Yu nomo wandi faindim folt en pudum bleim langa enibodi
Luk 6:37,38,41,42
71-2“Wal yumob irrim mi na. Yu nomo wandi faindim eni folt langa enibodi blanga enijing, dumaji God garra tridim yu seimwei laik yu tridim najalot pipul. If yu faindim eni folt langa enibodi, wal God garra faindim folt langa yu du. En if yu pudum bleim langa enibodi, wal God garra pudum bleim langa yu du.aMak 4:24
3-4“Yumob jinggabat na. If yu braja abum lilwan wadi langa im ai, en seimtaim yu abum bigwan wadi langa yu ron ai, wal yu kaan go en deigimat det lilwan wadi brom yu braja ai, dumaji wen yu abum bigwan wadi langa yu ron ai, yu kaan luk gudwei, en yu kaan dalim yu braja yu garra deigimat det lilwan wadi brom im ai. 5En if yu trai en deigimat det lilwan wadi brom yu braja ai, wal yu brabli granggibala. Yu si? Yu garra deigimat det bigwan wadi brom yu ron ai basdam, en afta yu gin luk gudwei, en yu gin deigimat det lilwan wadi brom yu braja ai na. Yu sabi na? Yu garra streitinimap yu ron laif basdam, en afta yu gin go en album yu braja streitinimap im laif. 6Wi nomo gibit holiwan ting langa det dog o gibit gudwan nekleis langa det bigibigi, dumaji dei nomo sabi im gudwan ting, najing. Im mait tenaran en baidim wi o pudumbut langa det gudwan ting. Wal seimwei yu kaan go en tok eniwei langa enibodi. Yu garra pikimat detlot raitwan pipul, dumaji detlot najalot pipul garra gitwail langa yu, en dei garra meigimbat fan langa det trubala wed blanga God.
7-8“Wal yumob jinggabat na. Yu garra askim God blanga ebrijing, en yu garra gedim detlot ting, dumaji enibodi hu askim God blanga enijing garra gedim det ting. En yu garra lukabat det wei blanga God, en yu garra faindim det wei blanga im, dumaji enibodi hu lukabat det wei blanga im garra faindim det wei. Im jis laik yu garra nok langa det dowa blanga im, en det dowa garra opin blanga yu, dumaji God garra opin det dowa blanga enibodi hu nok langa det dowa. 9Lagijat na God garra dum, dumaji wen yu ron san askim yu blanga daga, wanim yu gibit im? Yu gibit im ston o yu gibit im det daga? Yu gibit im det daga. 10En wen yu san askim yu blanga fish, wanim yu gibit im? Yu gibit im jigiwan sneik o yu gibit im det fish? Yu gibit im det fish. 11Yu sabi na? Nomeda yu nogudbala, bat stil yu sabi blanga gibit gudbala ting langa yumob biginini olabat. En wi sabi wi dedi langa hebin im gudbala, en im oldei gibit gudbala ting langa detlot pipul hu askim im.
12“Wal yumob sabi wanim mi toktok na? Ol detlot lowa en ola wed weya detlot speshalwan mesinja blanga God bin raidimdanbat, dei ol garram det seimwan mining. Ol detlot lowa en ol detlot wed tok, yu garra dumbat langa najalot pipul seimwei yu wandim olabat garra dumbat langa yu. If yu wandim olabat garra tridim yu gudbalawei, wal yu garra tridim olabat gudbalawei.bLuk 6:31
Det dubalawei
Luk 13:24
13“Wal ai dalim yumob. Yu garra gowin thru langa det lilwan geit, dumaji det geit langa det helfaiya im bigwan, en det roud im brabli isiwan blanga bulurrum, en loda pipul bulurrum det roud. 14Bat det geit langa det trubala laif im brabli lilwan, en det roud im brabli ad blanga bulurrum, en oni lilbit pipul faindim det roud.
Detlot daga blanga gudwan en nogudwan tri
Luk 6:43,44
15“Ai dalim yumob. Yu garra wotjim miselp, dumaji loda pipul garra kaman en reken miselp speshalwan mesinja blanga God, en dei garra tok laiyawei blanga meigim yu bilib langa olabat wei. En wen dei kaman langa yu, dei garra luk jis laik gudbala pipul. Bat insaidwei olabat brabli nogudbala. 16En if yu luk brabliwei langa ebrijing weya dei oldei dumbat, wal yu garra sabi wotkain pipul olabat. Im jis laik weya detlot fama luk langa ola daga tri. Dei sabi det tri im gudwan o nogudwan wen dei luk wotkain daga im garram. Detlot greip daga kaan gro langa det nogudwan bindiyai bushis, en det gudwan daga gulum fig kaan gro langa det nogudwan jigibalawan tri. 17-18En det gudwan daga tri kaan abum nogudwan daga, dumaji im oldei abum gudwan daga. En det nogudwan tri kaan abum gudwan daga, dumaji im oldei abum nogudwan daga. 19En detlot fama oldei kadimdan ol detlot tri weya nomo growimap gudwan daga, en dei oldei tjakam detlot tri langa faiya.cMethyu 3:10; Luk 3:9 20En im lagijat du langa detlot laiyawan mesinja. If yu luk brabliwei langa ebrijing weya dei dumbat, wal yu garra sabi wotkain olabat.dMethyu 12:33
21“Loda pipul garra kaman en gulum mi bos. Bat dei kaan go langa hebin, dumaji dei nomo dumbat wanim main dedi langa hebin wandim olabat blanga dum, 22en wen det dei garra kaman weya God garra jadjimbat ebribodi, detlot pipul garra tok, ‘Bos, melabat bin tok olkain wed brom God garram yu neim, en melabat bin andimwei loda dibuldibul garram yu neim, en melabat bin dumbat olkainaba klebabala ting garram yu neim!’ 23Bat ai garra tok, ‘Ai nomo sabi yumob. Gowei brom mi ol yumob nogudbala pipul!’eOla Saam 6:8
Dubala men bin bildimap haus
Luk 6:47-49
24“Wal yumob irrim mi na. If enibodi kaman langa mi, en im lisin langa main wed, en im duwit langa det wed, wal im jis laik det men hubin bildimap im haus langa gudwan rokibala pleis brabli gudwei.
25Wen det win en rein en det fladwoda bin kaman, dei nomo bin deigidawei det haus, dumaji det men bin bildimap det haus brabli strongbala langa det rokibala pleis. 26Bat detlot pipul hu irrim main wed, en dei nomo duwit, olabat jis laik det najawan men hubin bildimap im haus eniwei langa sengraun. 27Wen det win en rein en fladwoda bin kaman, streidawei det haus bin buldan, en det fladwoda bin deigidawei det haus holot.”
28Lagijat na Jisas bin tok langa ol detlot pipul, en wen imbin binij dalimbat stori langa olabat, deibin ol jidan kwaitbala brabli, dumaji imbin titjimbat olabat difrinwei brom ol detlot lowamen. 29Imbin titjimbat olabat garram pawa.f,29Mak 1:22; Luk 4:32

a7:2: Mak 4:24

b7:12: Luk 6:31

c7:19: Methyu 3:10; Luk 3:9

d7:20: Methyu 12:33

e7:23: Ola Saam 6:8

f7:28: ,29Mak 1:22; Luk 4:32