Hegai
Detlot Juda Pipul Garra Bildimbek Igin Det Serramoni Pleis
God bin gibit im wed thru langa Hegai
11Wal YAWEI det trubala God bin gibit wed langa dubala men neim Serababal en Joshuwa. Det men Serababal bin bos blanga Juda, en im dedi bin neim Shiyaltiyel. Det men Joshuwa bin det boswan haibala serramonimen, en im dedi bin neim Jehosadek.
Wal God bin gibit det wed langa dubala thru langa det speshalwan mesinja blanga im neim Hegai, God bin gibit im det wed langa det namba 2 yiya wen Daraiyas bin jidan king langa det kantri gulum Pesha. Langa det feswan dei blanga det namba 6 manth det wed bin kamat langa Hegai.aEsra 4:24-5:2; 6:14
Dei nomo bin bildimap det Serramoni Pleis
2Wal YAWEI bin dalim Hegai, “Detlot pipul tok im nomo rait taim blanga bildimap det Serramoni Pleis blanga mi.”
3Afta na YAWEI bin gibit dis wed langa Hegai blanga dalim ola pipul. 4God bin tok, “Main pipul olabat, wotfo yumob jidanbat langa ola gudbala haus wen main Serramoni Pleis stil jidan nogud?
5“Yumob jinggabat brabliwei na. 6Nomeda yumob bin plentimbat loda gadin, bat stil yumob bin gajimbat oni lilbit daga brom detlot gadin. Yumob garram sambala daga blanga dagat. Bat yumob nomo garram naf blanga meigim yumob bulap. En yumob garram sambala wain du. Bat yumob nomo garram naf blanga meigim yumob sedisfaid. En yumob garram sambala klos blanga werrimon. Bat yumob nomo garram naf blanga meigim yumob jidan wombala. En yumob oldei adwek blanga meigimap mani. Bat yumob nomo gedim naf mani blanga baiyim wanim yumob wandim.
7-8“Wal wotfo yumob kaan jinggabat ol dislot ting weya im hepin langa yumob? 9Yumob bin wandim loda daga brom yumob gadin. Bat oni lilbit yumob bin gajim. En wen yumob bin bringimbek detlot daga langa yumob kemp, aibin deigidawei detlot daga.
“Yumob sabi wotfo aibin dum lagijat? Aibin dum lagijat dumaji yumob oldei jinggabat blanga bildimapbat yumob ron haus. Bat main Serramoni Pleis stil jidanbat deya nogud. 10En blanga tharran na ai nomo bin jandim rein langa yumob gadin, en det graun nomo bin growimap enijing blanga yumob. 11Mi na bin meigim dijan kantri jidan brabli draiwan. Ai nomo bin larram eni rein buldan langa ola kantri en langa ola gadin en langa ola daga weya yumob bin trai growimap. En ol yumob pipul en ola enimul blanga yumob nomo garram naf daga en woda na.
“Wal dijan na yumob garra dum. Yumob garra go langa det hil kantri en gajim ola timba, en yumob garra bildimap det Serramoni Pleis blanga mi, en yumob garra weship langa mi brabliwei, en afta ai garra gudbinji brabliwei langa yumob.” Lagijat na YAWEI bin tok.
Deibin bildimap det Serramoni Pleis
12Wal wen Serababal en Joshuwa en ol detlot pipul hubin kambek garram dubala brom Bebalon bin ol irrim det wed weya Hegai det speshalwan mesinja bin dalim olabat, deibin ol duwit langa im, dumaji YAWEI det trubala God blanga olabat bin jandim im langa olabat garram det wed, en deibin dum wanim God bin wandim olabat blanga dum, dumaji deibin ol bradin langa im.
13Afta na Hegai bin gibit detlot pipul dis najawan wed brom YAWEI, “Trubala ai dalim yumob. Mi jidan garram yumob.” Lagijat na YAWEI bin tok.
14-15Afta na YAWEI bin meigim Serababal en Joshuwa en ol detlot pipul brabli strongbala blanga wek langa det Serramoni Pleis blanga im, en langa det namba 24 dei blanga det namba 6 manth deibin stat bildimap det Serramoni Pleis blanga YAWEI det haibala boswan God blanga olabat.

a1:1: Esra 4:24-5:2; 6:14