Wujan im mowa haibala langa melabat?
Mak 9:33-37; Luk 9:46-48
181Afta na detlot wekinmen blanga Jisas bin kaman langa im, en deibin askim im, “Wen yu kambek en jidan bos, wujan garra jidan mowa haibala langa melabat?”aLuk 22:24
2Wal Jisas bin gajim wan biginini, en imbin meigim im jandap langa midul langa olabat, 3en imbin tok, “Trubala ai dalim yumob. If yumob wandi jidan garram mi, wal yumob garra meigim miselp lobala jis laik dijan lilwan biginini iya? Dumaji if yumob meigim miselp haibala, wal yumob kaan jidan garram mi.bMak 10:15; Luk 18:17 4Yumob kaan meigim miselp haibala blanga jidan garram mi. If yumob wandi jidan haibala garram mi, wal yumob garra meigim miselp lobala jis laik dijan lilwan biginini iya. 5En if yumob album lilwan biginini, dumaji yumob laigim mi, wal im jis laik yumob albumbat mi. 6Wen lilwan biginini bilib langa mi en sambodi meigim im gowei brom mi, wal mobeda det sambodi taiyimap miselp garram bigbala ston en tjakam miselp langa woda en kilim miselp ded bifo im meigim det biginini bulurrum det nogudbalawei.
7“Im brabli adbala blanga ebribodi, dumaji loda ting deya deigidaweibat olabat brom det wei blanga mi. Detkain ting garra oldei hepin, en im brabli nogud blanga det men hu meigim detkain ting hepin. 8Ai dalim yumob. If det bingga o fut blanga yumob oldei meigim yumob dum nogudbala ting en deigidawei yumob brom main wei, wal mobeda yumob libum det nogudbala ting jis laik yumob kadimof det bingga o fut en tjakidawei. Im nogud blanga yumob if dei tjakidawei yumob langa det helfaiya garram dubala bingga en dubala fut. Mobeda yumob jidan garram det olagijawan laif garram wanbala bingga o wanbala fut.cMethyu 5:30 9En if det ai blanga yumob oldei meigim yumob dum nogudbala ting en deigidawei yumob brom main wei, wal mobeda yumob libum det nogudbala ting jis laik yumob deigimat det ai en tjakidawei. Im nogud blanga yumob if dei tjakidawei yumob langa det helfaiya garram dubala ai. Mobeda yumob jidan garram det olagijawan laif garram wanbala ai.dMethyu 5:29
Stori blanga wanbala los ship
Luk 15:3-7
10-11“Yumob sabi wanim mi toktok? Yumob nomo wandi tridim eni biginini o enibodi nogudwei, dumaji det einjul blanga im oldei jidan deya garram main dedi langa hebin.eLuk 19:10 12En wanim yumob reken det stakmen hu garram 100 ship garra dum wen wanbala ship gowei? Im garra libum detlot 99 ship fidabat langa pedik, en im garra go en lukabat det wanbala hubin los raidap im faindim im. 13En wen im faindim det ship, im garra gudbinji brabliwei. Im gudbinji blanga detlot 99 ship hu nomo bin los. Bat im brabli gudbinji blanga det wanbala ship weya imbin faidim im. 14En im lagijat du langa yumob dedi langa hebin. Im nomo wandim enibodi garra gowei brom im.
Yubin winimbek yu fren
15“Wen eni fren blanga yu dum nogudbala ting langa yu, wal yu garra go en tok langa im blanga det ting. Oni yunbala miselp garra tok gija. En if im lisin langa yu, wal yubin winimbek yu fren.fLuk 17:3 16Bat if im kaan lisin langa yu, wal yu garra go en tok langa im garram wanbala o maitbi dubala sambodi, dumaji sambodi garra witnis en irrim wanim yu tok langa im.gDyudaranami 19:15 17En if im stil kaan lisin langa yu, wal yu garra go en dalim ola pipul langa tjetj. En if im stil kaan lisin, wal yu garra tridim im jis laik im nomo yu kantrimen o jis laik im nogudbala men.
