YAWEI bin tok langa Aisaiya langa drim langa det Serramoni Pleis
61Wal aibin kipgon tok, “Langa det yiya na wen Yusaiya bin dai, aibin abum drim en langa main drim aibin luk YAWEI det trubala God bin jidanbat langa im speshalwan tjeya, en imbin jidan mowa haibala langa ola ebrijing, en blanga im klos bin spredat oloba langa det Serramoni Pleis.aSekan Kings 15:7; Sekan Kranakuls 26:23 2En rait raun langa im, detlot speshalwan einjul gulum serif bin flairanbat en olabat bin brabli shainiwan, en olabat bin abum siksbala wing. En olabat bin gaburrumap olabat feis garram dubala wing, en olabat bin gaburrumap olabat bodi garram naja dubala wing. En garram det naja dubala wing olabat bin yusum blanga flairanbat, 3en olabat bin oldei jinginatbat gija,
‘Holi, holi, holi!
YAWEI im det boswan God.
Im garram mowa pawa langa enijing langa dijan wel.’bRebaleishan 4:8
4“Wal wen detlot serif bin jinginat adbala det flopat blanga det Serramoni Pleis bin sheik nomo lilbit, en det Serramoni Pleis bin jidan garram loda smok.cRebaleishan 15:8
5“Afta na aibin jingat, ‘Trubala ai garra dai na. Aibin oldei toktokbat nogudbalawei, en detlot hubin jidan raidaran langa mi deibin oldei toktokbat nogudbalawei du. Bat tudei na aibin luk garram main ronwan ai det King, YAWEI det boswan God.’
6“Brom deya wanbala serif bin flai langa mi garram det hotwan tjakol langa im bingga, weya imbin gajim brom det teibul blanga ofring garram det silbawan ting. 7Imbin kaman en tatjim main maus garram det hotwan tjakol en imbin tok, ‘Dijan bin tatjim yu maus, en yu fri na brom ol det nogudbalawei en yu nomo giltiwan na.’
8“Afta tharran aibin irrim YAWEI tok na, ‘Hu ai garra jandim? Enibodi iya gin jidan mesinja blanga wi?’
“Wal aibin tok, ‘Ai gin go. Yu jandim mi.’
9“Wal YAWEI bin dalim mi blanga go en dalim im pipul olabat dislot wed na, ‘Yumob garra lisin main wed, bat yumob kaan sabi enijing. Yumob garra lukabat det trubalawei blanga God, bat yumob kaan faindim det wei.’ 10En YAWEI bin tok langa mi, ‘Yu meigim dislot pipul gibit mi bekboun. Jadimap olabat irriwol en olabat dubala ai en meigim olabat nomo sabi enijing wulijim olabat kaan kambek langa mi blanga meigim olabat gudbala.’ Lagijat na YAWEI bin tok.d,10Methyu 13:14,15; Mak 4:12; Luk 8:10; Jon 12:40; Eks 28:26,27
11“Aibin askim YAWEI na, ‘Haulong dijan ting garra jidan lagijat?’
“Wal YAWEI bin tok langa mi, ‘Raidap olabat haus garra buldanbat en olabat taun garra bitsap en raidap olabat fam garra jidan nomo garram enijing, 12en aibin jandimwei olabat longwei en nomo enibodi bin jidan deya en det kantri bin jidan rabishwan. 13Nomeda if oni lilbit pipul jidan laibala, bat stil olabat garra ol binijap. Bat jis laik det rutpat blanga det tri weya jidan afta deibin kadimdan det tri, wal sambala pipul weya aibin pikimat garra jidan laibala lagijat du.’ Lagijat na YAWEI bin tok.”

a6:1: Sekan Kings 15:7; Sekan Kranakuls 26:23

b6:3: Rebaleishan 4:8

c6:4: Rebaleishan 15:8

d6:9: ,10Methyu 13:14,15; Mak 4:12; Luk 8:10; Jon 12:40; Eks 28:26,27