91“Bat detlot pipul hubin abumbat loda pein kaan abumbat pein enimo.”
Wanbala king garra kaman
Aibin kipgon tok, “Bifo, God bin meigim lobala det dubala kantri gulum Sebyulan en Neftali langa Gelali. Bat bambai na ol detlot kantri blanga ol detlot pipul hu jidan najasaid langa Jodan Riba, en olawei langa det solwoda gulum Medatareiniyan, God garra meigim detlot pipul brabli haibala.aMethyu 4:15 2Detlot pipul hubin oldei wok langa dakbala pleis, bin luk brabli braitwan lait. En det lait bin shain langa ebribodi hu jidan langa det kantri langa brabli dakbala pleis.bMethyu 4:16; Luk 1:79 3God, yu na bin meigim yu pipul olabat strongbala. Dumaji yu na oldei meigim olabat brabli gudbinji, en olabat oldei preisimbat langa yu na, jis laik wen detlot wekinmen weya wekwekbat langa olabat fam gajimbat detlot daga, o jis laik detlot soljamob wen olabat kadimatbat ola enijing wen olabat bin win langa fait.
4“Yubin breigim det pawa blanga detlot pipul hubin oldei ardimbat detlot pipul blanga yu en hubin oldei meigim olabat jidan prisana. Yubin album olabat jis laik wen yubin seibum detlot pipul blanga yu brom ola Midiyan pipul. 5Detlot but weya meigimbat nois brom detlot ami wen olabat wokwokbat, en detlot klos blanga detlot ami, bin abum blad oloba. Ol detlot bin ol barnbarn langa faiya na.
6“Wal wanbala lilwan boi bin bon blanga wi. Det wanbala san garra jidan bos blanga wi. Blanga im neim im Brabli Gudbala Titja, en Brabli Haibala God, en Olagijawan Dedi en Bos Blanga Gudbinjiwei. 7Im pawa kaan neba binij, en im pipul garra jidan gudwei olagijawan. Im garra jidan bos blanga ol detlot pipul blanga im grengrefatha King Deibid, en im garra meigim olabat jidan brabli strongbala. Im garra oldei jidan bos en im garra jidan brabli trubalawan en im garra oldei gibit pipul feyago. YAWEI det boswan God garra meiksho im dum ebrijing imbin tok.”cLuk 1:32,33
God garra panishim ola Isreil pipul
8Wal aibin kipgon tok, “YAWEI bin gibit woning langa ol detlot pipul brom Isreil, 9en olabat bin sabi tharran, en ebribodi hubin jidan langa det taun gulum Samariya bin sabi du. Bat olabat bin brabli laigim miselp en nomo bin teiknodis, en olabat bin tok, 10‘Ola haus blanga melabat weya melabat bin meigim garram brik en garram det tri gulum sikamotri bin ol buldan langa graun, bat melabat garra bildimap haus garram ston en garram det tri gulum sidatri.’
11“Wal YAWEI bin meigim detlot enamimob fait langa olabat. 12Imbin jandim detlot Eramiyan pipul brom sanraiswei en detlot Filastain pipul brom sangodanwei en olabat bin binijimap olabat. Wal YAWEI im stil wail langa olabat en im garra kipgon panishimbat olabat.
13“Bat olabat nomo bin teiknodis langa YAWEI det boswan God en olabat nomo bin weship langa im. 14-15Langa wanbala dei, imbin kadimof olabat hed en teil en olabat lif en wadi. Detlot boswan en detlot lidamob bin det hedpat, en detlot laiyinwan speshalwan mesinja bin det teilpat. 16Deibin oldei lidimbat olabat langa det rong roud, en olabat nomo bin sabi wanim blanga dum. 17Wal YAWEI bin stil wail langa olabat, en im garra kipgon panishimbat olabat, dumaji olabat bin gibit bekboun langa im. Olabat bin brabli nogudbala, en bin oldei toktokbat nogudbala ting. God bin brabli wail en im nomo bin fil sori blanga ola yang pipul, widogel en biginini hu nomo garram mami en dedi.
18“Det nogudbalawei blanga olabat bin spredat jis laik faiya weya barnimap ola tri en gras, en imbin jidan brabli smokiwan oloba. 19Wal YAWEI det boswan God im brabli wail na, dumaji olabat nomo bin kain gija en imbin yusum detlot pipul wulijim wadi blanga meigim faiya. Det faiya bin barnimap det kantri. 20Nomeda olabat bin faitfaitbat en stilimbat daga bat stil olabat nomo bin sedisfaid. Olabat bin brabli nogudbala en bin kilimbat olabat ronwan biginini jis laik detlot wail enimul. 21Det dubala klen blanga Ifreiyim en Manesa, nomo bin laigim gija en olabat bin fait gija. Afta tharran deibin ol majurrumap miselp blanga go en fait langa Juda pipul. Wal YAWEI im stil wail langa olabat en im garra kipgon panishimbat olabat.

a9:1: Methyu 4:15

b9:2: Methyu 4:16; Luk 1:79

c9:7: Luk 1:32,33