Mak
Mak Bin Dalim Ola Stori Blanga Jisas
Jon bin beptaisimbat pipul
Methyu 3:1-12; Luk 3:1-18; Jon 1:19-28
11Dijan stori na det gudnyus blanga Jisas Krais det san blanga God.
2Longtaim det speshalwan mesinja blanga God neim Aisaiya bin raidimdan langa oltestaman wanim God bin tok, “God garra jandim det mesinja blanga im lida langa det san blanga im, en det mesinja garra meigim ebrijing redi blanga det san blanga go deya.aMelakai 3:1 3Det mesinja garra jinginatbat langa deset kantri, dalimbat ola pipul blanga meigim det roud redi blanga det boswan en blanga streitinimat det wei blanga im wulijim im gin go langa olabat.” Lagijat na Aisaiya bin tok longtaim.bAisaiya 40:3
4-6Wal bambai na det mesinja bin kaman. Imbin neim Jon, en imbin go en jidan langa bush kantri, en imbin werrimon detlot klos weya deibin oldei meigim garram kemul heya, en imbin werrimbat lethawan belt, en imbin oldei dagadagat grashopa en shugabeig.
Wal bigmob pipul brom Judiya en brom Jerusalem bin ol go langa Jon, en Jon bin toktok langa olabat. Imbin dalimbat olabat lagijat, “Yumob garra libum ol yumob nogudbalawei, en yumob garra beptais wulijim God garra larramgo yumob fri brom detlot nogudbala ting weya yumob bin oldei dumbat.” Lagijat na Jon bin oldei tok.
Wal detlot pipul bin onap, en deibin dalimbat Jon blanga olabat nogudbalawei, en imbin beptaisimbat olabat langa det Jodan Riba,cSekan Kings 1:8; 7en imbin dalim olabat, “Det men weya garra kaman biyain langa mi, im mowa haibala langa mi. Mi lobala langa im, en mi nomo gudinaf blanga dum enijing blanga im. 8Ai beptaisim yumob garram woda. Bat im garra beptaisim yumob garram det Holi Spirit.” Lagijat na Jon bin tok.
Jon bin beptaisim Jisas
Methyu 3:13-4:11; Luk 3:21,22; 4:1-13
9Wal det taim na Jisas bin kaman brom Nesareth deya langa det kantri gulum Gelali, en imbin kaman langa Jon, en Jon bin beptaisim im langa det Jodan Riba,
10en wen Jisas bin gidap brom det woda, imbin luk det skai bin opin, en imbin luk det Holi Spirit bin kamdan langa im jis laik det bard gulum dab, 11en God bin tok brom top, “Yu na main ronwan san. Mi laigim yu, en mi brabli gudbinji langa yu.”dJenasis 22:2; Ola Saam 2:7; Aisaiya 42:1; Methyu 3:17; 12:18; Mak 9:7; Luk 3:22
12Wal streidawei det Holi Spirit bin meigim Jisas gowei langa bush kantri, 13en imbin jidanbat deya 40 dei, en Seitin bin oldei temtimbat im. En olkain wailwan enimul bin deya du. Bat sambala einjul bin kaman en lukaftumbat im.
Jisas bin pikimat fobala fishamen
Methyu 4:12-22; Luk 4:14,15; 5:1-11
14Bambai na deibin pudum Jon Beptis langa jeil, en afta Jisas bin go langa Gelali, en deya na imbin dalimbat ola pipul det gudnyus blanga God, 15“Det speshalwan bosmen weya God garra jandim, imbin kaman na. Wal yu garra libum det nogudbalawei en bilib langa det gudnyus.”eMethyu 3:2
16Brom deya Jisas bin wokwok wansaid langa Leik Gelali. Deya na imbin luk det dubala braja gija neim Saiman en Endru. Dubala bin gajimbat fish garram fishnet, dumaji dubala bin fishamen.
17Wal Jisas bin tok langa dubala, “Yunbala kaman garram mi. Ai garra lenim yunbala blanga gajimbat pipul blanga God.”
18Wal streidawei det dubala braja gija bin libum dubala fishnet en ebrijing, en dubala bin bulurrum Jisas.
19Wal Jisas bin kipgon, en imbin faindim naja dubala braja gija, det dubala san blanga Sebadi neim Jeims en Jon. Dubala bin deya insaid langa det bout meigimbat ola fishnet redibala blanga fishing.
20Wal wen Jisas bin jingat langa dubala, streidawei dubala bin libum dubala dedi deya langa det bout garram ola wekinmen, en dubala bin bulurrum Jisas.
Jisas bin andimwei nogudbala spirit
Luk 4:31-37
21Brom deya Jisas en im wekinmen olabat bin go langa det taun gulum Kapeniyam, en wen imbin Sebathdei, Jisas bin go langa det miting pleis blanga ola Juwish pipul, en imbin toktok langa olabat, 22en ol detlot pipul deya bin ol hatjamp wen deibin irrim im toktok, dumaji im nomo bin titjimbat olabat seimwei laik detlot lowamen bin oldei titjimbat. Imbin titjimbat olabat garram pawa.fMethyu 7:28,29
