Stori blanga padi
Luk 14:15-24
221Brom deya Jisas bin dalim ola pipul dijan stori na, 2“Detlot pipul hu kaman en bulurrum det nyubalawei blanga God, olabat jis laik detlot pipul hubin go langa bigbala padi weya wan king bin abum blanga im san wen imbin merrit. 3Det king bin askim sambala pipul blanga kaman langa det padi, en wen imbin taim blanga det padi, imbin jandim im wekinmen olabat blanga go en dalim olabat blanga kaman. Bat dei nomo bin wandi go langa det padi.
4“Wal det king bin jandim najalot wekinmen langa olabat, en detlot wekinmen bin dalim olabat, ‘Det padi im redi na. Deibin kilim ola gudwan buligi, en deibin gugum det bifpat, en ebrijing redi. Wal yumob kaman langa det padi na.’ 5Bat detlot pipul nomo bin lisin langa detlot wekinmen. Deibin jis kipgon dumbat olabat ron enijing. Wan men bin go langa im fam, en najawan men bin go langa im shop. 6En detlot najalot men bin grebum detlot wekinmen blanga det king, en deibin beldim olabat en kilim olabat ded.
7“Wal det king bin gitwail na, en imbin jandim im solja olabat blanga kilim detlot pipul hubin kilim im wekinmen olabat, en detlot solja bin kilim olabat ded, en deibin barnimap olabat haus du. 8Afta na det king bin jingat langa ola najalot wekinmen blanga im, en imbin dalim olabat, ‘Det padi im redi na. Bat detlot pipul weya aibin dalim blanga kaman kaan kaman na, dumaji dei nomo bin teiknodis langa mi. 9Wal yumob go ebriweya langa taun, en yumob dalim ebribodi weya yumob faindim blanga kaman langa det padi.’
10“Wal detlot wekinmen bin go ebriweya langa det taun, en deibin faindim loda gudwan pipul en nogudwan pipul, en deibin majurrumap olabat holot langa det haus blanga abum det padi, en deibin jadimap det haus.
11“Wal wen det king bin gowin, imbin luk ola pipul deya, en imbin luk wanbala men deya nomo werrimon det raitwan klos blanga det padi, en imbin dalim det men, 12‘Main fren, hau yubin gowin iya nomo garram det raitwan klos?’ Bat det men nomo bin tok enijing langa im, 13en det king bin dalim im wekinmen olabat blanga taiyimap det men langa bingga en langa fut en blanga tjakam im atsaid weya imbin dakbala, en deya na det men garra kraikrai en sori miselp.”aMethyu 8:12; 25:30; Luk 13:28
14Lagijat na Jisas bin dalim det stori, en wen imbin binij imbin tok, “Yumob sabi wanim mi tok langa det stori? Loda pipul garra irrim det wed blanga God. Bat oni lilbit im garra pikimat blanga jidan garram im.”
Trikiwan kwestjan blanga teksmani
Mak 12:13-17; Luk 20:20-26
15Wal detlot serramonimen gulum Ferasi bin gowei brom deya na, en deibin meigim olabat plen blanga trikim Jisas garram olabat kwestjan, 16en deibin jandim sambala wekinmen blanga olabat en sambala wekinmen blanga det gabman bos neim Herod, en detlot wekinmen bin go langa Jisas, en deibin tok, “Titja, melabat sabi yu oldei tok det trubala wed streidat langa enibodi, en yu nomo teiknodis wanim enibodi jinggabat. Nomeda det men im jidan haibala. Bat stil yu oldei dalim im streidat blanga wanim God wandim im blanga dum. 17Wal yu dalim melabat na. Yu reken im rait det haibala gabman bos gin meigim melabat peiyim teks mani langa im? Melabat garra pei det teks mani o najing?”
18Wal Jisas bin sabi deibin wandi trai en trikim im, en imbin tok, “Yumob tufeis pipul. Yumob kaan trikim mi. 19Yumob shoum mi wotkain mani yumob yusum blanga pei det teks.”
Wal deibin bringimap wanbala mani langa im, 20en imbin askim olabat, “Blanga hu pitja en neim jidan langa dijan mani?”
21En deibin tok, “Blanga det brabli haibala gabman bos.”
Wal Jisas bin tok, “Wal yumob garra gibitbek langa det gabman bos detlot ebrijing blanga im, en yumob garra gibitbek langa God detlot ebrijing blanga im du.”
22Wal wen detlot men bin irrim Jisas tok lagijat, deibin ol hatjamp brabliwei, en deibin gowei.
Trikiwan kwestjan blanga dedbala
Mak 12:18-27; Luk 20:27-40
