bat imbin gidap laibala na. Yumob luk det pleis weya deibin pudum im bodi. Im nomo deya. 7Wal yumob go en dalim detlot wekinmen blanga Jisas. Yumob garra tok, ‘Jisas garra go lida langa yumob langa Gelali. Deya na yumob garra luk im jis laik imbin dalim yumob basdam.’ En yumob garra dalim Pida lagijat du.” Lagijat na det einjul bin tok langa detlot gel.aMethyu 26:32; Mak 14:28
8Wal detlot gel bin ranawei brom det greib na, en deibin brabli hatjamp, en deibin sheikin nomo lilbit, en dei nomo bin dalim enibodi wanim deibin luk, dumaji olabat bin bradin.
Jisas bin shoum miselp langa Meri Megdalin
Methyu 28:9,10; Jon 20:11-18
9Wal afta wen Jisas bin gidap laibala, imbin shoum miselp langa Meri Megdalin basdam. Longtaim imbin andimwei sebenbala dibuldibul brom insaid langa det gel. 10Wal det gel bin go, en imbin dalim detlot pipul hubin oldei wokabat garram Jisas. Olabat bin kraikrai dumaji Jisas bin dai, 11en wen det gel bin dalim olabat Jisas bin gidap en imbin luk im laibala, olabat nomo bin bilib langa det gel.
Jisas bin shoum miselp langa dubala wekinmen blanga im
Luk 24:13-35
12Afta na Jisas bin shoum miselp langa dubala wekinmen blanga im wen dubala bin wokwok langa roud blanga go langa najawan taun. Dubala bin luk Jisas bin luk difrin, 13en wen dubala bin gobek en dalim detlot najalot wekinmen, olabat nomo bin bilib langa dubala.
Jisas bin shoum miselp langa detlot lebenbala wekinmen
Methyu 28:16-20; Luk 24:36-49; Jon 20:19-23; Eks 1:6-8
14Bambai na Jisas bin shoum miselp langa detlot lebenbala wekinmen blanga im wen deibin dagadagat daga, en imbin graul langa olabat, dumaji olabat nomo bin bilib imbin gidap laibala. Dei nomo bin abum irriwol wen detlot pipul hubin luk im bin dalim olabat imbin gidap laibala, en dei nomo bin bilib langa olabat.
15Wal Jisas bin tok langa detlot wekinmen blanga im, “Yumob garra go langa ebri kantri en dalimbat det gudnyus langa ebribodi.bEks 1:8
16“En God garra panishim detlot pipul hu nomo bilib langa det gudnyus, en im garra seibum detlot pipul hu bilib langa det gudnyus en beptais. 17En detlot pipul hu bilib garra dumbat olkain klebabala ting. Dei garra andimwei dibuldibul wen dei yusum main neim, en dei garra tok difrinkain langgus, 18en if sneik baidim olabat wen dei holdim garram olabat bingga, det sneik kaan ardim olabat, en if dei dringgim poisinbala, wal im kaan poisinim olabat, en wen dei garra pudum olabat bingga langa sikbala pipul, God garra meigim olabat gudbala.” Lagijat na Jisas bin tok.
God bin deigimwei Jisas langa hebin
Luk 24:50-53; Eks 1:9-11
19Wal wen Jisas bin binij toktok langa ola wekinmen blanga im, God bin deigidawei im langa hebin, en deya na imbin jidan raidensaid langa God.cEks 1:9-11
20Wal ol detlot wekinmen bin go, en deibin dalimbat det gudnyus ebriweya na, en Jisas bin deya garram olabat, en imbin gibit olabat im pawa blanga dumbat detlot klebabala ting, en detlot klebabala ting na bin jidan pruf blanga det gudnyus.
Binij na.

a16:7: Methyu 26:32; Mak 14:28

b16:15: Eks 1:8

c16:19: Eks 1:9-11