23Wal wan men bin kaman deya insaid langa det Juwish Miting Pleis, en imbin abum nogudwan spirit insaid langa im, en imbin jingat adbala langa Jisas, 24“Jisas brom Nesareth, wotfo yubin kaman iya langa melabat? Yubin kaman blanga binijimap melabat? Ai sabi hu yu. Yu na det Holiwan hubin kaman brom God.”
25Wal Jisas bin tok langa det nogudbala spirit na, “Yu jidan kwait en kamat brom det men.”
26Wal wen Jisas bin tok lagijat, det nogudbala spirit bin meigim det men deigim fit, en det nogudbala spirit bin jingat adbala, en imbin kamat brom det men.
27Wal ol detlot pipul deya bin gida shok, en deibin askim miselp, “Wanim dijan? Im difrinkain ting dijan. Det men im tok garram pawa. Im tok langa nogudbala spirit, en dei duwit langa im.”
28Wal streidawei det nyus blanga Jisas bin spredat ebriweya langa Gelali.
Jisas bin album bigmob sikbala
Methyu 8:14-17; Luk 4:38-41
29Wal Jisas bin gowei brom det Juwish Miting Pleis garram det fobala wekinmen blanga im neim Saiman, Endru, Jeims en Jon. Deibin go langa det kemp blanga Saiman en Endru, 30en deya na deibin faindim det olgamen blanga Saiman waif mami bin leidanbat langa im sweig sikwan. Det bodi blanga im bin barnbarn nomo lilbit.
Wal wen Jisas bin kamat deya langa det haus, deibin dalim im blanga det olgamen, 31en imbin go langa det olgamen, en imbin holdim im bingga, en imbin lidimap im, en det siknis bin gowei brom im, en afta det olgamen bin gidap, en imbin gibit olabat daga.
32Afta na wen det san bin godan, deibin bringimap ola sikbala pipul langa Jisas, en deibin bringimap ol detlot pipul hubin abum nogudwan dibuldibul insaid langa olabat du. 33Ebribodi brom det taun bin ol majurrumap miselp atsaid langa det haus, 34en Jisas bin meigim ol detlot sikbala gudbala. Imbin deigidawei olkainaba siknis brom olabat, en imbin andimwei ol detlot nogudbala dibuldibul brom insaid langa olabat du, en Jisas nomo bin larram detlot dibuldibul blanga tok enijing, dumaji deibin sabi hu im.
Jisas bin go ebriweya langa Gelali
Luk 4:42-44
35Ailibala neksdei na Jisas bin gidap, en imbin gowei brom det haus, en imbin gowei atsaid brom det taun, en imbin jidan miselp blanga prei.
36Wal Saiman en im fren olabat bin go lukabat Jisas, 37en wen deibin faindim im, deibin tok, “Ebribodi lukabat yu.”
38Wal Jisas bin dalim olabat, “Wi garra go langa ol detlot najalot pleis wulijim ai garra dalim ola pipul det gudnyus, dumaji blanga tharran na aibin kaman.”
39Brom deya Jisas en im wekinmen olabat bin go ebriweya langa Gelali, en imbin toktok langa ola Juwish Miting Pleis, en langa ola taun imbin andimweibat dibuldibul brom insaid langa pipul.gMethyu 4:23; 9:35
Wanbala leprasimen
Methyu 8:1-4; Luk 5:12-16
40Wal wanbala sikbala men deya langa wan taun bin abum det brabli nogudwan sowa gulum leprasi ebriweya langa im bodi, en imbin kaman langa Jisas, en imbin buldan lida langa im, en imbin tok, “Jisas, if yu wandim, yu gin meigim mi gudbala brom ol dislot sowa.”
41Wal Jisas bin brabli sori blanga det men, en imbin pudum im bingga langa im, en imbin tok, “Yuwai. Mi wandim. Wal yu gudbala na.” 42En streidawei ol detlot sowa bin gowei brom det men, en imbin gudbala na.
43-44Wal Jisas bin tok adbala langa det men na, “Yu nomo dalim enibodi aibin meigim yu gudbala. Yu garra go streit langa det serramonimen en shoum miselp langa im. Im garra tjekoba langa yu basdam, en afta yu garra abum det sekrifais serramoni blanga shoum ola pipul yu gudbala na. Det lowa na God bin gibit langa Mosis, en yu garra duwit.” Lagijat na Jisas bin tok langa det men, en imbin jandimwei im na.hLabidakas 14:1-32
45Bat det men nomo bin duwit langa Jisas. Imbin go en spredimatbat det nyus blanga Jisas ebriweya, en wen det men bin toktok lagijat, ola pipul bin sabi Jisas na, en dei nomo bin gibit im rum blanga gowin langa eni taun. Imbin lafta stap atsaid langa bush kantri. Bat stil pipul bin kaman langa im brom ebriweya.

a1:2: Melakai 3:1

b1:3: Aisaiya 40:3

c1:6: Sekan Kings 1:8;

d1:11: Jenasis 22:2; Ola Saam 2:7; Aisaiya 42:1; Methyu 3:17; 12:18; Mak 9:7; Luk 3:22

e1:15: Methyu 3:2

f1:22: Methyu 7:28,29

g1:39: Methyu 4:23; 9:35

h1:44: Labidakas 14:1-32