23Afta na sambala serramonimen gulum Sedyusi bin kaman langa Jisas. Detlot serramonimen bin reken dedbala pipul kaan gidap laibala,bEks 23:8 24en deibin askim Jisas kwestjan blanga tharran, dumaji deibin wandi trai en trikim im. Deibin tok, “Titja, Mosis bin gibit melabat wan lowa weya im tok if eni men dai en im waif nomo bin abum biginini, wal det dedbala men braja garra gajim det gel en merrit langa im wulijim im garra abum biginini hu garra jidan jis laik im bigininimob.cDyudaranami 25:5
25“Wal wantaim sebenbala braja gija bin jidan, en det bigiswan bin merrit, en wen imbin dai, im nomo bin abum eni biginini. 26Afta na det sekanwan braja blanga im bin merrit langa det seimwan gel. Bat imbin dai du, en im nomo bin abum eni biginini du. Lagijat na imbin hepin langa ol detlot najalot faibala braja blanga dubala. Deibin ol merrit langa det seimwan gel, en wen deibin ol dai, dei nomo bin libum eni biginini. 27En afta det gel bin dai du.
28“Wal yu dalim melabat na. Wen det taim garra kaman weya ola dedbala pipul blanga gidap laibala, hu waif im garra jidan? Dumaji imbin merrit langa ol detlot sebenbala braja gija.” Lagijat na detlot serramonimen bin askim Jisas.
29Wal Jisas bin dalim olabat, “Yumob bin tok rongwei deya, dumaji yumob nomo sabi wanim im tok langa wed blanga God, en yumob nomo sabi det pawa blanga God du. 30Wen ola dedbala pipul garra gidap laibala, dei garra jidan seimwei laik ola einjul langa hebin, en dei kaan merrit gija. 31Wal wotfo yumob reken ola dedbala pipul kaan gidap laibala? Yumob bin ridim det oltestaman, indit? 32God bin tok, ‘Mi na det God blanga Eibrahem en blanga Aisik en blanga Jeikob.’ Wal yumob jinggabat na. God im God blanga laibala pipul. Im nomo God blanga dedbala pipul. Yu si? Yumob rong wen yumob tok dedbala pipul kaan gidap en jidan laibala.”dEksadas 3:6
33Wal wen ol detlot pipul deya bin irrim Jisas tok lagijat, deibin ol hatjamp brabli.
Trikiwan kwestjan blanga det haiwan lowa
Mak 12:28-34; Luk 10:25-28
34Wal wen detlot najalot serramonimen gulum Ferasi bin irrim nyus weya Jisas bin bidim detlot serramonimen gulum Sedyusi, deibin ol majurrumap miselp, en deibin kaman langa Jisas, 35en wan lowamen deya bin trai en trikim im. 36Imbin tok, “Titja, wujan lowa im brabli haiwan langa ola lowa?”
37Wal Jisas bin tok, “‘Yu garra laigim God brabliwei. Yu garra gibit miselp laif langa im. Brabliwei yu garra gibit miselp langa im, en yu garra abum filing oni blanga im, en yu garra oldei jinggabat im langa yu main.’eDyudaranami 6:5 38Tharran na det topwan en brabli haibala lowa. 39En det sekanwan haibala lowa im seim laik det feswan. Im tok, ‘Yu garra laigim ola najalot pipul brabliwei jis laik yu laigim miselp.’fLabidakas 19:18 40Ola najalot lowa bin kamat brom dijan dubala lowa na. Ol detlot lowa brom Mosis en ol detlot wed brom ola speshalwan mesinja blanga God bin ol kamat brom dijan dubala haibala lowa na.” Lagijat na Jisas bin tok, en wen imbin tok lagijat, imbin bidim detlot serramonimen.gLuk 10:25-28
Jisas bin askim adwan kwestjan blanga det Masaiya
Mak 12:35-37; Luk 20:41-44
41Brom deya sambala serramonimen gulum Ferasi bin majurrumap miselp, en Jisas bin askim olabat, 42“Wanim yumob reken? Hu det speshalwan bos dei gulum Masaiya? Im grengrensan blanga King Deibid?”
Wal detlot serramonimen bin tok, “Yuwai, im grengrensan blanga King Deibid.”
43Wal Jisas bin tok, “Wal wotfo det Holi Spirit bin dalim King Deibid blanga gulum im bos? 44Langa oltestaman Deibid bin tok, ‘God bin dalim main bos. Imbin tok, “Yu jidan iya langa main raidensaid raidap ai bidim ola enami blanga yu.”’ Lagijat na God bin tok langa det bos blanga King Deibid weya dei gulum Masaiya.hOla Saam 110:1
45“Wal yumob dalim mi na. Hau det Masaiya garra jidan grengrensan blanga Deibid wen Deibid bin gulum im bos?”
46Wal wen Jisas bin tok lagijat, nobodi bin wandi ensim im, en brom det taim na nobodi bin wandi askimbat im eni kwestjan blanga trai en trikimbat im.

a22:13: Methyu 8:12; 25:30; Luk 13:28

b22:23: Eks 23:8

c22:24: Dyudaranami 25:5

d22:32: Eksadas 3:6

e22:37: Dyudaranami 6:5

f22:39: Labidakas 19:18

g22:35-40: Luk 10:25-28

h22:44: Ola Saam 110:1