YAWEI garra lukaftumbat im ronwan pipul olabat
401Wal melabat God im tok,
“Main pipul olabat, nomo jidan soribala.
Yumob garra jidan gudbinjiwei na.
2Ai garra tok kainbalawei langa yumob deya langa Jerusalem.
Aibin panishimbat yumob brabli adbalawei blanga yumob nogudbalawei,
bat det panishmen im binij na.”
3Sambodi im jinginatbat,
“Deya langa det deset kantri yumob meigim det roud streitwan!
Meigim det roud redibala blanga YAWEI det trubala God!aMethyu 3:3; Mak 1:3; Jon 1:23
4Yumob meigim detlot rafwan pleis brabli gudwan en lebulwan.
5En bambai yumob garra luk YAWEI kaminap.
Yumob garra luk im pawa en im brabli shainiwan lait.
YAWEI na bin pramisim dijan.”bLuk 3:4-6
6Sambodi bin dalim mi, “Yu jingat adbala!”
En aibin askim im, “Wotfo ai garra jinginatbat?”
“Tok dijan. Melabat jidan jis laik detlot gras en wailwan purdiflawa weya nomo jidan longtaim.
7En wen YAWEI jandim hotwan win,
ol detlot purdiflawa en gras ol binijap.
Wal lagijat du, melabat jidan jis laik det gras.
8Trubala, detlot purdiflawa en det gras kaan jidan longtaim.
Olabat oldei draiyap en dai,
bat det wed blanga God garra jidan olagijawan.”cJeims 1:10,11; Fes Pida 1:24,25
Melabat God im iya
9Dijan brabli gudbala nyus blanga det taun gulum Jerusalem.
Yumob jingat brabli adbala brom det brabli haibala hil.
Nomo bradin blanga jinginat langa detlot taun blanga Juda,
“Melabat God im iya na.”
10Trubala YAWEI det boswan God im kaminap.
Im garra jidan bos garram im brabli strongbala pawa.
Im bringimap ola gudwan ting imbin gajimbat brom im enamimob,
en im garra gibit ol detlot ebrijing langa im pipul olabat.dAisaiya 62:11; Rebaleishan 22:12
11YAWEI im oldei lukaftumbat im pipul olabat,
jis laik det stakmen wen im oldei lukaftumbat detlot ship blanga im.
Im oldei garrimap detlot lilwan ship langa im bingga,
en im oldei lidimbat detlot mamiwan ship gudwei.eIsikiyel 34:15; Jon 10:11
Enibodi jidan laik God?
12Yumob sabi enibodi hubin meshurum ol detlot solwoda?
Yumob sabi hubin meshurum det skai garram im bingga?
Yumob sabi haumatj graun jidan langa dijan wel?
Yumob sabi haumeni haiwan hil kantri jidan langa dijan wel?
Yumob sabi hau hebi olabat?
13Yumob sabi enibodi hubin dalim YAWEI wanim im garra lafta dum?
Yumob sabi enibodi bin titjimbat im?fRomans 11:34; Fes Karinthiyans 2:16
14YAWEI bin askim enibodi blanga titjimbat im hau blanga sabi ebrijing,
en hau blanga gibit ebribodi feyago?
Hubin titjimbat YAWEI blanga sabi ebrijing?
15Nomo eni kantri langa dijan wel jidan mowa haibala langa YAWEI.
Detlot kantri jidan jis laik det bilibong weya im garram lilwan woda.
Detlot kantri nomo enijing.
If YAWEI holdim ola ailin langa im bingga,
im nomo hebiwan.
Im jis laik im garram lilbit sengraun langa im bingga.
16Nomeda bigismob buligi en bigismob tri jidan langa det hil kantri langa Lebanan,
olabat nomo naf blanga meigimbat det brabli gudwan sekrifais ofring langa God,
dumaji im mowa haibala langa ebrijing.
17God reken ola kantri nomo enijing langa im.
18Yumob sabi enibodi hu jidan haibala jis laik God?
Yumob gin faindim enijing blanga album yumob sabi wotkain God?
19Det drimin sheip weya men bin meigim nomo jidan laik God.
Deibin meigim det sheip garram kopa en lilbit gol en deibin meigim purdiwan garram silba.g,19Eks 17:29
20En yumob sabi detlot men weya meigim detlot drimin sheip garram brabli gudwan wud.
Olabat meigim detlot drimin sheip wulijim dei kaan buldan.
God na jidan boswan blanga dijan wel
21Yumob nomo sabi?
Yumob nomo bin irrim?
Yumob nomo sabi God bin meigim dijan wel?
22God na im bos blanga ol dislot kantri langa dijan wel,
en ebribodi hu jidan langa dislot kantri olabat jis laik detlot lilwan insek.
Im na bin spredimat det skai wulijim kaliko.
23God na meigim ola boswan jidan lobala,
en olabat nomo enijing.
24Olabat jis laik detlot purdiflawa weya sambodi bin jis plentimat,
en deibin stat blanga gro.
Bat wen God jandim det hotwan win langa olabat,
im draiyimap olabat,
en det bigiswan win deigimwei olabat.
25Det brabli holiwan God tok,
“Hu yu reken jidan wulijim mi?
Enibodi iya jidan lebul langa mi?”
26Yu luk det skai naitaim.
Hubin meigim detlot sta?
Hubin gibit olabat neim?
Hubin lidimbat detlot sta wulijim ami?
YAWEI na im brabli strongbala garram detmatj pawa.
Im jingat olabat neim en olabat kamat naitaim.
Nomo eni sta bin gitbush.
YAWEI meigim im pipul olabat strongbala
27Ol yumob Isreil pipul oldei tok,
“God nomo teiknodis langa wi.
Im nomo lukaftumbat en tridimbat wi gudwei.”
Wotfo yumob tok lagijat?
28Yumob nomo sabi?
Yumob nomo bin irrim?
YAWEI na det olagijawan God.
Im na bin meigim dijan wel.
Im nomo wikwan.
Im kaan neba nokap.
Nomo ebribodi sabi wanim YAWEI jinggabat.
29YAWEI na oldei meigim detlot brabli wikwan pipul jidan strongbala.
30En ola yang pipul du brabli nokap,
en olabat buldan.
31Bat detlot pipul hu trastimbat langa YAWEI,
im garra meigim olabat jidan brabli strongbala.
Olabat garra jidan brabli strongwan wulijim detlot igulok weya flaiflai langa top.
Detlot pipul garra wokwokbat en ranranbat,
bat olabat kaan neba nokap.
YAWEI im jidan bos blanga ebrijing

a40:3: Methyu 3:3; Mak 1:3; Jon 1:23

b40:3-5: Luk 3:4-6

c40:6-8: Jeims 1:10,11; Fes Pida 1:24,25

d40:10: Aisaiya 62:11; Rebaleishan 22:12

e40:11: Isikiyel 34:15; Jon 10:11

f40:13: Romans 11:34; Fes Karinthiyans 2:16

g40:18: ,19Eks 17:29