YAWEI garra seibum ola pipul langa Jerusalem
621Wal aibin tok na, “Ol yumob pipul langa Jerusalem, ai garra tok blanga yumob gudbalawei. En ai kaan neba jidan kwaitbala, raidap yumob garra jidan brabli gudbalawei langa seifwan pleis, en yumob garra shain jis laik det gudwan faiya. 2Wen yumob jidan gudwei, ola pipul brom ebri kantri en olabat king garra luk langa yumob. En YAWEI det trubala God garra gibit yumob nyuwan neim. 3Yumob garra jidan jis laik purdiwan het langa YAWEI bingga, jis laik det het det king oldei werrimon. 4Yumob neim im kaan jidan ‘Nomo Garram Enibodi’ enimo, bat det neim blanga yumob garra jidan ‘Merrit Gudbinjiwei.’ Yumob garra meigim YAWEI brabli gudbinji, en yumob kantri garra jidan jis laik im waif. 5Yumob pipul garra teikoba det kantri, jis laik det yangboi weya im gajim det yanggel blanga jidan im waif. YAWEI garra brabli gudbinji blanga yumob, jis laik det men weya im gudbinji blanga im nyuwan waif.
6“Ol yumob pipul langa Jerusalem, YAWEI bin pudum solja blanga maindim detlot wol blanga yumob, en dei garra preipreibat langa YAWEI ebri deitaim en naitaim, en olabat kaan neba silip. 7En dei kaan larram im silip du, raidap im garra meigim Jerusalem brabli strongbala en brabli haibala ebriweya.
8“Wal YAWEI bin gibit im wed, en imbin meigim dijan pramis, ‘Ai kaan neba gibit yumob enami olabat ol detlot sid daga en greip daga weya yumob bin plentimbat en dumbat adwek. 9Trubala yumob bin gajimbat detlot sid daga en greip daga, en yumob garra dagat det damba en yumob garra jidan brabli gudbinji en preisimbat mi na YAWEI, en yumob garra dringgimbat det wain insaid langa main Serramoni Pleis.’
10“Ol yumob pipul langa Jerusalem, yumob opinim detlot geit. En yumob meigim det roud gudbala langa det taun, en deigimwei detlot ston langa roud, en pudumap det fleig blanga album detlot pipul brom najalot kantri blanga faindim det wei. 11En dijan na YAWEI bin tok wulijim ola pipul langa dijan wel garra lisin, ‘Ai garra kaman dregli blanga seibum yumob pipul langa Saiyan deya langa Jerusalem, en ai garra gibit yumob gudbala ting.aAisaiya 40:10; Rebaleishan 22:12 12Afta ai kaman, yumob neim garra jidan “Ronwan pipul blanga YAWEI” en “Detlot pipul weya YAWEI bin seibum”. En dei garra gibit Jerusalem nyubala neim, “Det taun weya God laigim” en “Det taun weya bigmob pipul jidan”.’”

a62:11: Aisaiya 40:10; Rebaleishan 22:12