Jon bin beptaisimbat pipul
Mak 1:1-8; Luk 3:1-18; Jon 1:19-28
31-4Longtaim det speshalwan mesinja blanga God neim Aisaiya bin tok langa oltestaman, “Sambodi deya im jinginatbat langa bush kantri. Im dalimbat ola pipul blanga meigim det roud redibala blanga det boswan, en im dalimbat olabat blanga streitinimat det wei blanga im blanga kaman langa olabat.” Lagijat na Aisaiya bin tok longtaim.
Wal bambai na det sambodi bin kaman. Imbin neim Jon Beptis, en imbin oldei werrim detlot klos weya deibin meigim garram kemul heya, en imbin oldei werrim lethawan belt, en blanga im daga imbin oldei dagadagat grashopa en shugabeig.
Wal Jon bin go langa det bush kantri deya langa Judiya, en imbin dalimbat ola pipul, “Yumob garra tenim miselp brom det nogudbalawei, dumaji im gulijap taim blanga det bos blanga wi garra kaman.”aMethyu 4:17; Mak 1:15; Aisaiya 40:3; Sekan Kings 1:8
5Wal bigmob pipul bin kaman brom Jerusalem en brom ebriweya langa det kantri gulum Judiya en brom ebriweya langa det Jodan Riba kantri. Deibin go en lisin langa Jon Beptis toktokbat, 6en loda pipul bin shoum miselp langa im. Deibin onap langa im blanga olabat nogudbalawei weya deibin dumbat, en afta imbin beptaisim olabat langa det Jodan Riba.
7Bambai na Jon Beptis bin luk loda serramonimen gulum Ferasi en Sedyusi bin kaman langa im blanga beptais, en imbin dalim olabat, “Yumob kaninbala! Hubin dalim yumob blanga ranawei brom God wen im garra panishimbat yumob?bMethyu 12:34; 23:33 8Yumob kaan bogi langa dijan riba en meigim miselp gudwan. If yumob bin tenim miselp brom yumob nogudbalawei, wal yumob garra shoum garram gudbala ekshan. 9Maitbi yumob reken God kaan panishim yumob dumaji yumob grengrensan blanga Eibrahem. Bat yumob rong. Ai dalim yumob. If God wandim, im gin binijimap ola pipul, en im gin gajim dislot ston iya en meigim nyuwan grengrensan blanga Eibrahem brom ston!cJon 8:33 10Ai sabi yumob jis laiga nogudwan tri. Wal God garram im tomiyauk redi blanga kadimdan detlot nogudwan tri weya nomo meigim gudbala daga. Im garra rudimat ola nogudwan en tjakidawei olabat en barnimap olabat langa faiya.dMethyu 7:19
11“Yumob irrim mi na. Det boswan weya garra kaman biyain langa mi, im mowa haibala langa mi. Mi lobala langa im, en mi nomo gudinaf blanga dum enijing blanga im. Ai garra beptaisim yumob garram woda wen yumob tenim miselp brom yumob nogudbalawei. Bat det boswan garra beptaisim yumob garram det Holi Spirit, en im garra barnimap jis laik faiya langa ol detlot nogudbala ting brom yumob. 12En im redi blanga kaman jis laiga fama wen im kadimat ola gudwan daga brom det nogudwan pat. Im garra hipimap ola gudwan, en im garra barnimap ola nogudwan langa det olagijawan faiya.” Lagijat na Jon Beptis bin tok langa detlot serramonimen.
Jon bin beptaisim Jisas
Mak 1:9-11; Luk 3:21,22
13Bambai na Jisas bin kaman brom Gelali, en imbin go langa Jon Beptis, dumaji Jon garra beptaisim im langa det Jodan Riba. 14Bat Jon bin trai en tenimran im, en Jon bin tok, “Wotfo yubin kaman langa mi? Ai kaan beptaisim yu. Yu na garra beptaisim mi.”
15Wal Jisas bin tok, “Nomo. Yu na garra beptaisim mi, dumaji God wandim lagijat na.”
Wal Jon bin lafta duwit langa Jisas, 16en imbin beptaisim im, en wen Jisas bin kamat brom det woda, det skai bin opinap, en Jisas bin luk det Holi Spirit bin kamdan langa im jis laiga dab, 17en God bin tok brom hebin, “Dijan na main ronwan san. Mi laigim im nomo lilbit, en mi brabli gudbinji blanga im.”eJenasis 22:2; Ola Saam 2:7; Aisaiya 42:1; Methyu 12:18; 17:5; Mak 1:11; Luk 9:35

a3:2-4: Methyu 4:17; Mak 1:15; Aisaiya 40:3; Sekan Kings 1:8

b3:7: Methyu 12:34; 23:33

c3:9: Jon 8:33

d3:10: Methyu 7:19

e3:17: Jenasis 22:2; Ola Saam 2:7; Aisaiya 42:1; Methyu 12:18; 17:5; Mak 1:11; Luk 9:35