Hau deibin kadimat det kantri blanga detlot klen langa nowathwei
481-7Wal YAWEI det trubala God bin kipgon tok, “Ebri klen garra abum olabat ronwan pleis langa det kantri weya bin go brom det sanraiswei boda blanga Isreil en raidap langa det sangodansaid langa det solwoda gulum Medatareiniyan. Det nowathsaid boda blanga Isreil garra go olawei langa det taun gulum Hethlan en det hil kantri blanga Heimath en im garra binij rait langa det taun gulum Inon weya im jidan langa det boda langa midul langa det kantri gulum Damaskas en det hil kantri blanga Heimath. Dislot klen na garra gedim olabat kantri langa nowathsaid raidap langa sauthsaid, Den, Esha, Neftali, Manesa, Ifreiyim, Rubin en Juda.”
Det speshalwan kantri
8Wal YAWEI bin kipgon tok, “Deya langa sauthsaid langa det kantri blanga det Juda klen garra jidan brabli speshalwan kantri. Im garra jidan 12.5 kilomita longwei en kroswei en im stat langa det sanraiswan boda blanga Isreil en im garra go sangodanwei langa det solwoda gulum Medatareiniyan. Main Serramoni Pleis garra jidan deya langa det kantri na.
9“Det wanbala pat rait langa midul langa dijan kantri im blanga main. Im garra jidan 12.5 kilomita longwei en 10 kilomita kroswei.
10“Mi na, YAWEI garra gibit detlot serramonimen hafenhaf det speshalwan kantri. Im garra jidan 12.5 kilomita longwei en 5 kilomita kroswei en main Serramoni Pleis garra jidan rait langa midul. 11Oni detlot serramonimen brom det femili lain blanga Seidok garra gajimbat dijan speshalwan kantri, dumaji olabat bin oldei jidan trubala langa mi wen detlot Isreil pipul en det Libai klen bin dumbat nogudbala ting. 12Det kantri blanga detlot serramonimen garra jidan brabli seikridwan, en im garra jidan deya sauthsaid langa det Libai klen kantri.
13“Ai garra gibit det naja haf blanga det speshalwan kantri langa det Libai klen. Blanga olabat pat im garra jidan 12.5 kilomita longwei en 5 kilomita kroswei. 14En olabat kaan neba selim dijan kantri langa enibodi, dumaji im brabli gudbala kantri en im blanga main.
15“Main speshalwan kantri langa sauthsaid garra jidan 12.5 kilomita longwei en 2.5 kilomita kroswei. En tharran im nomo seikridwan, bat im blanga detlot Isreil pipul, en Jerusalem garra jidan deya du, garram ola haus en ola fam. 16Det taun garra jidan seimwei langa ebrisaid. Im garra jidan 2 kilomita langa ebri said, 17en det opinwan pleis garra jidan 125 mita raidaran langa det taun. 18Det kantri sanraiswei brom det taun garra abum fam blanga detlot pipul langa Jerusalem en im garra jidan 5 kilomita longwei en 2.5 kilomita kroswei, en seimwei gin langa sangodanwei. 19Ola pipul brom det taun gin go en growimapbat sid daga langa detlot fam, nomeda brom wujan klen dei kaman.
20“Det pleis weya jidan langa midul blanga det taun im main seikridwan pleis en im garra jidan 12.5 kilomita ebrisaid.
21“Ol det kantri sanraiswei en sangodanwei brom det Serramoni Pleis im blanga det boswan blanga Isreil. Im kantri sanraiswei garra go raidap langa Jodan Riba en det kantri sangodanwei garra go raidap langa det solwoda gulum Medatareiniyan. Rait langa midul blanga det kantri main seikridwan pleis garra jidan garram det Serramoni Pleis, 22en det kantri weya det Libai klen oldei jidan, en Jerusalem. Det nowathsaid kantri langa det boda im jidan blanga det Juda klen, en det sauthsaid kantri langa det boda im jidan blanga det Benjamin klen.”
Hau deibin kadimat det kantri blanga detlot klen langa sauthwei
23-27Wal YAWEI bin kipgon tok, “Langa sauthsaid langa dijan seikridwan pleis im blanga detlot Isreil pipul. Ebri klen blanga Isreil garra abum olabat ronwan kantri brom sanraiswei raidap langa sangodanwei. Dislot klen garra abum olabat ronwan kantri brom nowathwei raidap langa sauthsaid, Benjamin, Simiyan, Isaka, Sebyulan en Ged.
28“Det sauthsaid boda blanga Ged klen im stat brom det taun gulum Teima en go raidap langa det spring kantri gulum Meriba Keidish. Im garra kipgon raidap langa Ijip en im binij rait langa det solwoda gulum Medatareiniyan.
29“Lagijat na detlot Isreil pipul garra kadimat miselp detlot kantri langa Isreil blanga det twelbala klen na. Mi na YAWEI det boswan God bin tok dijan.”
Detlot geit blanga Jerusalem
30-34Wal YAWEI bin kipgon tok, “Jerusalem garra abum twelbala geit. Thribala geit garra jidan langa ebrisaid blanga det taun wol. Detlot geit garra abum seimwan neim blanga detlot twelbala klen blanga Isreil na. Detlot geit gulum Rubin, Juda, en Libai garra jidan langa nowathsaid. Detlot geit gulum Josef, Benjamin en Den garra jidan langa sanraisaid. Detlot geit gulum Simiyan, Isaka en Sebyulan garra jidan langa sauthsaid. Detlot geit gulum Ged, Esha en Neftali garra jidan langa sangodansaid. Ebri said langa det taun wol garra jidan 2.5 kilomita longwei.aRebaleishan 22:12,13 35En holot det wol garra jidan 10 kilomita. Det taun garra abum nyuwan neim gulum YAWEI Im Jidan Iya.” Lagijat na YAWEI bin tok.
Binij na.

a48:30-34: Rebaleishan 22:12,13