Isikiyel
Isikiyel Bin Gibit Wed Brom God Deya Langa Bebalon
Isikiyel bin abum drim
11-3Wal mi na Isikiyel, det serramonimen, en mi na det san blanga Busi. King Nebakanesa bin gajim mi en King Jehoiyakin en ola Juwish pipul, en imbin meigim melabat jidan wansaid langa det riba gulum Keba langa im kantri gulum Bebalon. Melabat bin jidan iya blanga 5 yiya. Bambai langa det namba 30 yiya langa det namba 4 manth langa det namba 5 dei aibin abum drim. Langa det drim aibin luk det skai bin opinap en YAWEI det trubala God bin shoum imselp langa mi, en imbin tok langa mi, en deya na aibin filim det pawa blanga im.aRebaleishan 19:11; Sekan Kings 24:10-16; Sekan Kranakuls 36:9,10
4Wal aibin luk bigwan stom kaminap brom nowathwei. Laitining bin laitlaitbat oloba brom det bigwan klaud en det skai raidaran langa det klaud bin jidan brabli shainiwan. Weya det laitining bin oldei laitlaitbat samting brabli shainiwan bin jidan deya, 5-6en aibin luk fobala enimul bin kamat brom midul. Olabat bin luk jis laiga men, bat olabat bin abum fobala feis en fobala wing.bRebaleishan 4:6 7Wen olabat bin jandap, olabat leig bin brabli streitwan en olabat fut bin wulijim buligi fut en olabat bin shain nomo lilbit jis laik kopa. 8Detlot enimul bin abum fobala wing en deibin ol abum fobala bingga andanith langa olabat wing. 9Olabat bin jandap langa skweya en nomo bin luk miselp, en ola wing bin tatjim miselp. Deibin ol mubabat wanwei seimtaim en olabat nomo bin tenimran olabat bodi.
10Wal detlot enimul bin abum difrinwan feis. Blanga men feis bin lida, blanga laiyan feis bin raidensaid, blanga buligi feis bin lefthensaid en blanga igul feis bin langa bekwei.cIsikiyel 10:14; Rebaleishan 4:7 11Detlot enimul bin oldei spredimat dei dubala topwan wing wulijim dei gin tatjim miselp en deibin oldei pudumbek det naja dubala wing insaidwei langa olabat bodi. 12Detlot enimul bin ol luk difrinwei en olabat gin go eniweya olabat wandim go en olabat nomo tenimran olabat bodi.
13Brom deya aibin luk rait langa midul langa detlot enimul samting wulijim faiya bin barnbarn jis laiga faiya stik. Imbin kipgon mubabat ebriweya langa detlot enimul en det faiya bin brabli braitwan en laitining brom det faiya bin oldei laitlaitbat ebriweya.dRebaleishan 4:5 14En detlot fobala enimul bin oldei mubaran brabli kwikbala du, jis laik laitining.
15Wal wen aibin lukinatbat detlot fobala enimul aibin luk fobala wil bin tatjimbat det graun wansaid langa olabat. 16Det fobala wil bin brabli shainiwan en detlot wil bin abum najawan wil insaid langa det feswan wil 17wulijim dei gin mub eniweya olabat wandim go. 18Detlot rim blanga detlot wil bin brabli haiwan en deibin abum bigismob ai. Aibin brabli hatjamp wen aibin luk dijan.eRebaleishan 4:8 19Wen detlot enimul bin oldei mub, wal detlot wil du bin oldei mub garram olabat en wen detlot enimul bin lidimap miselp brom graun en gowap langa top, wal detlot wil bin oldei dum det seimwan ting du.
20Nomeda weya detlot enimul bin go, detlot wil bin oldei go du garram olabat. Detlot wil bin go eniweya weya detlot enimul bin wandim go. 21Nomeda detlot enimul bin stap o go o flaiflaibat, detlot wil bin oldei dum wanim detlot enimul bin dum.fIsikiyel 10:9-13
22Brom deya aibin luk fletwan ruf ontopwei langa detlot enimul hed. Imbin brabli shainiwan jis laik glas.gRebaleishan 4:6 23Andanith langa det fletwan ruf weya detlot enimul bin jandap deibin ol spredimat olabat wing en deibin gaburrumap olabat bodi garram det naja dubala wing. 24Wal aibin oldei irrim det nois wen detlot enimul bin oldei flaiflaibat. Deibin meigimbat nois jis laik det fladwoda o jis laik detlot ami, o jis laik bois blanga YAWEI det boswan God. En wen detlot enimul bin stap flaiflaibat, deibin pudumbek olabat wing.hRebaleishan 1:4-15; 19:6 25Bat aibin stil irrimbat det nois brom ontopwei brom det fletwan ruf.
26Deya na ontop langa det fletwan ruf, samting bin deya. Imbin luk jis laik det speshalwan tjeya blanga det king. Imbin brabli shainiwan garram brabli purdiwan ston. En ontop langa det speshalwan tjeya wanbala sheip bin jidanbat deya. Imbin luk jis laik wanbala men.iIsikiyel 10:1; Rebaleishan 4:2,3 27Det sheip bin brabli shainiwan wulijim kopa rait langa midul langa faiya. Imbin jidan brabli shainiwan garram braitwan lait.jIsikiyel 8:2 28Imbin luk jis laik detlot kala blanga det reinbo, en aibin sabi im na YAWEI.
Wal wen aibin luk im, aibin pudumdan main feis langa graun en streidawei aibin irrim sambodi bin tok langa mi.

a1:1-3: Rebaleishan 19:11; Sekan Kings 24:10-16; Sekan Kranakuls 36:9,10

b1:5: Rebaleishan 4:6

c1:10: Isikiyel 10:14; Rebaleishan 4:7

d1:13: Rebaleishan 4:5

e1:18: Rebaleishan 4:8

f1:15-21: Isikiyel 10:9-13

g1:22: Rebaleishan 4:6

h1:24: Rebaleishan 1:4-15; 19:6

i1:26: Isikiyel 10:1; Rebaleishan 4:2,3

j1:27: Isikiyel 8:2