Detlot pipul bin askim YAWEI blanga det serramoni nomo lau dagat daga
71Wal langa det namba 4 yiya weya Daraiyas bin jidan king, langa det namba 4 dei blanga det namba 9 manth gulum Kisleb, YAWEI bin gibit mi wed.
2Detlot pipul hubin jidan langa det taun gulum Bethel bin jandim sambala men langa det Serramoni Pleis blanga YAWEI det boswan God deya langa Jerusalem. Deibin jandim Sharesa en Regemalek en najalot men en deibin dalim olabat, “Yumob go langa det Serramoni Pleis blanga YAWEI en askim detlot serramonimen blanga prei blanga wi.
3“En yumob askim detlot serramonimen en speshalwan mesinja if wi garra jidan nomo dagadagat eni daga blanga shoum wi jidan soribala langa det namba 5 manth, dumaji longtaim detlot solja bin breigimap holbit det Serramoni Pleis.”
4Wal dijan na det wed weya YAWEI bin gibit mi blanga detlot pipul. 5Imbin tok, “Dalim ola pipul en ola serramonimen blanga det kantri, ‘Blanga 70 yiya langa det namba 5 manth en langa det namba 7 manth yumob bin jidan soriwei en yumob nomo bin dagat daga bat yumob bin dum lagijat blanga shoum rispek langa mi? Najing, yumob nomo bin rispek langa mi. 6En wen yumob abumbat bigwan padi en dagadagat en dringgimbat yumob nomo bin jinggabat mi du. Yumob bin oni wandim meigim yumob selp gudbinji. 7Dijan det seimwan wed weya aibin dalim yumob femili olabat bifo najalot pipul bin deigimwei olabat langa olabat kantri. Longtaim aibin jandim speshalwan mesinja garram dijan seimwan wed langa detlot pipul hubin jidan langa det gudtaim wen deibin abum blendi daga en klos en gudwan haus, en wen sambala bin jidan langa Jerusalem en sambala bin jidan langa ola lilwan taun gulijap, en sambala bin jidan langa det gudwan kantri sauthwei en sambala sangodanwei.’”
8Wal YAWEI det boswan God bin kipgon gibit mi dijan wed, 9“Dijan na det wed weya aibin jandim langa detlot pipul longtaim bifo yumob bin abum ola trabul. Yumob garra oldei dumbat rait ting langa yumob selp en tridim gija gudwei, en yumob garra albumbat gija en jidan kainbala. 10Yumob kaan gibit adtaim langa detlot widogel, en langa detlot biginini hu nomo garram mami en dedi. Yumob nomo gibit adtaim langa detlot pipul brom naja kantri hu jidan garram yumob, o langa detlot po pipul. En yumob nomo jidan en jinggabat hau blanga ardim gija.
11“Longtaim aibin dalim main pipul, yumob grengrenfatha olabat, tharran, bat dei nomo bin teiknodis. Deibin jadimap olabat irriwol langa mi en deibin gibit mi bekboun, 12en dei nomo bin irrim main lowa en det wed weya main spirit bin gibit langa detlot speshalwan mesinja longtaim. Dumaji dei nomo bin teiknodis langa main wed, wal aibin gitwail nomo lilbit. 13Dumaji dei nomo bin irrim mi wen aibin tok langa olabat, wal ai nomo bin irrim olabat wen deibin tok langa mi. 14En laik bigwan saiklon win weya kaman en bitsimap taun en libum emtiwan, wal lagijat na longtaim aibin jandim ola ami en deibin bitsimap det taun en deigidawei ola pipul langa najalot kantri en deibin libum dijan kantri emtiwan, nomo garram eni pipul.” Lagijat na YAWEI bin tok.