71Trubala yu brabli purdiwan gel.
Yu fut dubala luk brabli purdiwan wen yu werrimon but.
Det dubala leig blanga yu im luk brabli shainiwan.
2Det binjipat blanga yu jis laik kap ful garram wain.
En yu binji jis laik det sid daga wen yu pailimap,
en olaran detlot purdiflawa jidan.
3Blanga yu milk dubala raunwan jis laik det dubala popo.
4Yu nek im longwan en im brabli shainiwan,
jis laik det smuthwan ston det jidan langa woda.
Yu dubala ai im luk jis laik det woda deya langa Heshban,
gulijap langa det geit blanga det taun.
En yu nos im luk brabli streitwan jis laik det haiwan haus blanga Lebanan,
weya dei oldei wotjimbat Dameskas.
5Yu jis laik det brabli haibala hil gulum Kamul.
Yu heya im brabli shainiwan en blekwan,
en im brabli purdiwan, en im gin meigim eni king wandim yu.
6Yu luk purdiwan!
Yuwai, yu brabli purdiwan.
Yu meigim mi gudbinji en ai laigim yu detmatj.
7Yu brabli longwan en yu mubaranbat gudwei laik det pamtri,
en yu dubala milk brabli fulwan laik det kukwan frut daga blanga det pamtri.
8Ai garra galimap langa det pamtri en gajim ola frut daga.
Langa mi, yu dubala milk im luk jis laik det greip daga,
en yu smel laiga switwan epul.
9Wen yu kiskisbat mi, yu teist laik det brabli gudwan wain.
Det gel im sing,
Larram det wain randan streit langa main olmen,
en larram im teistim garram im maus gudwei.
10Mi blanga yu, main olmen, en yu oldei wandimbat mi olataim.
11Kaman, main olmen.
Yunmi garra gowei longwei langa bush kantri na,
en yunmi garra slip olnait weya detlot wailwan purdiflawa jidan.
12Yunmi garra gidap ailibala gin,
en luk if purdiflawa bin kamat langa detlot greiptri.
Yunmi garra go luk if deibin gro gudwei en abum purdiflawa,
en if det najalot frut tri gulum pamagrenit tri abumbat purdiflawa du.
Deya na ai garra jidan garram yu en yunmi garra silipsilipbat.
13Yu gin smelim det gudsmelwan bush medisin en ola gudwan frut daga.
Olabat iya gulijap langa yunmi dowa.
Main olmen, ai laigim yu detmatj en aibin kipum miselp blanga yu.
Det gel im sing,