Afta det panishmen blanga Jerusalem
41Wal det speshalwan mesinja im tok mowa,
“Wal det gudwan gol nomo shain brabliwei na,
en detlot ston blanga det Serramoni Pleis leidan ebriweya langa ola roud.
2Basdam langa Jerusalem ola yang pipul olabat bin brabli gudwan langa wi, jis laik gol.
Bat tudei na olabat rabishwan jis laik det kleiwan dish wen im breikhaf en dei tjakidawei.
3“Det mamiwan dinggo brabli wailwan bat im oldei gibit daga langa detlot beibiwan blanga im,
bat blanga main pipul olabat, dei jis laik det bigwan bard gulum ostrij, en olabat nomo maindimbat olabat beibi.
4Dei larram olabat biginini dai brom jidanbat hanggriwan en thestiwan.
Detlot biginini oldei askimbat blanga daga, bat nobodi nomo gibit langa olabat.
5Detlot pipul hubin oldei abumbat gudwan daga bifo, olabat oldei jidanbat hanggriwan na, en olabat oldei dai ebriweya langa roud.
Detlot hubin jidan brabli ritjwan en abum blendibala ebrijing bifo, wal dei lafta lukabat daga langa rabish pleis na.
6“Blanga main pipul olabat, deibin abum loda panishmen, mowa langa detlot brabli nogudbala pipul blanga Sadam.
Pipul nomo bin nokamdan det taun, najing.
YAWEI det trubala God na bin dum.aJenasis 19:24
7Basdam ol detlot lidamob blanga wi, dei nomo bin abum enijing rong.
Deibin brabli gudwan, en deibin brabli strongbala en abum gudwan bodi.
8Bat tudei olabat jidan dedwan langa ola roud, en nobodi nomo bin sabi wotkain olabat feis. Olabat jidan rotinwan.
Blanga olabat bodi bin go draiwan en nogud jis laiga wadi.
9Detlot hubin dai basdam langa det wo, deibin mowa lakiwan.
Dijan najamob hubin dai afta, dei jidanbat hanggriwan en dai slobala, dumaji olabat nomo bin abum eni daga.
10Im brabli nogudbala ting bin hepin langa main pipul langa Jerusalem.
Detlot mamiwan, olabat brabli kainwan bat stil deibin brabli hanggriwan detmatj en deibin dagat olabat ronwan bigininimob. Deibin boilim olabat blanga dagat olabat.bDyudaranami 28:57; Isikiyel 5:10
11“Basdam YAWEI bin brabli wail langa im pipul langa Jerusalem en imbin jandim faiya blanga barnimap det taun en libum eshis.
12Basdam ola pipul langa Jerusalem en ola king en lidamob brom najalot kantri bin reken nobodi kaan nokamdan detlot geit blanga Jerusalem en gowin insaid en teikoba.
13“Bat dijan ting bin hepin lagijat, dumaji detlot speshalwan mesinja blanga Jerusalem deibin brabli nogudbala,
en detlot serramonimen bin dumbat loda nogudbala ting du.
Deibin kilim ded sambala gudbala pipul.
14Deibin wokabat ebriweya langa ola roud jis laik olabat bin ol blainwan men weya nomo luk gudwei.
Deibin abum loda blad ebriweya langa olabat bodi, wulijim nobodi kaan lau blanga tatjim olabat.
15Ola pipul bin jingat adbala,
‘Yumob gowei! Yumob nomo klinbala. Yumob nomo tatjim mi!’
“Wal deibin wokabat ebriweya langa difrindifrin kantri, bat nobodi nomo bin laigim olabat en lukaftumbat olabat.
16Wal YAWEI nomo bin lukaftumbat olabat en imbin jandimwei olabat langa difrindifrin kantri.
Im nomo bin rispek en kain langa detlot serramonimen en lidamob enimo.
17“Wibin weidabat oldei en lukinatbat blanga enibodi garra kaman en album wi brom naja kantri,
bat nobodi nomo bin kaman en album wi, najing.
18Detlot enamimob deibin oldei wotjimbat ola roud blanga wi.
Wi nomo bin go eniweya.
Det taim bin kaman kwikbala blanga wi blanga dai.
19Detlot enami bin brabli kwikbala wen deibin ranimap wi, jis laik igulok wen im flaiflaibat kwikbala brom top langa graun blanga gajimbat daga.
Deibin bulurrum wi olawei raidap langa det hil kantri.
En deibin gajimap wi langa det bush kantri du.
20Deibin meigim prisana det boswan king blanga wi weya YAWEI bin pikimat.
Wibin trastim det king blanga seibum wi brom ola enamimob en seibum wi laif brom eni trabul, bat najing.
21“Yumob pipul langa Idam en Us hu heidim melabat.
Yumob jidan gudbinjiwei, en yumob reken miselp gudwan, bat najing! Bambai nogudbala ting garra kaman langa yumob.
Bambai yumob garra wokabat drangginbalawei, en yumob garra jidan neigidbala en sheim miselp.
22Yumob pipul brom Jerusalem bin pei blanga olabat nogudbalawei.
YAWEI det trubala God nomo wandim yumob blanga jidan langa najawan kantri enimo.
Im wandim jandimbek yumob langa yumob ronwan kantri.
Bat yumob Idam pipul, YAWEI det trubala God garra panishim yumob.
Im garra shoum ola najalot pipul yumob bin dumbat nogudbala ting.”
Lagijat na det speshalwan mesinja bin tok.

a4:6: Jenasis 19:24

b4:10: Dyudaranami 28:57; Isikiyel 5:10