Ilaija en Mosis bin tok langa Jisas
Mak 9:2-13; Luk 9:28-36
171Bambai na wanwiktaim Jisas bin deigim im thribala wekinmen neim Pida, Jeims en Jon. Deibin go ontop langa wan haibala hil, en deya na deibin jidan miselp, en detlot thribala wekinmen bin lukinatbat Jisas tjeinj. 2Im feis bin go shainiwan jis laik det san, en det klos blanga im bin go brabli shaini en waitwan jis laiga lait.
3Afta na detlot thribala wekinmen bin luk dubala men bin jandap wansaid langa Jisas. Det dubala men bin neim Mosis en Ilaija. Dubala bin brom longtaim, en dubala bin jandap deya toktok garram Jisas.
4Wal Pida bin tok langa Jisas na, “Bos, gudwei yubin bringimap melabat iya. Wal melabat garra meigim thribala hampi. wanbala blanga yu en wanbala blanga Mosis en wanbala blanga Ilaija.”
5Wal wen Pida bin stil toktok, wan bigwan klaud bin kamat langa olabat, en det shedo bin gaburrumap olabat, en deibin irrim God bin tok brom det klaud, “Dijan main san, en mi laigim im brabli, en yumob garra lisin langa im.”aJenasis 22:2; Dyudaranami 18:15; Ola Saam 2:7; Aisaiya 42:1; Methyu 3:17; 12:18; Mak 1:11; Luk 3:22; Sekan Pida 1:17,18
6Wal wen detlot wekinmen bin irrim det wed brom det klaud, deibin brabli bradin, en deibin buldan en pudum olabat feis langa graun.
7Afta na Jisas bin kaman langa olabat, en imbin pudum im bingga langa olabat, en imbin tok, “Yumob gidap na, en nomo bradin.”
8Wal detlot thribala wekinmen bin lukaran na. Bat nobodi bin deya. Oni Jisas bin jandap deya garram olabat.
9Wal wen deibin kamdan brom det hil, Jisas bin dalim olabat nomo blanga dalim enibodi wanim deibin luk raidap im garra gidap laibala brom dedbala. 10En deibin askim im, “Wotfo ola lowamen tok det speshalwan mesinja blanga God neim Ilaija garra kaman lida langa yu?”bMelakai 4:5
11Wal Jisas bin tok, “Trubala det mesinja garra kaman lida en meigim ebrijing redi. 12En ai dalim yumob. Det mesinja bin kaman olredi. Bat ola pipul nomo bin sabi im, en deibin tridim im nogudbalawei, en deibin dumbat enijing langa im weya deibin wandi dum. En dei garra tridim mi nogudbalawei lagijat gin.”cMethyu 11:14
13Wal wen Jisas bin tok lagijat, detlot wekinmen blanga im bin sabi imbin toktok blanga Jon Beptis.
Jisas bin deigimat det nogudbala spirit brom insaid det lilboi
Mak 9:14-29; Luk 9:37-43a
14Wal wen Jisas en detlot thribala wekinmen blanga im bin kambek langa detlot najalot wekinmen, deibin luk bigmob pipul deya langa olabat. Wan men bin kaman langa Jisas, en imbin buldan lida langa im, 15en imbin tok, “Bos, yu sori langa main san, dumaji im brabli sikbala, en im oldei deigimbat fit. Wen im deigim fit, im oldei buldan langa faiya, en im oldei buldan langa woda du. 16Aibin bringimap im langa yu wekinmen olabat. Bat dei nomo bin abum pawa blanga meigim im gudbala.”
17Wal Jisas bin tok langa ebribodi deya, “Wotfo yumob kaan bilib brabliwei? Wotfo yumob oldei dumbat nogudbala ting? Haulong ai garra stap iya garram yumob? En haulong ai garra kipgon shoumbat yumob? Wal bringimap det lilboi iya langa mi.”
18Wal wen deibin bringimap det lilboi langa im, Jisas bin tok streidat langa det nogudbala spirit hubin jidan insaid langa det lilboi, en streidawei det nogudbala spirit bin gowei brom im.
19Afta na detlot wekinmen blanga Jisas bin kaman langa im miselp, en deibin askim im, “Wotfo melabat nomo bin andimwei det nogudbala spirit brom det lilboi?”
20-21En Jisas bin tok, “Yumob nomo bin bilib brabliwei. Trubala ai dalim yumob. Nomeda yumob bilib lilbit, bat stil yumob gin dum enijing weya ebribodi reken nobodi kaan dum. If yumob bilib lilbit, yumob gin dum bigwan ting.”dMethyu 21:21; Mak 11:23; Fes Karinthiyans 13:2
Jisas tok im garra dai
Mak 9:30-32; Luk 9:43b-45
22Brom deya Jisas en im wekinmen olabat bin midap deya langa Gelali. Jisas bin dalim olabat im garra dai, “Mi na det speshalwan men weya God bin jandim, 23en dei garra gibit mi langa detlot men hu garra kilim mi ded. Bat thrideistaim ai garra gidap laibala brom dedbala.”
Wal wen im wekinmen olabat bin irrim im tok im garra dai, deibin ol nogudbinji brabli.
Jisas im tok blanga peiyim teks mani
24Brom deya Jisas en im wekinmen olabat bin go langa det taun gulum Kapeniyam.
Wal deibin abum sambala men deya langa det taun hubin oldei gajimbat ola teks mani blanga det Serramoni Pleis blanga ola Juwish pipul. Detlot men bin kaman langa Pida, en deibin askim im, “Wotabat Jisas det bos blanga yumob? Im oldei pei det teks mani blanga det serramoni pleis blanga wi?”eEksadas 30:13; 38:26
25Wal Pida bin tok, “Yuwai, im oldei pei.”
Afta na wen Pida bin gowin langa det haus weya Jisas bin jidan, Jisas bin askim Pida, “Saiman, wanim yu reken? Hu oldei pei det teks mani langa det king langa eni kantri? Det king oldei meigim im ron pipul pei o im meigim ola najalot pipul pei?”
26Wal Pida bin tok, “Im meigim ola najalot pipul pei.”
Wal Jisas bin tok, “Trubala yubin tok. Ola ron kantrimen blanga det king kaan pei det teks mani. En God im jis laiga king blanga yunmi, en yunmi kaan pei eni teks mani langa im. 27Bat wi nomo wandi meigim detlot men hubin tok langa yu apset. Wal yu go langa det Leik Gelali en tjakam lain, en yu garra pulumap wanbala fish garram naf mani insaid langa im maus blanga pei det teks mani blanga yunmi, en yu garra deigim det mani en pei yunmi teks.” Lagijat na Jisas bin tok.

a17:1-5: Jenasis 22:2; Dyudaranami 18:15; Ola Saam 2:7; Aisaiya 42:1; Methyu 3:17; 12:18; Mak 1:11; Luk 3:22; Sekan Pida 1:17,18

b17:10: Melakai 4:5

c17:12: Methyu 11:14

d17:20: Methyu 21:21; Mak 11:23; Fes Karinthiyans 13:2

e17:24: Eksadas 30:13; 38:26