Bigiswan trabul blanga Moweb
161Wal aibin kipgon tok, “Ol detlot Moweb pipul bin jandim sambala yangwan ship blanga presen blanga det boswan langa Jerusalem. Olabat bin deigim detlot ship thru langa det deset kantri, brom Sela raidap langa Jerusalem deya langa det bigwan hil gulum Saiyan. 2Detlot wuman brom Moweb bin deya gulijap langa det Anan Riba blanga ranawei, wulijim bigismob bard spredatbat brom olabat nes.
3“Detlot mesinja blanga Moweb bin tok langa detlot pipul brom Juda na. Deibin tok, ‘Yumob jidan kainbala en album melabat. Yumob kipum melabat seif jis laik det sheid tri kipum melabat seif brom det hotwan san. Yumob blandim melabat pipul brom melabat enamimob. 4Yumob larram melabat pipul jidan iya langa yumob kantri, en faindim seifwan pleis blanga jidan.’
“Bambai Moweb, blanga yu krulbala enami garra ol gowei na. Olabat kaan kipgon faitfaitbat en bitsimap detlot taun blanga yu. 5En afta na sambodi brom King Deibid femili lain garra jidan bos en im garra bildimap im kantri en im garra laigim ebribodi brabliwei en im garra gibit feyago langa ebribodi. Im garra dum brabli gudbala ting en meigim brabli gudbala lowa.
6“Wal melabat bin irrim blanga Moweb praudbalawei. Im pipul olabat bin oldei wokaranbat en toktokbat praudbalawei, bat nomo garram eni risan.
7“Blanga tharran na detlot pipul brom Moweb garra kraikrai nomo lilbit blanga olabat kantri. Dei garra krai soribalawei blanga ol detlot brabli gudwan greip daga brom Kireres. 8Detlot fam weya growimap greip daga gulijap langa det dubala taun gulum Heshban en Sibma bin jidan brabli draiwan na. Detlot boswan blanga ola kantri bin oldei jidan drangginbala brom dringgimbat det wain weya deibin oldei meigimbat brom detlot greip daga weya deibin growimap langa det kantri gulijap langa det taun gulum Jeisa en sangidapwei langa det deset kantri en sangodanwei raidap langa det solwoda gulum Dedsi. 9Wal mi kraikraibat wulijim Jeisa na, en blanga detlot fam weya bin growimap greiptri langa Sibma. Main tiyas randan brom main dubala ai blanga Heshban en Eliyeila, dumaji olabat enamimob bin binijimap ola frut daga en sid daga en nobodi kaan abumbat enimo gudbala taim en padi wen olabat kadimbat detlot sid daga. 10Dumaji nomo enijing gro deya na dei kaan abumbat gudbala taim blanga gajimbat ola daga en bitsimap ola greip daga. God na bin dum dijan en olabat jidan nogudbinji.
11“Insaid langa main hat mi ardimbat blanga Moweb en Kireres. 12Detlot Moweb pipul meigim miselp nokap brom gogobat langa detlot teibul blanga ofring blanga weshipbat en preipreibat langa olabat drimin. Bat tharran nomo album olabat.
13“Wal YAWEI bin olredi dalim detlot Moweb pipul blanga ol dislot ting, 14en im tok na, ‘Wal langa thribala yiya ol detlot gudbala enijing blanga Moweb garra binij. Oni lilbit pipul garra jidan laibala, en dei garra jidan brabli wikwan.’”a14Aisaiya 25:10-12; Jeramaiya 48:1-47; Isikiyel 25:8-11; Eimos 2:1-3; Sefanaiya 2:8-11

a15:1-16: 14Aisaiya 25:10-12; Jeramaiya 48:1-47; Isikiyel 25:8-11; Eimos 2:1-3; Sefanaiya 2:8-11