Detlot speshalwan rum blanga detlot serramonimen
421-2Wal afta na minbala bin libum det Serramoni Pleis en minbala bin wokbek langa det atsaidwan kotyad en imbin shoum mi sambala rum weya deibin jidan langa nowathsaid en langa sangodanwei langa det haus. Dislot rum bin 50 mita longwei en 25 mita kroswei. 3Wansaid langa detlot rum bin 10 mita langa opinwan pleis weya bin go olawei langa det Serramoni Pleis. En langa det najasaid bin roud blanga wokwokbat weya im go raidaran langa det atsaidwan yad. Detlot rum deibin meigim, sambala rum bin langa graun, najalot rum bin ontop langa detlot rum, en najalot rum bin jidan ontop langa detlot midul rum, 4en ola dowa bin feising langa nowathwei. En lida langa olabat bin det roud blanga wokwokbat. Imbin 5 mita kroswei en 50 mita longwei. 5Detlot rum langa top bin mowa lilwan langa detlot rum langa midul, en detlot rum langa midul bin mowa lilwan langa detlot rum langa bodam. 6Detlot rum langa bodam bin holdimap detlot midulwan rum, en detlot midulwan rum bin holdimap detlot topwan rum dumaji detlot rum kaan abum eni pos laik detlot najalot haus langa det kotyad. 7-8Deya langa nowathsaid brom detlot rum wan wol bin jidan en imbin 25 mita longwei. 9-10En langa det sanraiswei det wol bin abum dowa blanga gowin brom det kotyad langa detlot rum.
En sambala rum bin deya du langa sauthsaid langa det seimwan haus weya jidan sangodanwei brom det Serramoni Pleis. 11Detlot rum bin seim wulijim detlot rum langa detlot haus langa det nowathsaid en deibin ol abum roud blanga wokwokbat du. 12Det dowa blanga detlot rum bin jidan langa sanraiswei langa det wol weya bin jandap lida langa olabat.
13Wal det men bin tok langa mi, “Detlot rum langa nowathsaid en sauthsaid langa det seimwan haus weya jidan sangodanwei brom det Serramoni Pleis, olabat seikridwan rum weya detlot serramonimen blanga YAWEI det trubala God garra go en dagat detlot brabli seikridwan ofring. Detlot ofring jidan det sid daga sekrifais, en det sekrifais blanga olabat nogudbalawei, en det sekrifais blanga meigim ebribodi jidan raitwei blanga YAWEI. 14Wen detlot serramonimen gitredi blanga gowei brom det Serramoni Pleis, dei garra go langa detlot rum bifo dei gobek langa det atsaidwan kotyad. Dei garra libum olabat seikridwan klos deya langa detlot rum en dei garra werrimon olabat ronwan klos bifo olabat garra go eniweya langa ola pipul.”
Det men bin meshurum det Serramoni Pleis
15Afta tharran wen det men bin binij meshurum detlot haus insaid langa det Serramoni Pleis imbin deigimbek mi thru langa det sanrais geit, en imbin meshurum det wol. 16Wal imbin yusum im stik blanga meshurum det wol sanraiswei. Imbin 250 mita longwei. 17-19Afta imbin go en meshurum detlot wol langa nowathsaid en langa sauthsaid en langa sangodansaid en deibin ol 250 mita longwei. 20En ol detlot wol blanga det Serramoni Pleis bin jidan seim. Detlot wol weya bin jidan raidaran det Serramoni Pleis bin kadimat det seikridwan pleis brom ola najalot pleis.