18“Trubala ai dalim yumob. Wen det tjetj nomo larramgo enibodi fri brom nogudbala ting, wal God kaan larramgo im fri du. Bat wen det tjetj larramgo im fri brom det nogudbala ting, wal God garra larramgo im fri du.hMethyu 16:19; Jon 20:23
19-20“Ai dalim yumob. If dubala pipul agri gija wen dei prei blanga enijing, main dedi langa hebin garra ensim det preya blanga dubala. Dumaji wen dubala o thribala majurrap blanga prei garram main neim, mi oldei deya garram olabat.” Lagijat na Jisas bin tok.
Det stori blanga det wekinmen hu nomo kainbala
21Afta na det wekinmen neim Pida bin kaman langa Jisas, en imbin tok, “Bos, if enibodi kipgon dumbat nogudbala ting langa mi, wal haumeni taim ai garra larramgo im? Maitbi sebenbala taim?”
22Wal Jisas bin tok, “Nomo. Yu kaan larramgo im oni sebenbala taim. Yu garra larramgo im 500 taim en mowa igin, dumaji God oldei kipgon larramgo yu fri.i,22Jenasis 4:24; Luk 17:3,4 23Im jis laik det king hubin wandi gedimbek detlot mani weya imbin lendim langa im wekinmen. 24Deibin bringimap wan wekinmen hubin owim det king detmatj mani, 25en det wekinmen nomo bin abum naf mani blanga peiyimbek det king. Det king bin tok blanga selim det wekinmen en im femili en ola enijing blanga im blanga gedimbek det mani weya imbin owim im. 26Bat det wekinmen bin buldan lida langa det king, en imbin askim im, ‘Yu gibit mi taim, en ai garra peiyimbek det mani!’ 27Wal det king bin sori langa det wekinmen, en imbin larramgo im fri. Imbin fogedabat det mani weya det wekinmen bin owim im.
28“Wal det wekinmen bin gowei brom deya, en imbin faindim najawan wekinmen hubin owim im lilbit mani, en imbin grebum im langa im throut, en imbin tok, ‘Yu gibit mi det mani weya yu owim mi!’ 29Wal det najawan wekinmen bin buldan lida langa im, en imbin askim im, ‘Yu gibit mi taim, en ai garra peiyimbek det mani!’
30Bat det feswan wekinmen nomo bin gibit im taim, en deibin pudum im langa jeil blanga meigim im peiyimbek im det mani.
31“Afta na ola najalot wekinmen bin luk wanim det feswan wekinmen bin dum langa det najawan wekinmen. Deibin nogudbinji, en deibin go langa det king, en deibin dalim im. 32Det king bin jingat langa det feswan wekinmen, en imbin tok, ‘Yu brabli nogudbala wekinmen! Aibin larramgo yu fri, dumaji yubin askim mi, en aibin fogedabat det bigwan mani weya yubin owim mi. 33Wal wotfo yu nomo bin kain langa det najawan wekinmen seimwei laik aibin kain langa yu?’ 34En det king bin gitwail na, en imbin pudum det feswan wekinmen langa jeil blanga meigim im peiyimbek im ola mani weya imbin owim im.
35“Yumob sabi na? Main dedi langa hebin garra tridim yumob lagijat na. If yumob nomo larramgo enibodi fri, wal God kaan larramgo yumob fri. Brom yumob hat yumob garra larramgo fri enibodi hu dum nogudbala ting langa yumob.” Lagijat na Jisas bin tok.

a18:1: Luk 22:24

b18:3: Mak 10:15; Luk 18:17

c18:8: Methyu 5:30

d18:9: Methyu 5:29

e18:11: Luk 19:10

f18:15: Luk 17:3

g18:16: Dyudaranami 19:15

h18:18: Methyu 16:19; Jon 20:23

i18:21: ,22Jenasis 4:24; Luk 17:3,4