Aisaiya bin wonimbat detlot Ijip en Ithiyopiya pipul
201Aibin kipgon tok, “Wal King Sagon brom det kantri gulum Asiriya bin dalim im amimob blanga majurrumap miselp en deibin teikoba det Filistain taun gulum Eshdad. 2-3Wal langa det seimtaim YAWEI det trubala God bin dalim mi, ‘Aisaiya, yu garra deigimat ol yu klos en yu but en ebrijing yu garram langa yu bodi.’ Orait aibin dum lagijat, en aibin wokaran deya neigidbala nomo garram but blanga thriyiya.
“Bambai na YAWEI bin tok, ‘Wanim Aisaiya bin dum, im det woning blanga detlot Ijip pipul en ola Ithiyopiya pipul. 4Det king brom det kantri gulum Asiriya garra deigidawei ebribodi na brom det dubala kantri, en dei garra gowei nomo garram eni klos en nomo garram eni but. Im garra deigimwei ola yang pipul en ola ol pipul. Olabat garra ol gowei prisana. 5Olabat kaan sabi wanim olabat garra dum, en nobodi kaan album detmob na, dumaji olabat bin ol joinin garram detlot Ithiyopiya pipul en olabat bin tok praudbalawei blanga Ijip.’ 6Wen dijan garra hepin, detlot Filistain pipul hu jidan langa solwodasaid garra ol tok, ‘Yumob luk wanim bin hepin langa det dubala kantri na. Melabat bin go langa dubala blanga seibum melabat brom det king brom Asiriya, bat melabat kaan ran eniweya, dumaji melabat ol trep na.’”